އިހަކަށް ދުވަހު އާއްމުން އެއްވެ ސަރުކާރާއި މެދު ނުރުހުން އޮތްކަން ދައްކާލީ "ލޫޓުވައިފި، ލޫޓުވައިފި" އެއްވުމުންނެވެ. މިދިޔަ ހުކުރު ދުވަހު ފެނުނީ ބޮޑު މުޒާހަރާ އެއް ބާއްވާ ސަރުކާރުގެ ނުކިއްސަރު ކިތަންމެ ވާހަކަ އެއް ދެއްކި ތަނެވެ. އެތައް ބުހުތާނު ދޮގެއްގެ ވާހަކަ ތަކުރާރުކޮށް ދެއްކިއެވެ. ޕެޕަރސްޕްރޭ އާއި ސޮނިކް ހަތިޔާރުގެ ގަދަ އަޑުފަތްގަނޑާއި އެކު ވެސް ފަހަތަށް ޖެއްސޭ ގޮތެއް ނުވިއެވެ. އެއީ ކާމިޔާބު ބޮޑު މުޒާހަރާއެކެވެ. މި ސަރުކާރާއި ދެކޮޅަށް އަޑު އުފުލަން އަދި ކުރިން ނުނިކުންނަ ވަރަށް މީހުން ނުކުމެ ތިއްބެވެ. މެސެޖު ވަރަށް ސާފުކޮށް އިވޭ ވަރަށް އަޑު ހަރުކޮށް އެރޭ އާޓިފިޝަލް ބީޗް ކައިރިން އާއްމުން އަޑު އިއްވިއެވެ.

މި އުޅެނީ އަދި އެފަހުން ހަފްތާ އެއް ނުވެގެންނެވެ. ދެން ފެނުނީ ކުއްލިއަކަށް އެއްކަލަ މުޒާހަރާ ކުރި ޕާޓީގެ ޗެއަރޕަރސަން އަށް ޗިޓެއް ފޮނުވި މަންޒަރެވެ. ބުދަ ދުވަހު އެމްޑީޕީގެ ޗެއަރޕާސަން ފައްޔާޒް އިސްމާއިލް، އެންޓި ކަރަޕްޝަން ކޮމިޝަން (އޭސީސީ) އަށް ހާޒިރުވުމަށް އަންގައިފިއެވެ. އޭސީސީގެ އެސިސްޓެންޓް ސުޕްރިންޓެންޑެންޓް އަހުމަދު އަމީން ސޮއިކޮށްފައިވާ އަމުރުގައިވާ ގޮތުން، ފައްޔާޒް އޭސީސީ އަށް ހާޒިރުވާން ޖެހެނީ މި މަހުގެ 13 ވަނަ ދުވަހުގެ ހެނދުނު 9:30 އަށެވެ.

ޗިޓު ފޮނުވީ އޭސީސީގެ ތަހުގީގަކަށެވެ. ތުހުމަތަކީ ރަސްމީ ހައިސިއްޔަތު ނަހަމަ ގޮތުގައި ބޭނުންކޮށް ދައުލަތަށް ގެއްލުންވާ ގޮތަށް އަމަލުކުރުމެވެ. އިއްތިފާގުން މިކަހަލަ ޗިޓުތައް މުޒާހަރާ އެއްގެ ފަހަތަށް އެމުނުމަކީ ހަމަ އަޖައިބު ހައިރާންވެ، އަންތަރީސް ވާ ވަރުގެ ކަމެކެވެ.

އެހެންޏާ ފަހެ، މީގެ ކުރިން ވެސް މި ސަރުކާރާއި ދެކޮޅަށް މުޒާހަރާ އެއް ކުރާ ކޮންމެ ފަހަރަކު ކޮންމެވެސް މުއައްސަސާއެއްގައި ކުރިއަށް ނުކަނޑާފައި އޮތް މައްސަލަ އެއް ހިނގައިގަންނާނެއެވެ. ޒާތްޒާތުގެ ޗިޓުތަކާއި އިންޒާރުތައް އަންނާނެއެވެ. ނިމިދިޔަ ރޯދަ މަހު ކުރިއަށް ދިޔަ އެމްޑީޕީގެ ކޮންމެ ރެއަކު ކޮންމެ ރެއަކު މުޒާހަރާތައް ކުރިއަށް ދިޔަ އިރު ވެސް މިކަހަލަ ޗިޓުތައް ތިލަވިއެވެ.

އެކަމަކު މިހާރު މިކަހަލަ ޗަރުކޭސް ދިވެހިން ބަލައެއް ނުގަންނާނެއެވެ. ގިނަ އާއްމުން ދެކެނީ މިކަހަލަ ކަންކަމަކީ ބިރު ދެއްކުމުގެ ގޮތުގައެވެ. ސަރުކާރު ޕްރެޝަރަށް ވެއްޓިފައި އޮންނަ ވަގުތު މި ކަހަލަ ޗިޓްތައް އައުމަކީ އިއްތިފާގެއް ކަމަށް ވެސް ޤަބޫލު ކުރަން ދަތިވެއެވެ.

މިނިވަން މުއައްސަސާތައް ތަޅު އެޅިފައިވާ، ބަސް ނުބުނެވޭ ހާލެއްގައި އޮތްކަން މިއަދު އެންމެންވެސް އެ ދަނީ ފާހަގަކުރަމުންނެވެ. މިވަގުތު އޭސީސީން އިންސާފުވެރި ތަހުގީގެއް ކުރާނެ އަދި ކުރެވޭނެ ބަޔަކު ވެސް ނެތް ކަަމަށް އެ ފަދަ އާއްމުން ބުނާ ސަބަބަބަކީ އެއީއެވެ.

ހަގީގަތަކީ މިދިޔަ ދެ އަހަރު ފާއިތުވީ މި ކަހަލަ ރޭވުންތެރި އިއްތިފާގުތަކާއި އެކުގައެވެ. އަޑު އުފުލައިފިއްޔާ އެ މީހެއްގެ ފައިލް ހުޅުވޭނެކަން ވިސްނާށޭ ބުނާ ކަހަލައެވެ. ފަހަރެއްގައި ކޮންމެ މުޒާހަރާ އަކަށް ފަހު މި އަންނަ ޗިޓުތަކަކީ ދެ ބޯގެރި ދުއްވާ ފޯކަސް ބަދަލުކުރާ ކަމަކަށް ވެސް ވެދާނެއެވެ.

ސާފުވާ ކަމަކީ ފާރަވެރިވުމުގެ ނިޒާމު އެއްކޮށް ފުނޑާލާފައިވާކަމެވެ. ވަޒީފާގެ ޔަޤީންކަން ހޯދަން އެހެން ބަޔަކު އެެހެން އާއްމުން ފުނޑާލުން ވަރިހަމައޭ ބުނާކަހަލައެވެ. ވިސްނާ ބަޔަކަށް މިއި އިއްތިފާގެއް ކަމަށް ޤަބޫލުކުރަން ނިކަން ދައްޗެވެ. ގޮތް ނިންމަވާނީ ތި ބޭފުޅުންނެވެ.