އައިކެއަރގެ ސްޓޫޑެންޓް އާޓް ކޮމްޕެޓިޝަނަށް ކުރެހުން ހުށަހެޅުމުގެ މުއްދަތު އިތުރުކޮށްފި
އައިކެއާގެ ސްޓޫޑެންޓް އާޓް ކޮމްޕެޓިޝަނަށް ކުރެހުން ހުށަހެޅުމުގެ މުއްދަތު 10 އޮކްޓޯބަރ 2025 އަށް އިތުރުކޮށްފި
އައިކެއާ އިން ކުރިޔަށްގެންދާ ކުރެހުމުގެ މުބާރާތާގުޅޭ ޕޯސްޓަރެއް
މި އަހަރުގެ ވާރލްޑް ސައިޓް ޑޭ ފާހަގަކުރުމުގެ ގޮތުން އައިކެއާއިން ކުރިއަށްގެންދާ ސްޓޫޑެންޓް އާރޓް ކޮމްޕެޓިޝަނަށް ކުރެހުން ހުށަހެޅުމުގެ މުއްދަތު އިތުރުކޮށްފިއެވެ. އެގޮތުން މުބާރާތަށް ކުރެހުން ހުށަހެޅުމުގެ ސުންގަޑި ވަނީ 10 އޮކްޓޯބަރ 2025 ވާ ހުކުރު ދުވަހުގެ ނިޔަލަށް އިތުރުކޮށްފައެވެ.
އުމުރުން 11 އަހަރާއި 15 އަހަރާ ދެމެދުގެ ދަރިވަރުންނަށް ހުޅުވާލާފައިވާ މި މުބާރާތަކީ، ދިރިއުޅުމާއި މުޖުތަމައުގެ ތަސައްވުރާއި ލޮލުގެ ސިއްހަތުގެ މުހިންމުކަން ހާމަކޮށްދިނުމަށް ބާއްވާ މުބާރާތެކެވެ.
މުބާރާތުގައި ބައިވެރިވާ ދަރިވަރުންނަށް ދެ ތީމަކުން އެއް ތީމެއް ޚިޔާރުކުރެވޭނެއެވެ. އެއީ އަމިއްލަ ލޮލުގެ ދުޅަހެޔޮކަމަށް ލޯބިކުރުމުގެ ތީމާއި، ލޮލުގެ ދުޅަހެޔޮކަމަށް ކުރާ މަސައްކަތުގައި ފަރުދުންނާއި މުޖުތަމައު އިސްކުރުމުގެ މުހިންމުކަން ރަމްޒުކޮށްދޭ ތީމެވެ.
މުބާރާތުގައި ބައިވެރިވާ ފަރާތްތަކުން އޭ4 ސައިޒުގެ ކެންވަސް ނުވަތަ ކަރުދާހުގައި، އަތުން ކުރަހައި ނުވަތަ ކުލަޖަހައިގެން ތައްޔާރުކުރާ އާޓްވާރކް ހުށަހެޅިދާނެއެވެ. ނަމަވެސް ޑިޖިޓަލް އާޓްވާރކް ބަލައެއް ނުގަނެވޭނެއެވެ. މާލޭގައި ދިރިއުޅޭ ބައިވެރިން އޯކިޑް މަގުގައި ހުންނަ އައިކެއަރ މައި ބިލްޑިންގއަށް އަސްލު އާޓްވާރކް ހުށަހެޅޭނެއެވެ. އަތޮޅުތެރޭގެ ބައިވެރިންނަށް އާޓްވާރކްގެ ސާފު ފޮޓޯ ސްކޭންކޮށް އީމެއިލް މެދުވެރިކޮށް ނުވަތަ އެންމެ ކައިރީގައި ހުންނަ އައިކެއަރ ފިހާރައަކަށް ހުށަހެޅިދާނެއެވެ.
އައިކެއަރ އިން ބުނީ ހުރިހާ ހުށަހެޅުމެއްގައި ވެސް، ބައިވެރިޔާގެ ފުރިހަމަ ނަމާއި، އުމުރާއި، އައިޑީކާޑު ކޮޕީއާއި ސްކޫލް ނަމާއި ގްރޭޑާއި، ބެލެނިވެރިޔާއަށް ގުޅޭނެ ނަންބަރާއި އީމެއިލް އަދި ކުރެހި ތީމް ލިޔެފައި އޮންނަން ވާނެ ކަމަށެވެ.
މުބާރާތް ކުރިއަށްދާނީ ދެ ބުރަކަށް ބަހާލައިގެންނެވެ. ފުރަތަމަ ބުރުގައި އޮންލައިން ވޯޓިންގ މެދުވެރިކޮށް އާންމުންނަށް ވޯޓުލުމުގެ ފުރުސަތު ދެވޭނެއެވެ. އެންމެ ގިނަ ވޯޓު ލިބޭ އާޓްވޯކްތައް ފައިނަލް އެގްޒިބިޝަނަށް ޝޯޓްލިސްޓް ކުރެވޭނެއެވެ. ދެވަނަ ބުރުގައި މާލޭގެ އާޓިފިޝަލް ބީޗުގައި ބާއްވާ ވާރލްޑް ސައިޓް ޑޭ އިވެންޓުގައި މައުރަޒެއް ބޭއްވޭނެއެވެ.
މުބާރާތުގެ އެއްވަނައަށް 5,000 ރުފިޔާ، ދެވަނައަށް 3,000 ރުފިޔާ އަދި ތިންވަނައަށް 2,000 ރުފިޔާގެ ފައިސާގެ އިނާމު ހުށަހެޅިފައިވެއެވެ. އަދި ޝޯޓްލިސްޓް ކުރެވޭ ހުރިހާ ބައިވެރިންނަށް ސެޓްފިކެޓް ދެވޭނެއެވެ.
އައިކެއަރ އިން ބުނީ މި މުބާރާތުގެ ތެރެއިން ކުޑަކުދިންނަށް، ލޮލުގެ ސިއްހަތާ މެދު ފުންކޮށް ވިސްނައި، އުފެއްދުންތެރިކަން ފާޅުކުރުމުގެ ފުރުސަތު ލިބިގެންދާނެ ކަމަށް އުންމީދުކުރާ ކަމުގައެވެ.
