ފްރާންސްގެ ސިޔާސީ ހަލަބޮލި ކަމުގެ ތެރެއިން، އެންމެންގެ ކަޅި މެކްރޮން އަށް

ފްރާންސްގެ ބޮޑު ވަޒީރުގެ މަގާމުގައި ހުންނެވި ސެބަސްޓިއަން ލެކޯނޫ މަގާމުން އިސްތިއުފާ ދެއްވުމާ އެކު ފްރާންސްގެ ސިޔާސީ މަސްރަހު ހަލަބޮލިވެފައިވާއިރު، ފްރާންސްގެ ރައީސް އިމަނުއެލް މެކްރޮން ދެން އަޅުއްވާނެ ފިޔަވަޅަކަށް އެތައް ބަޔަކު އިންތިޒާރު ކުރަން ފަށައިފި އެވެ.

ފްރާންސްގެ ބޮޑު ވަޒީރު ކަމުގެ މަޤާމުން ލެކޯނޫ އިސްތިއުފާ ދެއްވާފައި ވަނީ އައު ސަރުކާރު އެކުލަވާލައި، ވަޒީރުންގެ މަޖިލިސް ވެސް އައްޔަން ކުރެއްވި ފަހުންނެވެ. އައު ސަރުކާރު އިއުލާން ކުރިތާ އެންމެ 14 ގަޑިއިރުގެ ތެރޭގައި ލެކޫނޯ އިސްތިއުފާ ދެއްވީ އެތައް ފާޑު ކިޔުން ތަކެއް އަމާޒުވެފައި ވަނިކޮށެވެ.

މެކްރޮންގެ ވެރިކަމުގައި ޑިފެންސް މިނިސްޓަރުގެ މަގާމު ވެސް ފުރުއްވި ލެކޫނޯ ބޮޑު ވަޒީރު ކަމުން އިސްތިއުފާ ދެއްވާފައިވާއިރު، މެކްރޮން ވަނީ އޭނާގެ އިސްތިއުފާ ޤަބޫލު ކުރަން ނިންމައިފަ އެވެ. އަދި ޤައުމީ މަސްލަޙަތާއި، ޤައުމުގެ ކަންކަން ދެމެހެއްޓުމަކަށްޓަަކައި އިތުރު މަޝްވަރާތައް ކުރިއަށް ގެންދިޔުމަށް 48 ގަޑިއިރުގެ މުއްދަތެއް ވެސް ދީފައިވެ އެވެ.

މެކްރޮންގެ މެދު މިނުގެ ޕާޓީ އާއި، ކޮންޒަވޭޓިވް ޕާޓީތަކާ އެއު އޮތް ގުޅުން ވެސް ވަނީ ނާޒުކު ޙާލަތަކަށް ވެއްޓިފަ އެވެ. ސަރުކާރަށް އެތައް ޕްރެޝަރެއް ކުރިމަތިވެ، އަތެއް ގޮންޖެހުމެއް ކުރިމަތިވެފައިވާއިރު، ކުރިއަށް އޮތް 2026 ވަނަ އަހަރުގެ ބަޖެޓު ފާސް ކުރުމަށް ޤާނޫނު ހަދާ މަޖިލީހުގައި ބޭނުންވާ ތާއީދު ހޯދުމުގައި ވެސް ވަނީ ނާކާމިޔާބުވެފަ އެވެ.

ފްރާންސްގެ ސިޔާސީ މަސްރަހު ވަރަށް ބޮޑަށް ގޯސްވެފައިވާއިރު، ލެކޫނޯ ވަނީ ހުރިހާ ސިޔާސީ ޕާޓީ ތަކާއި، ބާރު ތަކުން މަޝްވަރާ ތަކުގައި ބައިވެރިވުމަށް ދައުވަތު ދީފަ އެވެ. ނަމަވެސް، ހަރުކަށި ކަނާއަތު ފިޔައިގެ ނެޝަނަލް ރެލީ ޕާޓީގެ ލީޑަރު ކަމަށްވާ، މެރީން ލޫ ޕެން އަދި ޖޯޑަން ބާޑެލާ ވަނީ އެ ދައުވަތު ޤަބޫލު ނުކުރަން ނިންމައިފަ އެވެ. އަދި އެ ފަރާތްތަކުން ގޮވާލަމުން ދަނީ އަވަސް އިންތިޚާބެއް ބޭއްވުމަށެވެ.

ފްރާންސްގެ ޤާނޫނު އަސާސީ އިން އޮންނަނީ ޤައުމުގެ ރައީސް އަށް ވަރަށް ބޮޑެތި ބާރުތަކެއް ދީފަ އެވެ. އެގޮތުން ޤައުމަށް ބޮޑު ވަޒީރު އައްޔަން ކުރުމުގެ ބާރާއި، ބޭރުގެ ސިޔާސަތުތަކާ ގުޅޭ ބާރާއި، ޔޫރަޕިއަން ކަންކަމުގައި އަދި ބައިނަލްއަޤުވާމީ މުއާހަދާ ތަކުގައި ސޮއި ކުރުމުގެ ބާރު ރައީސް އަށް ލިބިގެންވެ އެވެ. ހަމަ އެހެންމެ، ސަލާމަތީ ބާރު ތަކުގެ އެންމެ އިސްވެރިޔާގެ ގޮތުގައި ވެސް ހުންނާނީ ރައީސް އެވެ.

މަސްރަހު ދިރާސާ ކުރާ ފަރާތްތަކުން ބުނާ ގޮތުގައި ފްރާންސްގެ ސަރުކާރު އިންތިހާ އަށް ޕްރެޝަރަށް ވެއްޓިފައިވާއިރު، މިހާރު ދެ ވަނަ ދައުރަކަށް ވެރިކަން ކުރައްވަމުން އަންނަ މެކްރޮންގެ ތާއީދު ވެސް ވަނީ ވަރަށް ބޮޑަށް ދަށްވެފަ އެވެ. އެ ޤައުމުގައި ނަގަމުން އަންނަ އާންމުންގެ ޚިޔާލު ތަކުން ދައްކަނީ ވެސް މެކްރޮންގެ ތާއީދު ވަރަށް ބޮޑަށް ދަށްވެފައިވާ ކަމަށެވެ.

މިވަގުތު ފްރާންސްގެ ރައީސް މެކްރޮން އަށް އޮތީ ތިން އޮޕްޝަން އެވެ. އެއީ އައު އިންތިޚާބަށް ގޮވާލުން ނުވަތަ އައު ބޮޑު ވަޒީރަކު އައްޔަން ކުރުން، ނުވަތަ ރައީސް ކަމުގެ މަގާމުން އިސްތިއުފާ ދެއްވުމެވެ. ގިނަ ފަރާތްތަކުން ޤަބޫލު ކުރާ ގޮތުގައި މި ތިން އޮޕްޝަންގެ ތެރެއިން މެކްރޮން އިޚްތިޔާރު ކުރާނީ އަނެއްކާ ވެސް އައު ބޮޑު ވަޒީރެއް އައްޔައް ކުރެއްވުމެވެ.

މިވަގުތު އަނެއްކާ ވެސް އިންތިޚާބަކަށް ގޮސްފި ނަމަ، މެކްރޮން އާއި އޭނާގެ ޕާޓީ އަށް އަޣުލަބިއްޔަތު ގެއްލުމުގެ ބިރުވެރިކަން ވަރަށް ބޮޑެވެ. އެހެންވެ، އައު އިންތިޚާބަށް ދާން މެކްރޮން ބޭނުންފުޅެއް ނުވާނެ އެވެ. އަނެއްކޮޅުން، އަމިއްލަފުޅަށް ރައީސް ކަމުން އިސްތިއުފާ ދެއްވުމަކީ ވެސް މެކްރޮން ކުރައްވާނެ ކަމެއް ނޫން ކަމަށް ދިރާސާ ކުރާ ފަރާތްތަކުން ދެކެއެވެ.

ފްރާންސްގެ ރައީސް ކަމުގައި ދެ ވަނަ ދައުރެއް އަދާ ކުރައްވަމުން އަންނަ މެކްރޮންގެ ރިޔާސީ ދައުރު ހަމަވާނީ 2027 ވަނަ އަހަރު އެވެ. ދެ ވަނަ ދައުރަކަށް އޭނާ އިންތިޚާބުވެ ވަޑައިގެންނެވީ 2022 ވަނަ އަހަރު އެވެ. މެކްރޮން ނިންމަވާފައި ވަނީ ދައުރު ހަމަވަންދެން ރައީސް ކަމުގެ މަގާމުގައި ދެމި ހުރުމަށެވެ.

ފްރާންސްގެ ތާރީޚަށް ބަލާއިރު، 1958 ވަނަ އަހަރުގެ ފަހުން ރައީސް ކަމުގެ މަގާމުން އިސްތިއުފާ ދެއްވާފައި ވަނީ އެންމެ ރައީސެކެވެ. އެއީ 1969 ވަނަ އަހަރު ރެފެރެންޑަމްގައި ބަލިވުމާ ގުޅިގެން ރައީސް ޗާލްސް ޑި ގޯލް އިސްތިއުފާ ދިނުމެވެ.

މެކްރޮންގެ ވެރިކަމުގެ ދެ ދައުރުގެ ތެރޭގައި މިހާތަނަށް ވަނީ ހަތް ބޮޑު ވަޒީރުން އައްޔަން ކުރައްވައިފަ އެވެ. އެހެންކަމުން ދެން އައްޔަން ކުރައްވާ ބޮޑު ވަޒީރު ވާނީ އަށް ވަަނަ ބޮޑު ވަޒީރަށެވެ.