ވެރިންގެ އަނިޔާވެރި ކަމުގެ ވޭނީ ހިތާމަ މިއަދު އުފުލަން ޖެހިފައި މިވަނީ ރައްޔިތުންނަށް!

ރައީސް ޑރ މުހައްމަދު މުއިއްޒުގެ މި ސަރުކާރު ވެރިކަމަށް އައީ ގައުމު ދާ މިސްރާބު ގޯސްވެގެން ކަމަށް ބުނެ، ގައުމު ހަމަމަގަށް އެޅުވުމަށެވެ. އެގޮތުން ކުރީ ސަރުކާރުން ކުރަމުން ގެންދިޔަ ހަމަ ކޮންމެ ކަމަކީ ވެސް އޭރު އިދިކޮޅުގައި އޮތް މިހާރު ވެރިކަމުގައި ބަގުޑިބައްދައިގެން ތިބި މީހުންނަން ބަލައިގަނެވޭ ކަންކަމަކަށް ނުވިއެވެ.

ނިތްކުރިއަށް ރުލެއްވެސް އަރުވައިނުލާ އެތަކެއް ބުހުތާނު ދޮދު ވާހަތަކެއް ދައްކައިގެން، ރައްޔިތުންނަށް މާ ހެޔޮއެދިގެން، ރައްޔިތުންނަށް ހެޔޮ ވެރިކަމެއް ކޮށްދޭނަމޭ ކިޔައި އެތަކެއް ފޮނި ވައުދުދާއި އަހުދުތަކެއް ވެގެން ވެރިކަމަށް އައި މީހުންގެ ހަގީގީ ސޫރަ މިއަދު ދިވެހި ރައްޔިތުންނަށް ވަރަސް ސާފުކޮށް ދަނީ ފެންނަމުންނެވެ.

ވެރިކަމަށް ދެ އަހަރުވާން ދާއިރުގައި ވެސް އޭރު ރައްޔިތުންނަށް ވި ވައުދުތަކުގެ މަތިން ކުޑަކޮށް ވެސް ހަނދާން ހުންނަކަމަކަށް ނުވި އެވެ. އަމިއްލަ ޖީބު ފުރާފައި ދެން އިތުރަށް ރައްޔިތަކަށް ދޭނޭ ހަމަ އެކައްޗެއް ވެސް މި ސަރުކާރުގައި އޮންނަ ކަމަކަށް ނުވެ އެވެ.

މުޅި ގައުމު އޮތީ ދަރާ ހިކިފައި ކަމަށް ބުނަމުން ދާއިރު، ރައީސް މުއިއްޒަށް ސަނާ ކިޔާ މީހުން ސިޔާސީ ބޮޑެތި މަގާމުތަކަށް ލައްވާ މަންޒަރު އަންނަނީ ކޮންމެ ދުވަހަކު ކަހަލަ ގޮތަކަށް ފެންނަމުންނެވެ.

މިހާރު ވެރިކަމުގެ ތަހުތުގައި ބަގުޑިބައްދައިގެން ތިބި ވެރިންނަކީ ހަގީގަތުގައި އިއްޔެ އާއި މާދަމަ އަށް ވުރެ އަބަދުވެސް މިއަދު މުހިންމު ވާ ބައެކެވެ. ވެރިކަމުގެ ކޮންމެ ދުވަހެއްގައި ވެސް އުފަލާ އަރާމުގައި އުޅުން ފިޔަވައި އެހެން ކަމެއް މި ސަރުކާރުގެ ވެރިން ބޭނުމެއް ނުވާ ކަހަލަ އެވެ.

މިއަދު ދިވެހިރައްޔިތުންނަށް ވެސް ކުރިމަތިވެފައި މި ވަނީ މި ސަރުކާރުގެ މުސީބާތެކެވެ. ވެރިމީހާގެ ތެދުވެރިކަމެއް ނެތުމުގެ ވޭނީ ހިތާމަ މިއަދު އުފުލަން ޖެހިފައި މިވަނީ ގައުމުގެ ނިކަމެތި ރައްޔިތުންނަށެވެ.

މުޅި ގައުމުގެ އިގްތިސޯދު ފުނޑިއްޖެ އެވެ. ރައްޔިތުންގެ މާލީ ހާލަތު ދަށަށް ގޮސް ނިކަމެތި ވެއްޖެ އެވެ. އަމިއްލަ ވިޔަފާރިތައް ހުއްޓިފައެވެ. ދަރާފައެވެ. މީހުންގެ ޖީބުތައް ހުސްވި އިރު ތަކެތީގެ އަގު އަތްނުފޯރާ ފަށުގައެވެ.

މިފަދަ ނުރައްކާތެރި ހާލަތައް ގައުމު ދާން ޖެހުނީ ސަރުކާރުގެ ތެރޭގައި ދޮގުވެރީންނާއި ހީލަތްތެރިން ގިނަވެ ތެދުވެރީންނާއި އިޚުލާސްތެރިން ނެތުމުން ނެވެ. ގިނަ ބަޔަކު ދެކޭ ގޮތުގައި ރައީސް މުއިއްޒުގެ މި ސަރުކާރުގައި ބޮޑެތި މަގާމުތަކުގައި ތިއްބެވީ ރައްޔިތަކަށް ކުޑަވެސް އޯގާތެރި ކަމެއް، މަގާމު އަދާ ކުރުމުގައި އެއްވެސް ތެދުވެރިކަމެއް ނެތް ބައެކެވެ.

ގައުމުގެ އިގްތިސޯދު އިނދަ ޖައްސާލި ބަޔަކީ ރައީސް މުއިއްޒުއާއި އެމަނިކުފާނުގެ އައުވާނުންނެވެ. ބަދަލު ދިނުމުގެ ނަމުގައާ އަދިވެސް އެހެނިހެން ނަންނަމުގައި އަމިއްލަ މަސްލަހަތު ހިމެނޭ މީހުންނަށް ދައުލަތުގެ ޚަޒާނާ އެދަނީ ބަހަމުންނެވެ.

ބޮޑެތި އަދަދުތަކުން ބަޖެޓުތައް ފާސްކޮށް މުޅި ބަޖެޓު ބަހާ ހުސްކޮށްލި އިރު ގައުމުގެ ރައްޔިތުންނަށް ބޭނުންވާ ތަރައްގީގެ އެއްވެސް މަޝްރޫއުއެއް މި ސަރުކާރަށް ނުހިންގުނެވެ. އަހަރުގެ ފުރަތަމަ ބައި ނިމުނުއިރު، ދައުލަތަށް ލިބުނު އާމްދަނީގެ ރެކޯޑެއް އޮތް ނަމަވެސް އެއަކުން ރައްޔިތަކަށް ރާހަތެއް ކުރި މަންޒަރެއް ނުފެނުނެވެ.

ސަރުކާރުގެ ރިފޯމް އެޖެންޑާގައި ހުރި ގިނަ ކަންކަން ބޮލާލައި ޖަހައި އާސަންދައިގެ ހަރަދު ވެސް އިހުނަށް ވުރެ ބޮޑުކޮށްލީ އެވެ. އެކަމަކު ރައްޔިތުން ބޭސް ސިޓީ އަށް ސަލާން ޖަހަނީއެވެ. ސަރުކާރުގެ މެމްބަރެއްގެ ފައިބުޑަށް ވެއްޓިގެން ނޫނީ ބޭސްފަރުވާ ކުރެވޭނެ ފަދަ އެއް މިއަދަކު ނެތެވެ.

ރައްޔިތުންނަށް ލިބުނީ މަތިވި އިންފްލޭޝަން އެވެ. ޑޮލަރުގެ އަގު މައްޗަށް ދިއުމެވެ. ބޮޑެތި ކަރަންޓު ބިލު ތަކެވެ. ކަރަންޓު ކެނޑުން އިތުރުވުމެވެ. ދެ އަހަރުތެރޭގައި 110 ބިލިއަން ރުފިޔާ ހުސްވިއިރު ރައީސް މުއިއްޒަށް ކުރެވުނު ހަމައެކަނި ކަމަކީ 55 އޭޓީއެމް ބެހެއްޓުމެވެ. އެކަމަކު އެކަމަށްވެސް ޚަރަދު ކުރީ ސަރުކާރުގެ ބަޖެޓަކުންނޫނެވެ.