ރޮހިންޖާ ދަރިކޮޅުގެ މުސްލިމުންނާ ދެކޮޅަށް ލާއިންސާނީ ޖަރީމާތައް ހިންގަމުންދާ މިދަނޑިވަޅުގައި ރޮހިންޖާ މުސްލިމުންނަށް އެހީވުމަށް ރާއްޖެޓީވީން ބާއްވާ ޓެލެތޯންގައި ޅެންވެރިންނާއި މިއުޒީޝަނުންނަށް ފުރުޞަތު ހުޅުވާލައިފިއެވެ.
މިޓެލެތޯންގައި ބައިވެރިވުމުގެ ޝައުޤުވެރިކަން އޮތް ފަރާތްތަކުން ރާއްޖެޓީވީގެ 3007771 ގުޅުއްވައިގެން މައުލޫމަތު ސާފުކުރެވޭނެއެވެ. އެގޮތުން ރޮހިންޖާ މުސްލިމުންނަށް ހިތްވަރުދީ މުސްލިމުންގެ އެއްބައިވަންތަކަން ހާމަކޮށްދޭ، ޅެމާއި ލަވަތައް، ޓެލެތޯންގެ ކަވަރޭޖްގެ ތެރޭގައި ހިމަނާލެވޭނެއެވެ.
މިކަމުގެ މަޤްޞަދަކީ ރޮހިންޖާ މުސްލިމުންނާއި ދެކޮޅަށް މިޔަންމާގެ ސިފައިން ހިންގަމުން ގެންދާ ލާ އިންސާނީ އަނިޔާވެރި އަމަލު ތަކާއި ދެކޮޅު ހެދުމާއި، މިކަމުގެ ސަބަބުން ހާލުގައި ޖެހެމުންދާ އެތައް ލައްކަ މުސްލިމުންނަށް އެހީވުން ކަމަށް ރާއްޖެޓީވީގެ މެނޭޖްމަންޓުން ބުންޏެވެ.
މި ޓެލެތޯން ކުރިއަށްދާނީ ސެޕްޓެމްބަރ މަހުގެ 8 ވާ ހުކުރު ދުވަހުގެ 2:30 ފެށިގެން 24 ގަޑިއިރަށް މެދު ކެނޑުމެއް ނެތިއެވެ. މިޓެލެތޯންއަށް ފައިސާގެ އެހީތެރިކަން ފޯރުކޮށްދޭން ބޭނުންވާ ފަރާތްތަކަށް ޓެލެތޯންގެ ތެރެއިން އެފުރުޞަތު ހުޅުވާލާނެއެވެ. އަދި ކުންފުނިތަކުންނާއި، ޖަމިއްޔާ ޖަމާއަތްތަކުން މި ޓެލެތޯންގައި ބައިވެރިވެ ޕާޓްނަރުންނަށް ވުމުގެ ފުރުޞަތު މިހާރު ވަނީ ހުޅުވާލާފައެވެ.
އަދި މިޓެލެތޯންގައި ގިނަ އަދަދެއްގެ ކުންފުނިތަކުންނާއި އަމިއްލަ ފަރުދުންދަނީ ބައިވެރިވަމުންނެވެ.