ފޭސްބުކްގައި ޒާޔާ ކުރި ޕޯސްޓްގެ މައްސަލަ ބަލަނީ ވައްކަމާއި ޚިޔާނާތުގެ މައްސަލަ ބަލާ ޑިޕާޓްމަންޓުން!
ފުލުހުން ވަނީ ތަފާތު ތިން މައްސަލަ އެއްގައި ފުލުހުންގެ އިދާރާ ހާޒިރުވުމަށް ޒާޔާ އަށް އަންގާފައި
އެމްޑީޕީގެ ގައުމީ މަޖިލީހުގެ މެމްބަރު ފާތިމަތު ޒަހިއްޔާ (ޒާޔާ) ރާއްޖެޓީވީ އަށް އިންޓަރވިއު ދެއްވަނީ 21.10.2025
ފޭސްބުކްގައި އެމްޑީޕީގެ ގައުމީ މަޖިލީހުގެ މެމްބަރު ފާތިމަތު ޒަހިއްޔާ (ޒާޔާ) ކުރި ޕޯސްޓުގެ މައްސަލަ ބަލަނީ ވައްކަމާއި ޚިޔާނާމުގެ މައްސަލަ ބަލާ ޑިޕާޓްމަންޓުން ކަމަށް ޒާޔާ ހާމަ ކޮށްފިއެވެ.
ރާއްޖެޓީވީ އަށް ދިން ބަސްތީގަތުމެއްގައި ޒާޔާ ހާމަ ކުރި ގޮތުގައި ފުލުހުން ވަނީ ތަފާތު ތިން މައްސަލަ އެއްގައި ފުލުހުންގެ އިދާރާ ހާޒިރުވުމަށް ޒާޔާ އަށް އަންގާފައެވެ. އޭގެ ތެރެއިން އަންގާރަ ދުވަހު ޒާޔާ އަށް ފުލުހުން ފޮނުވި ޗިޓުގައި އަންގާފައި ވަނީ ބުރާސްފަތި ދުވަހުގެ މެންދުރު 11:00 އަށް، ގަލޮޅު ޕޮލިސް ސްޓޭޝަނަށް ހާޒިރު ވުމަށެވެ. ބުރާސްފަތި ދުވަހު އޭނާ ފުލުހުންގެ އިދާރާ އަށް ހާޒިރުކުރަނީ "ލޫޓުވައިފި، ލޫޓުވައިފި" މުޒާހަރާގައި އަމުރަކަށް ނުކިޔަމަންތެރިވެ ޤަވާއިދާއި ޚިލާފު އަމަލުތަކެއް ހިންގި ކަމަށް ތުހުމަތުކޮށެވެ.
މީގެ އިތުރުން އިތުރު ދެ މައްސަލަ އެއްގައި އޭނާ ފުލުހުންގެ އިދާރާ އަށް ހާޒިރުކުރާނެކަން އޭނާ އަށް ފުލުހުން ވަނީ އަންގާފައެވެ. ޒާޔާ އަށް ފުލުހުން ފޮނުވާފައިވާ ޗިޓުތަކުގެ ތެރޭގައި 7 އޮކްޓޯބަރގައި، ޒާޔާގެ ފޯނު އަތުލުމަށް ފަހު ބެލި ބެލުންތަކަށް ފަހުގައި ޒާޔާ ހާޒިރުކުރުމަށް ބޭނުންވާ ކަމަށް ބުނެ ފުލުހުން ފޮނުވާފައިވާ ޗިޓެއް ހިމެނެއެވެ.
"އެންމެ ހެއްވާ ކަމަކީ ޗިޓުގައި މި އޮންނަނީ ފޭސްބުކްގައި ކުރި ޕޯސްޓުގެ މައްސަލަ ބަލާ ޑިޕާޓްމެންޓަކީ ވައްކަމާއި ޚިޔާނާތުގެ ޑިޕާޓްމެންޓް ކަމަށް. މީގެ އިތުރުން ބުރާސްފަތި ދުވަހު ފުލުހަށް ހާޒިރުވާން އަންގާ ފޮނުވި ޗިޓުގައި އެބަ އޮވޭ އިތުރު ތަހުގީގުކުރަން ސީސީ ޓީވީ އާއި ކޮމްޕެއަރކުރަން ފޮޓޯ އާއި ވީޑިއޯ ނަގާނެ ކަަމަށް. ކޯޓު އަމުރެއް ނުލިބޭ. އެހެންވީމަ އަޅުގަނޑު އެއްބާރުލުން ދޭނީ ކޯޓު އަމުރެއް އެކަމަށް އޮވެގެން." ޒާޔާ ވިދާޅުވިއެވެ.
ހަމަ އެހެންމެ ރަނގަޅު ޒޯންގައި ޕާކް ކޮށްފައި ހުއްޓާ އޮޅިގެން ކަަމަށް ބުނެ ޒާޔާގެ ސައިކަލު ފުލުހުން ގެންދިޔަ މައްސަލަ އެއް ވެސް ވަނީ ފެންމަތިވެފައެވެ. ޒާޔާ ބުނީ ސައިކަލު ގެންދިޔައީ ސިސްޓަމްގެ މައްސަލަ އަކުން ކަމަށް ފުލުހުން އޭނާ އަށް އަންގާފައިވާ ކަމަށެވެ.
އުސޫލާއި ޚިލާފަށް އޭނާގެ ސައިކަލު ޓޯޔަރޑަށް ގެންދިއުމަކީ އޭނާ އަށް ކުރި ފުރައްސާރަ އެއް ކަމަށް ޒާޔާ ވަނީ ސިފަކޮށްފައެވެ. ސައިކަލު ގެންދެވުނީ އޮޅުމަކުން ކަމަށް ބުނި ނަމަވެސް ފުލުހުންގެ އިދާރާ އަށް ހާޒިރުވެގެން ގަޑި އެއްހާ އިރު ވީ އިރުވެސް ފުލުހުންގެ ފަރާތުން އެއްބާރުލުމެއް ނުލިބުނު ކަން ޒާޔާ ފާހަގަ ކުރިއެވެ. ސައިކަލް އޮޅިގެން ގެންދެވުނު ކަމަށް ބުނުމުން އެއީ ޖޯކެއް ކަމަށް ޒާޔާ ސިފަކުރިއެވެ.
"ދެ ތިން ރެ އެއް ކުރިން ގޭ ދޮރު މަތިން ސައިކަލު ނަގައިފި. އެ ބޭފުޅުން ވިދާޅުވި ދާނެ ގޮތެއް ނެތިއްޔާ ފުލުހުންގެ ވެހިކަލްގައި ސައިކަލު ބަލާ ގެންދާނަމޭ. އައިއޯ އަށް ގުޅާފަ ދާނެ ގަޑި ހިއްސާކޮށްފަ އަޅުގަނޑު ގޮސްފިން. ދެން އެތަނަށް ދިޔައީމަ މި ބުނަނީ އެއީ ސިސްޓަމްގެ މައްސަލައެކޭ. އަޅުގަނޑު ބުނިން ތިއީ އަޅުގަނޑުގެ މައްސަލަ އެއް ނޫނޭ. ސައިކަލު ގެންދިޔަ ގޮތަށް އަނބުރާ ގެނެސްދެއްވާށޭ. އެހާވެސް ޖެއްސުން ބޮޑުކޮށް މި ބޭފުޅުން ކަންކަން މި ކުރައްވަނީ."
އޮޅިގެން އެފަދަ ކަމެއް ކުރެވުމަކީ ބަލައިގަނެވޭ ކަމެއް ނޫން ކަމަށް ޒާޔާ ބުނެފައިވެއެވެ. ފުލުހުންނަށް އޮޅިގެން ކަމެއް ވުމަކީ ވަރިހަމަ ކަމެއް ކަމަށް ނުބެލެވޭނެ ކަން ވެސް ޒާޔާ ފާހަގަ ކުރިއެވެ.
"މިދިޔަ ދެ ދުވަސް މިދިޔައީ ފުލުސް ސްޓޭޝަންގައި، އެންމެ ބުއްދިވެރިގޮތަކަށް މިހާރު މިހާރު އަޅުގަނޑު އެބަ ހިތަށް އެބަ އަރާ ފޮށި ތަންމަތި ބަނދެގެން ގޮސް ފުލުސް ސްޓޭޝަންގައި މަޑުކޮށްލާނަމޭ. އެއީ މި ބޭފުޅުން އިރުއިރުކޮޅާ އެތަނަށް ދިއުމަށް ވުރެ ފަސޭހަ."
ބިރު ދައްކާނަމޭ ހިތާ ކުރާ މިފަދަ ކަންކަމަުން ޒާޔާ ވެސް އަދި އެމްޑީޕީ ވެސް ފަހަތަށް ނުޖެހޭނެ ކަމަށް އޭނާ ވަނީ ފާހަގަކޮށްފައެވެ. އަދި މިއީ ނޮވެމްބަރ 17އިގައި މުޒާހަރާ ކުރުމަށް އެމްޑީޕީން ތައްޔާރުވާތީ ސަރުކާރު ބިރުން އުޅޭކަމުގެ ހެއްކެއް ކަމަށް ޒާޔާ ވަނީ ސިފަކޮށްފައެވެ.
