އޮކްޓޯބަރު 3 ވަނަ ދުވަހުގެ ރޭ މާލޭގައި އެމްޑީޕީ އިން 'ލޫޓުވައިފި، ލޫޓުވައިފި' ނަމުގައި ބޭއްވި ބޮޑު މުޒާހަރާ އަށް ދިޔަ ބައެއް ފަރާތްތަކަށް ފުލުހުން ޗިޓު ފޮނުވަން ފަށައިފިއެވެ.

ފޮނުވާ ޗިޓުގައި އޮންނަނީ، 2025 އޮކްޓޯބަރު 03 ވަނަ ދުވަހުގެ ރޭގެ ވަގުތެއްގައި ސުލްހަވެރިކަމާއެކު އެއްވެ އުޅުމުގެ މިނިވަންކަމުގެ ގާނޫނާ ޚިލާފަށް މާލޭގެ އެކި ސަރަހައްދުގެ މަގުތަކަށް އެއްވެ، އަޑުގަދަ ކޮށް، މުޒާހަރާ ކޮށް އާންމު ދަތުރުފަތުރު ކުރުމަށާއި އާއްމު ވިޔަފާރިތަކަށް ދަތިވާނެހެން ހަރަކާތްތެރިވެ ފުލުހުންގެ ދައުރު އަދާކުރުމަށް ހުރަސް އަޅައި ފުލުހުންގެ އަމުރަށް ނުކިޔަމަންތެރިވެ، ފުލުހުންގެ ވާޖިބަށް ހުރަސް އަޅާފައިވާ ކަމަށް ތުހުމަތު ކުރެވޭ މައްސަލައިގައި ތަހުގީގައް ބަޔާން ނެގުމަށާއި އަދި ވީޑިއޯ ކޮމްޕެރިސަން ސާމްޕަލް ފޮޓޯ ނެގުމަށް ފުލުހަށް ހާޒިރު ވުމަށް އަންގާ ކަމުގައެވެ.

ގާނޫނު އަސާސީ އިން ލިބިދޭ ހައްގުގެ ދަށުން އެތައް ހާސް ދިވެހި ރައްޔިތުން އެއްވި މި މުޒާހަރާ އިން 8 މީހުން ހައްޔަރު ކޮށް އޭގެ ތެރެއިން 6 މީހުންގެ ޖަލުގައި 15 ދުވަސް ވަންދެން ބަންދުކޮށްގެން ގެންގުޅުމަށް ފަހު އެމީހުން ކޯޓުން ދޫކޮށްލީ މިދިޔަ އާދީއްތަ ދުވަހުއެވެ.

އިންޑިއާ އާ މެދު ދިވެހި ރައްޔިތުންގެ ހިތުގައި ނަފްރަތު އުފެއްދުމުގެ ގޮތުންނާއި، އޭރު އޮތް ސަރުކާރާ ބެހޭ ގޮތުން އެއްވެސް ހަގީގަތެއް ނެތި ދޮގުވާހަކަތައް ފެތުރުމަށް ކޮވިޑްގެ ނުރައްކާތެރި ހާލަތުގައ ވެސް އެޗްޕީއޭ ގެ އެންގުންތަކާ ޚިލާފަށް މާލޭގެ މަގުތަކުގައި އެތައް މުޒާހަރާ އެއް ކުރި މީހުން މިއަދު ސަރުކާރުގައި ތިބި އިރު، ރައްޔިތުންގެ ކަންބޮޑުވުންތަކަށް އަޑު އުފުލުމަށް ސުލްހަވެރިކަމާ އެކު މިހާރު އިހުތިޖާޖު ކުރާ ކޮންމެ ފަހަރަކު އެތައް ބަޔަކު ފުލުހަށް ހާޒިރު ކޮށް ރައްޔިތުންނަށް ފުލުހުން މެދުވެރިކޮށް ބިރުދެއްކުން މިހާރު ވަނީ އާންމު ކަމަކަށް ވެފައެވެ. އޭރުގެ މުޒާހަރާ ތަކުގައި މަގުތަކަށާއި ޖުމްހޫރީ މައިދާނަށް އެއްވި ފަރާތްތައް މިއަދު ތިބީ ސަރުކާރުގެ އެކިއެކި ބޮޑެތި މަގާމުތަކުގައިކަން ފާހަގަ ކުރެވެއެވެ. ޚުދު ރައީސް މުއިއްޒު އަކީ ވެސް މުޒާހަރާ ތަކުގައި މަގުތަކުގައި އުޅުއްވި ފަރާތެއްކަން ފާހަގަ ކުރެވެއެވެ. އޭރުވެސް މިހާރު ވެސް އަމަލު ކުރަމުންދަނީ އެއް ގާނޫނަކަށް ކަން ވެސް ފާހަގަ ކުރެވެއެވެ.

އޮކްޓޯބަރު 3 ގެ މުޒާހަރާ ރޫޅާލުަމަށް ފުލުހުން މެދުވެރިކޮށް ސަރުކާރުން އަމަލު ކޮށްފައިވާ ގޮތުންނާއި ބޭނުން ކޮށްފައިވާ ގެއްލުން ބޮޑު ހަތިޔާރުގެ ސަބަބުން ފުލުހުންނަށް ވަރަށް ބޮޑަށް ފާޑު ކިޔުން ވަނީ އަމާޒު ވެފައެވެ. އެ މުޒާހަރާ ގައި އާންމުންގެ ތެރޭގައި ބޭނުން ކުރުން މަނާ ސޮނިކް ޑިވައިސް ބޭނުން ކުރުން ހައްގުތަކަށް މަސައްކަތް ކުރާ ބޭރުގެ ބައެއް ޖަމްއިއްޔާތަކުން ވެސް ވަނީ ކުށްވެރި ކޮށްފައެވެ.