ރައީސް މުއިއްޒަށް ހީވެފައި އޮތީ ސަރުކާރަކީ އަމިއްލަ ވާރުތަ މުދާ ކަމުގައި: ޝާތިރު
ރައީސް މުއިއްޒަކީ ރާއްޖޭގެ ތާރީޚުގައި މިހާތަނަށް ދުއް އެންމެ ގިނައިން ދޮގު ހެއްދެވި ބޭފުޅާ
އެމްޑީޕީގެ ޤައުމީ މަޖިލީހުގެ މެމްބަރު އަދި ކުޑަހުވަދޫ ދާއިރާގެ ރައީސް ޝާތިރު އަބްދުއްރަޙުމާން: ވިދާޅުވީ ރައީސް މުއިއްޒު މިހާތަނަށް އެންމެ ތެދެއްވެސް ހައްދަވާފައި ނުވާކަމަށް
ރައީސް ޑރ މުހައްމަދު މުއިއްޒު ވެރިކަމަށް ވަޑައިގަތްތާ ދެ އަހަރު ވެގެން ދާއިރުގައި މިހާތަނަށް އެންމެ ތެދެއްވެސް ހައްދަވާފައި ނުވާ ކަމަށާއި ހައްދަވާފައި ހުރީ ހުސް ބުހުތާނު ދޮގު ކަމަށް އެމްޑީޕީގެ ޤައުމީ މަޖިލީހުގެ މެމްބަރު އަދި ކުޑަހުވަދޫ ދާއިރާގެ ރައީސް ޝާތިރު އަބްދުއްރަޙުމާން ވިދާޅުވެއްޖެއެވެ.
ޝާތިރު މިފަދައިން ވިދާޅުވީ އަންނަ ނޮވެމްބަރު މަހުގެ 17 ގައި އެމްޑީޕީން ބާއްވަން ރާވާފައިވާ ބޮޑު އެއްވުމަށް ތައްޔާރުވުމުގެ ގޮތުން ހޮނިހިރު ދުވަހުގެ ރޭ ހުޅުމާލޭގައި ބޭއްވި ކަންމަތީ އެއްވުމުގައި ވާހަކަދައްކަވަމުންނެވެ.
ޝާތިރު ވިދާޅުވީ ރައީސް މުއިއްޒު އަކީ ރާއްޖޭގެ ތާރީޚުގައި މިހާތަނަށް ދުއް އެންމެ ގިނައިން ދޮގު ހައްދަވާ ބޭފުޅާ ކަމަށެވެ.
އެގޮތުން ވެރިކަމަށް އަންނަން ވެސް ރާއްޖޭގެ ރައްޔިތުންނަށް އެކި ކަހަލަ ބޮޑެތި ވައުދުތައްވެ، ހެއްދެވީ ކަނޑައެޅިގެން ދޮގު ކަމަށާއި އަދި ވެރިކަމަށް ވަޑައިގެންފަހުން މިއަދާއި ހަމައަށް ވެސް ހައްދަވަމުން ގެންދަވަނީ ބުހުތާނު ދޮގު ކަމަށެވެ.
ލޯކަލް ކައުންސިލް އިންތިޙާބާއި ދިމާކޮށް ވަކި ބަޔަކަށް ނޫނީ ސަރުކާރުގެ ވަޒީފާތައް ނުދިނުމަށް ސަރުކާރުގެ ވެރިން ވިދާޅުވަމުން ގެންދާކަން ފާހަގަކުރައްވައި ޝާތިރު ވިދާޅުވީ ވެރިކަމަށް އާދެވުމުން ރައީސް މުއިއްޒަށާއި ޕީއެންސީގެ މަޖިލިސް މެމްބަރުންނަށް ހީވެފައި އޮތީ ސަރުކާރަކީ އެބޭފުޅުންގެ މިލިކިއްޔާތެއް ކަމުގައި ކަމަށެވެ. އަދި ސަރުކާރުގެ މުދަލަކީ އެ ބޭފުޅުންގެ އާއިލާތަކަށް ވާރުތަވާ، އަމިއްލަ ތަރިކަ މުދާގަނޑެއް ކަމަށް އެ ބޭފުޅުންނަށް ހީވެފައި އޮންނަ ކަމަށް ވެސް އޭނާ ވިދާޅުވި އެވެ.
ޝާތިރު ވިދާޅުވީ ސަރުކާރުގެ މުދަލާއި ސަރުކާރުގެ މުއައްސަސާތަކަކީ އަމިއްލަ ވާރުތަ މުދާކަމަށް ދެކި ވަކި ބަޔަކަށް ވަޒީތާތައް ބަހަން ބުނާ ބަޔެއްގެ ހިތުގައި ރައްޔިތުންނާއި މެދު އެއްވެސް އޯގާތެރިކަމެއް ކުލުނެއް ނުހުންނާނޭ ކަމަށެވެ. އަދި އެފަދަ ބޭފުޅުން ރައްޔިތުންގެ ހައްގުގައޭ ވިދާޅުވެ ވާހަކަދައްކަން ލަދުގަންނަން ޖެހޭނޭ ކަމަށް ވެސް އޭނާ ވިދާޅުވި އެވެ.
އެބޭފުޅުންނަށް ވިސްނިވަޑައިގަންނަވަނީ ސަރުކާރަކީ، ދައުލަތަކީ ތިމަންނަމެންގެ މިލްކިއްޔާތެއް ކަމަށް. އެހެންވެގެން މި ވިދާޅުވަނީ ދައުލަތުން ދޭ އެއްވެސް ޚިދުމަތެއް، ދައުލަތުން ދޭ އެއްވެސް އެހީއެއް، ދައުލަތުން ކޮށްދޭ އެއްވެސް ކަމެއް ކޮށްދީގެން ނުވާނޭ ލޯކަލް ކައުންސިލް އިންތިޚާބުގެ ވޯޓު ނުލިބޭ ގޮތަކަށް ބޮޑެތި އާއިލާތަކަށް ބަލައިގެން ނޫނީ. މި ހީވަނީ މި މީހުންގެ އާއިލާގެ މުދާ ބަހައިގެން، އެ މުދާ ވާރުތަވާ ގޮތަށް، ވާރުތަވާ އެއްޗެއް ކަމަށް ޕީއެންސީ މެމްބަރުންނަށް ދައުލަތުގެ މުދަލަކީ، ދައުލަތުގެ ވަސީލަތްތަކަކީ، ދައުލަތުގެ މުއައްސަސާތަކަކީ، މި މީހުންނަށް ހީވަނީ މިއީ އެމީހުންގެ އައިލާތަކަށް ވާރުތަވާ ތަރިކަ މުދާހެން. މި ލެވެލް އަށް މިހާރު ޕީއެންސީ މެމްބަރުންގެ ވިސްނުން ގޮސްފި. ދެން މި މީހުންނަށް ރައްޔިތުންގެ ދިފާއުގައި ދެއްކޭނީ ކޮން ވާހަކައެއް. ކޮށްދެވޭނީ ކޮން ކަމެއް.އެމްޑީޕީގެ ޤައުމީ މަޖިލީހުގައި ކުޑަހުވަދޫ ދާއިރާގެ ރައީސް ޝާތިރު އަބްދުއްރަޙުމާން
ޝާތިރު ވިދާޅުވީ މިހާރު ވެސް ރައީސް މުއިއްޒު ރަށްރަށަށް ވަޑައިގެން ފޮނި ކެނޑުން ފިޔަވައި އިތުރުކަމެއް ނުކުރެވޭ ކަމަށެވެ. އަދި މި ސަރުކާރަށް އަދި މިހާތަނަށް ކުރެވުނު ހަމަ އެކަނި ކަމަކީ ހަމަ އެކަނި ދޮގުހެދުމާއި ވައްކަން ކުރުން ކަމަށް ވެސް އޭނާ ވިދާޅުވި އެވެ.
ރައީސް މުއިއްޒު ވެރިކަމަށް ވަޑައިގަންނަވަން ވެގެން ރިޔާސީ އިންތިޚާބުގެ ކެމްޕޭނުގެ ތެރޭގައި ރައްޔިތުންގެ ގާތަށް ވަޑައިގެން ރަސްމާލެ އެންމެ އަށް މަސް ދުވަހުގެ ތެރޭގައި އެއްކޮށް ހިއްކާ ނިންމާލާނޭ ކަމަށް ވިދާޅުވިކަން ފާހަގަކުރައްވައި ޝާތިރު ވިދަޅުވީ ރައީސް މުއިއްޒު އަކީ ވެރިކަމަށް ވަޑައިގަތުމުގެ ކުރިން ވެސް އަދި ވެރިކަމަށް ވަޑައިގެން ފަހުން ވެސް ތެދެއް ހައްދަވާފައިވާފައި ބޭފުޅެއް ނޫން ކަމަށެވެ. އަދި މިހާރު ވެސް ރައީސް މުއިއްޒު ގެންދަވަނީ ބުހުތާނު ދޮހު ހައްދަވަމުން ކަމަށް ވެސް އޭނާ ވިދާޅުވި އެވެ.
ޝާތިރު ވިދާޅުވީ މިއަދު ގައުމުގެ ރައްޔިތުން އަތްއުރާލައިގެން ތިބެގެން ވާން ނެތް ކަމަށާއި މިހާރު ވެރިކަމުގައި ހުންނެވި ދޮގުހައްދަވާ ރައީސް މުއިއްޒު ވެރިކަމުން ބާލަން ޖެހޭ ކަމަށެވެ. އެހެން ކަމުން ނޮވެމްބަރު މަހުގެ 17 ވަނަ ދުވަހު އޮންނަ ބޮޑު އެއްވުމުގައި ހުރިހާ ރައްޔިތުން ވެސް ބައިވެރިވުމަށް ޝާތިރު ވަނީ ގޮވާލައްވާފަ އެވެ.
