މޯލްޑިވިއަން ޑިމޮކްރަޓިކް ޕާޓީ އެމްޑީޕީން އޮކްޓޯބަރ 3ގައި ބޭއްވި ބޮޑު މުޒާހަރާ "ލޫޓުވައިފި, ލޫޓުވައިފި" މުޒާހަރާ އާއި ގުޅިގެން އެ ޕާޓީގެ ގައުމީ މަޖިލީހުގެ މެމްބަރު ފާތިމަތު ޒަހިއްޔާ (ޒާޔާ) އާއި އެ ޕާޓީގެ އެކްޓިވިސްޓް އައިޝަތު ނަޖުދާ އަލީ (އަލޫ) ފުލުހަށް ހާޒިރުވުމަށް އަންގައިފިއެވެ.

ނަޖުދާ އާއި ޒާޔާ އާއި ދެ މީހުންނަށް ފުލުހަށް ހާޒިރުވާން އަންގާ، ޗިޓު ފޮނުވާފައި ވަނީ އަންގާރަ ދުވަހުއެވެ. އޭގެ ތެރެއިން ޒާޔާ އަށް ފުލުހުން ފޮނުވި ޗިޓުގައި އަންގާފައި ވަނީ ބުރާސްފަތި ދުވަހުގެ މެންދުރު 11:00 އަށް، ގަލޮޅު ޕޮލިސް ސްޓޭޝަނަށް ހާޒިރު ވުމަށެވެ. އަދި ނަޖުދާ އަށް އަންގާފައި ވަނީ ބުރާސްފަތި ދުވަހުގެ 09:00ގައި ގަލޮޅު ޕޮލިސް ސްޓޭޝަނަށް ހާޒިރު ވުމަށެވެ.

އެ މުޒާހަރާގައި ސުލްހަވެރިކަމާއި އެކު އެއްވެ އުޅުމުގެ ޤާނޫނާއި ޚިލާފަށް މާލޭގެ އެކި ސަރަހައްދުތަކުގެ މަގުތަކަށް އެއްވެ އަޑުގަދަކޮށް މުޒާހަރާކުރި ކަމަށާއި، އާއްމުން ދަތުރުފަތުރު ކުރުމަށް ހުރަސް އަޅާފައިވާ ކަމަށް ފުލުހުން ވަނީ ތުހުމަތު ކޮށްފައެވެ. އަދި އާއްމުން ވިޔަފާރިތަކަށް ދަތިވާނެހެން ހަރަކާތްތެރިވެ ފުލުހުންގެ ދައުރު އަދާކުރުމަށް ހުރަސް އަޅާފައިވާ ކަމަށް ވެސް ފުލުހުން ތުހުމަތުކުރެއެވެ.

އެ ދެ މީހުން ވެސް ފުލުހުންގެ އިދާރާ އަށް ހާޒިރު ކުރަނީ އޮކްޓޯބަރ 3ގެ އެއްވުމާއި ގުޅިގެން ސާމްޕަލް ފޮޓޯ ނެގުމަށާއި، ތަހުގީގުގެ ބަޔާން ނެގުމަށް ކަމަށް ފުލުހުން ވަނީ ބުނެފައެވެ. މިކަމާއި ގުޅޭ ގޮތުން ރާއްޖެ އެމްވީ އަށް މައުލޫމާތު ދެމުން ޒާޔާ ބުނެފައިވަނީ އޭނާ އަށް ފުލުހުން މިހާތަނަށް ދެ ޗިޓް ފޮނުވާފައިވާ ކަމަށެވެ. އަދި ތިން ވަނަ ޗިޓެއް ފޮނުވާނެކަން އަންގާރަ ދުވަހު ފުލުހުން އޭނާ އަށް އަންގާފައިވާ ކަމަށެވެ.

"ބުދަ ދުވަހު ވެސް ހާޒިރު ކުރޭ އެބަ. އަދި ޗިޓު ނުލިބޭ. ގުޅާލާފަ ބުނި. އެއީ ސޯޝަލް މީޑިއާގައި ފުލުހުންނަށް އިންޒާރު ދިން ކަމަށް ބުނެ. ފޯނު އަތުލީ އެ މައްސަލައިގައި. ބުރާސްފަތި ދުވަހު ހާޒިރު ކުރަނީ އެއްވުމާއި ގުޅިގެން. ތިން ވަނަ ޗިޓަކީ ކޮބާކަން އަދި ނުބުނޭ. ފުލު ފުލުގައި ޗިޓް އެބަ ފޮނުވާ. މި ނޫނަސް ސުވާލު އުފެދޭ ވަރަށް ގިނަ ކަންކަން އެބަ ހުރި." ޒާޔާ ހާމަ ކުރިއެވެ.

މަގު މަތިން ޒާޔާ ހުއްޓުވުމަށް ފަހު ފުލުހުން ވަނީ މީގެ ކުރިން ޒާޔާގެ ފޯނު ވެސް ހިފަހައްޓާފައެވެ. ކޯޓު އަމުރެއްގެ ދަށުން 7 އޮކްޓޯބަރގައި ޒާޔާގެ ފޯނު އަތުލާފައި ވަނީ ސޯޝަލް މީޑިއާ ގައި ފުލުހުންނަށް ނިސްބަތްވާ ގޮތަށް އެއްޗެއް ލިޔުނު ކަމަށް ތުހުމަތުކުރުމަށް ފަހުގައެވެ.

އޮކްޓޯބަރ 3ގެ އެއްވުމާއި ގުޅިގެން އިދިކޮޅު މައި ޕާޓީ އެމްޑީޕީގެ ގިނަ ބަޔަކު ފުލުހުންގެ އިދާރާ އަށް ހާޒިރުކުރަމުންދާ އިރު މި އަމަލަކީ ބިރުދެއްކުމުގެ އަމަލެއް ކަަމަށް އެމްޑީޕީން ސިފަކުރެއެވެ. އަދި މިއީ ކުރިއަށް އޮތް ނޮވެމްބަރ 17އިގައި ބާއްވާ ބޮޑު އެއްވުމަށް ހުރަސް އެޅުމަށް ހިންގާ އަމަލުތަކެއް ކަަމަށް ވެސް ގިނަ އާއްމުންނާއި އިދިކޮޅު ފަރާތްތަކުން ޤަބޫލުކުރެއެވެ. އަދި މިފަދައިން ޗިޓު ފޮނުވައިގެން ހާޒިރުކުރާ މީހުންގެ ތެރޭގައި ކަނބަލުންނަށް އިތުރަށް ފުރައްސާރަ ވާގޮތަށް އިދާރާތަކުން އަމަލުކުރާ ކަމަށް ވެސް ބައެއް އާއްމުން ފާހަގަކުރެއެވެ.