މަޑަގަސްކަރައިގެ ރައީސްގެ މަޤާމުގައި ހުންނަވަނިކޮށް، ވެރިކަމުން ވައްޓާލި ކުރީގެ ރައީސް އެންޑްރީ ރަޖޮލީނާގެ ރައްޔިތުކަން ބާތިލު ކޮށްފި އެވެ.

މަޑަގަސްކަރައިގެ ސިފައިންގެ ވެރިކަމުން ވަނީ ރަޖޮލީނާގެ ރައްޔިތުންކަން ބާތިލު ކުރަން ނިންމައިފަ އެވެ. އެއީ ވެރިކަމުން ވައްޓާލި ފަހުންް، ރަޖޮލީނާ ފްރާންސްގެ ރައްޔިތުންކަން ހޯދުމާ ގުޅިގެންނެވެ.

ހުކުރު ދުވަހު ނެރުނު ޤަރާރެއްގައި އެ ޤައުމުގެ ބޮޑު ވަޒީރު ހެރިންޓްސަލަމާ ރަޖަވޮނަރިވެލޯ ވިދާޅުވެފައި ވަނީ، ޤައުމުގެ ޤާނޫނު ތަކުގެ ދަށުން، އަމިއްލަ އިޚްތިޔާރުގައި ބޭރު ޤައުމެއް ރައްޔިތެއްކަން ހޯދާ މަޑަގަސްކަރައިގެ ރައްޔިތުން، އެ ޤައުމުގެ ރައްޔިތުކަން ދޫކޮށްލަން ޖެހޭނެ ކަމަށެވެ. ނުވަތަ ރައްޔިތުކަން ގެއްލޭނެ ކަމަށެވެ.

އުމުރުން 51 އަހަރުގެ ރަޖޮލީނާ ވަނީ މި މަހުގެ ކުރީ ކޮޅު ޤައުމު ދޫކުރައްވައި ފިއްލަވައިގެން ވަޑައިގެންފަ އެވެ. އެއީ ސިފައިން އެންޓި-ގަވަމަންޓް މުޒާހަރާ ކުރި ފަރާތްތަކާ އެއް ސަފަކަށް އެނބުރި، ޤައުމުގެ ބާރު ހޯދުމާ ގުޅިގެންނެވެ. ޤައުމު ދޫކުރައްވައި ރަޖޮލީނާ ވަޑައިގެންނެވި ނަމަވެސް، މިވަގުތު އޭނާ ހުންނެވި ސީދާ ތަނެއް ކަށަވަރު ނުވާ ކަމަށް ރިޕޯޓުތައް ބުނެ އެވެ.

މީގެ އިތުރުން، މަޑަގަސްކަރައިގެ ބޮޑު ވިޔަފާރި ވެރިއެއް ކަމަށްވާ މަމިނިއައިނާ ރަވަޓޮމަންގާ ވަނީ ހުކުރު ދުވަހު ހައްްޔަރު ކޮށްފަ އެވެ. އެއީ މޮރިޝަސްގެ ފައިނޭންޝަލް ކްރައިމްސް ކޮމިޝަަން އިން ބަލަމުން އަންނަ މަނީ ލޯންޑަރިންގެ މައްސަލައަކާ ގުޅިގެންނެވެ. ރޭޑިއޯ ފްރާންސް އިންޓަނޭޝަނަލްގެ ރިޕޯޓު ތަކުގައި ބުނެފައިވާ ގޮތުން، އޭނާ އަކީ ކުރީގެ ރައީސް ރަޖޮލީނާ އަށް މާލީ ގޮތުން އެހީތެރިވާ މީހާ އެވެ.

ކޮމިޝަން އިން ހުކުރު ދުވަހުގެ ރޭ ނެރުނު ބަޔާނެއްގައި ބުނެފައި ވަނީ ރަވަޓޮމަންގާ، މޮރިޝަސްގައި ހިންގާ ވިޔަފާރި ތަކުގައި ކުށުގެ އަމަލުތައް ހިންގައިގެން ލިބުނު ފައިސާ ހިމެނިފައިވާ ކަމަށް ޤަބޫލު ކުރެވޭ ވަރަށް ގިނަ ސަބަބު ތަކެއް ހުރި ކަމަށެވެ.

ކޮމިޝަން އިން ވަނީ ރަވަޓޮމަންގާގެ އަމިއްލަ އެކައުންޓު އަދި އޭނާގެ ކުންފުނި ތަކުގެ ބޭންކު އެކައުންޓްތައް ހިފެހެއްޓުމުގެ އަމުރެއް ނެރެފަ އެވެ. މި ތަޙުގީގު ގައި ހިމެނެނީ އޭނާގެ ބެލުމުގެ ދަށުގައިވާ ވިޔަފާރި ތަކުގެ 6.46 ބިލިއަން ރުޕީސް (141.8 މިލިއަން ޑޮލަރު) އާއި އަމިއްލަ 858.5 މިލިއަން ރުޕީސް އެވެ.

ނަމަވެސް ރަވަޓޮމަންގާ ވަނީ އެއްވެސް ކުށެއް ކޮށްފައި ނުވާނެ ކަމަށް ވިދާޅުވެ، ތުހުމަތު ތަކަށް އިންކާރު ކޮށްފަ އެވެ. އޭނާ ހުވައި ކޮށްގެން ދީފައިވާ ބަޔާނެއް ގައި ބުނެފައި ވަނީ، އެ ފައިސާ އަކީ 30 އަހަރުގެ ތެރޭގައި މޮރިޝަސް ގައި ވިޔަފާރި ކޮށްގެން ޤާނޫނީ ގޮތުން ހޯދާފައިވާ ފައިސާ ކަމަށާއި، އަދި އެއީ އެންމެ އިތުބާރު ހުރި ބޭންކު ތަކުގެ ދަށުން ބަލަހައްޓަމުން އައި ފައިސާ ކަމަށެވެ.