ވަގަށް ނެގި 13 މިލިއަން ސިނގިރެޓް މައްސަލައިގައި ހިމެނޭ އެންމެންގެ ބަންދުގެ މުއްދަތު ޖަހައިފި
ހުޅުމާލޭ ޕޯޓުގައި ހުރި 40 ފޫޓުގެ ދެ ކޮންޓެއިނަރުން 13 މިލިއަނަށްވުރެ ގިނަ ސިނގިރޭޓު ވަގަށް ނަގާފައިވޭ
ހުޅުމާލެ ޕޯޓުގައި ބަހައްޓާފައި ހުއްޓާ ވަގަށް ނެގި 13 މިލިއަން ސިނގިރެޓުގެ މައްސަލައިގައި ހައްޔަރު ކުރި 4 މީހުން
ވަގަށް ނެގި 13 މިލިއަން ސިނގިރެޓް މައްސަލައިގައި ހިމެނޭ އެންމެން ބަންދުކުރަން އަމުރުކޮށްފިއެވެ.
މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ ހުޅުމާލޭ އިންޓަރނޭޝަނަލް ޕޯޓުގައި ހުއްޓާ 40 ފޫޓުގެ ދެ ކޮންޓެއިނަރ ގައި ހުރި 13 މިލިއަނަށްވުރެ ގިނަ ސިނގިރޭޓު ވަގަށް ނެގި މައްސަލާގައި ހައްޔަރު ކުރީ ކޮން ބައެއްކަން ފުލުހުން ފުރަތަމަ ހާމަކޮށްފައި ނުވެއެވެ. ނަމަވެސް އާންމުންގެ ޕްރެޝަރާއި ނޫސްތަކުން އެ މައުލޫމާތު ހާމަކުރުމުން ފުލުހުން ވަނީ އެއީ ކޮން ބައެއްކަން ހާމަކޮށްފައެވެ.
ހައްޔަރު ކުރި 4 މީހުންނަކީ
- މުޙައްމަދު ވަޙީދު، ދިގަލި، ބ. އޭދަފުށި - އެޕޯލޯގެ ވެރިޔާ
- އަޙްމަދު ޢާރިފް (އާއްޓޭ) މ. އެވަރ ގްލޯރީ، ކ. މާލެ - ލޮޓަސް ގެ ވެރިޔާ
- މުއާޒް ޢަލީ، ނިއު ހެޕީނަސް، ކ. މާލެ - ކުރީގެ ކަސްޓަމްސްގެ ސީނިއަރ ސުޕްރިންޓެންޑެންޓް އަދި މިފްކޯގެ ޖެނެރަލް މެނޭޖަރު
- ޒިވާރު އިސްމާޢީލް، މެދުރީގެ، ހދ. ވައިކަރަދޫ - ސީނިއަރ ކަސްޓަމްސް އޮފިސަރ
މި މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރު ކުރުމުން، އަހުމަދު އާރިފް އާއި ޒިވާރު އިސްމާއިލް 15 ދުވަހަށް އަދި މުހައްމަދު ވަހީދު 10 ދުވަހަށް އަދި މުއާޒު އަލީ 5 ދުވަހަށް ބަންދު ކުރުމަށް ކްރިމިނަލް ކޯޓުން ވަނީ އަމުރުކޮށްފައެވެ.
ހައްޔަރުކުރި މީހުންގެ ތެރޭގައި ހިމެނޭ މިފްކޯގެ ޖެނެރަލް މެނޭޖަރު، އިންޖިނިއަރިން ޕްރޮޖެކްޓްސްގެ މަގާމުގައި ހުރިމުއާޒް އަލީ އަކީ އެހެން މައްސަލައެއްގައި ރާއްޖެ އަށް 430 ސިނގިރޭޓް ކޭސް އެތެރެ ކުރުމުގައި ރިޝްވަތަށް އެދުނު ކަމުގެ ތުހުމަތުގައި ދައުވާ ކޮށްދޭން އެދި އެންޓި ކޮރަޕްޝަން ކޮމިޝަނުން ޕްރޮސެކިއުޓަރ ޖެނެރަލްގެ އޮފީހަށް ފޮނުވާފައިވާ މީހެކެވެ.
މީގެ އިތުރުން ވިޔަފާރިވެރިޔާ އާރިފް އަކީ ރައީސް ޑރ. މުހައްމަދު މުއިއްޒު ވެރިކަމަށް ގެންނަން އެންމެ އިސްކޮށް މަސައްކަތް ކުރި، ރައީސް މުއިއްޒުގެ އަރިސް ފަރާތެކެވެ. ރިޔާސީ އިންތިހާބުގެ ތެރޭގައި އޭނާ ވަނީ ޕީޕީއެމް އަށް އެއިރު ސޮއިކޮށް ރައީސް މުއިއްޒު ވެރިކަމަށް ގެނައުމަށް ގިނަ މަސައްކަތެއް އެކި ގޮތްގޮތުން ކޮށްފައެވެ.
ފުލުހުން އަންގާރަ ދުވަހުގެ ރޭ ނެރުނު ބަޔާނުގައި ބުނާ ގޮތުގައި 13 މިލިއަން ސިނގިރޭޓް ވަގައް ނެގުމުގެ ހާދިސާ ހިނގާފައިވަނީ 26 އޭޕްރިލް 2025 ގައި ކަމަށާއި، މި މައްސަލަ ރަސްމީކޮށް ރިޕޯޓު ކޮށްފައި ވަނީ 9 އޮކްޓޯބަރު 2025 ގައި ކަމަށެވެ. ފުލުހުން އިތުރަށް ބުނެފައި ވަނީ 12 މީހެއްގެ މައްޗަށް ފުރުން މަނާ ކުރުމުގެ އަމުރެއް ނެރެ، މި އޮޕަރޭޝަނާ ގުޅުން ހުރި އެކި އުޅަނދުފަހަރާއި ތަންތަން ބަލައި ފާސްކޮށްފައިވާ ކަމަށެވެ.
ވަގައް ނެގި މުދަލުގެ ތެރޭގައި ހިމެނެނީ ކަސްޓަމްސް ސާވިސް އިން ހިފަހައްޓާ އެމްޕީއެލްގެ ބެލުމުގެ ދަށުގައި ބެހެއްޓިފައިވާ 1،360 ކޭސް (ގާާތްގަނޑަކަށް 13.6 މިލިއަން ސިނގިރޭޓް) އެވެ. މި އަދަދުގެ ސިނގިރޭޓުން ސަރުކާރަށް އިމްޕޯޓް ޑިއުޓީގެ ގޮތުގައި 100 މިލިއަން ރުފިޔާ އަށް ވުރެ ގިނަ އިން ލިބެން ޖެހޭނެ ކަމަށް ބެލެވެއެވެ.
