ރާއްޖޭގެ މުނިފޫހިފިލުވުމުގެ ދާއިރާގައި ހަރަކާތްތެރިވާ ފަރާތްތަކަށް ހާއްސަ ކޮށްގެން  މިނިސްޓްރީ އޮފް އާޓްސް، ކަލްޗަރ އެންޑް ހެރިޓޭޖް އިން ކުރިއަށް ގެންދާ ''ފަންނާނުންގެ ފޯރަމް'' ސިލްސިލާގެ ތިންވަނަ ފޯރަމް ބާއްވައިފިއެވެ.  

ބުރާސްފަތި ދުވަހުގެ ރޭ ޝީ ބިލްޑިންގް ގައި ކުރިއަށް ގެންދިޔަ މި ފޯރަމް ހާއްސަ ކޮށްފައިވަނީ ވިޝުއަލް އާޓްސް ދާއިރާގައި ހަރަކާތްތެރިވާ ފަރާތްތަކަށެވެ.

 މި ފޯރަމްގައި ފޮޓޯގްރާފަރުން، އަތްތެރި މަސައްކަތުގައި ހަރަކާތްތެރިވާ ފަރާތްތަކުގެ އިތުރުން ގްރެފިކް ޑިޒައިނަރުން ވެސް ވަނީ ބައިވެރިވެ، އެ ފަރާތްތަކަށް  ދިމާވެފައިވާ މައްސަލަތައް ހިއްސާ ކޮށްފައެވެ.

 ފޯރަމްގައި ބައިވެރިވި ގިނަ ފަރާތްތަކުން އެންމެ ބޮޑަށް ކަންބޮޑުވުން ފާޅުކޮށްފައި ވަނީ އެ ދާއިރާގައި މަސައްކަތް ކުރާ ފަރާތްތަކަށް ލިބޭ ފުރުސަތުތައް މަދުކަމާއި ގުޅޭގޮތުންނެވެ. މީގެ އިތުރުން ވޭތުވެދިޔަ ސަރުކާރުން އާޓްސްގެ ދާއިރާ އަށް އެއްވެސް ކަހަލަ އެހީތެރިކަމެއް ދީފައި ނުވާ ކަމަށާއި، އެކަމުގެ ސަބަބުން ދާއިރާ އަށް ވަރަށް ބޮޑު ހީނަރުކަމެއް ލިބެމުންދާ ކަމަށް ބުނެ، ބައެއް ފަރާތްތަކުން ވަނީ ކަންބޮޑުވުން ފާޅުކޮށްފައެވެ.  

ފޯރަމްގައި ބައިވެރިވި މޯލްޑިވިއަން އާޓިސްޓް ކޮމިއުނީޓިގެ ޗެއާމަން މައިމުނާ ބުނީ، ރާއްޖޭގެ ކުރެހުންތެރިންގެ ކުރެހުންތައް ބޭރު ގައުމުތަކަށް ފޮނުވޭނެ ގޮތް ހަމަޖައްސަން ޖެހޭ ކަމަށާއި، ރާއްޖެ މުޅި ދުނިޔެ އަށް ހުޅުވާލެވިފައިވާއިރު ރާއްޖޭގެ ކުރެހުންތެރިންގެ ކުރެހުންތައް ވެސް ރާއްޖޭގެ ޓޫރިޒަމްއެކޭ އެއްފަދައިން މާކެޓް ކުރެވެން ޖެހޭ ކަމަށެވެ.  އަދި އެފަދަ ފުރުސަތެއް ލިބުން އެއީ މުހިއްމު ކަމެއް ކަމަށް ވެސް އޭނާ ބުންޏެވެ. 

''ބޭރު ތަންތަން އާޓިސްޓުންގެ މައުލޫމާތު އަޅުގަނޑުމެންނަށް މި ލިބެނީ  ފޮތްތަކުގެ ޒަރިއްޔާއިން މެގަޒިންސް، އާޓިކަލްސް، އީބުކްސް، އިންޓަރނެޓް........ އެކަމަކު އަޅުގަނޑުމެންގެ ކުރެހުންތައް ބޭރު އާޓިސްޓުންނާ ހިސާބަށް ފޯރާ ބާވައޭ. ކިހިނެއްހޭ ފޯރާނީ.. މިރާއްޖޭގައި އާޓްސާކަލް އަސްލު ފުރިހަމައެއް ނޫން.'' އޭނާ ބުންޏެވެ.

   މަޝްހޫރު ފޮޓޯގްރަފާ ނިޝާން (މިލް ޒީރޯ) ވަނީ ފޮޓޯގްރާފަރުންގެ ހުރި ގޮންޖެހުންތައް ފޯރަމްގައި ހިއްސާ ކޮށްފައެވެ.  ނިޝާން ބުނީ، ޕާކް ކަހަލަ ތަންތަނުގައި ފޮޓޯ ނަގާއިރު ޗާޖްކުރާ ފީ ކުޑަކުރަން ޖެހޭ ކަމަށެވެ. އަދި މިހާރު ނަގަމުންދާ ފީއަކީ ލިބޭ އާމްދަނީއަށް ވުރެ ވެސް ބޮޑު އަދަދެއް ކަމަށެވެ.

 ''ޕާކެއްގަ ފޮޓޯ ނަގަންޏާ އަޅުގަނޑުމެން ފޮޓޯ ސެޝަންއަށް ވުރެ ބޮޑު އަގެއް އެބަޖެހޭ ޕާކަށް ދޭން. އެހްންވީމަ އެކަންތައްތައް. އަޅުގަނޑަށް ހީވަނީ އެޕާކުގެ ރީތިކަން ވެސް ވަރަށް ބޮޑަށް ފެނިގެންދޭހެން.'' ނިޝާން ބުންޏެވެ.  

ރާއްޖޭގައި ފޮޓޯގްރާފަރުންގެ ގޮތުގައި ބިދޭސީން މަސައްކަތް ކުރަމުންދާ ކަމުގެ ޝަކުވާ ސޯޝަލް މީޑިއާގައި މީގެ ކުރިން ވަނީ ފެންމަތިވެ، އެދާއިރާގައި ހަރަކާތްތެރިވާ ދިވެހިން އެކަމާއި މެދު ކަންބޮޑުވުންފާޅު ކޮށްފައިވާއިރު، ފޯރަމް ގައި ބައިވެރިވި ފަރާތްތަކުން ވަނީ އަދި ވެސް ގިނަ ބިދޭސީންތަކެއް ރިސޯޓްތަކުގައި ފޮޓޯގްރާފަރުންގެ ގޮތުގައި މަސައްކަތްކުރާ ކަމަށް ބުނެފައެވެ. މި ފޯރަމްގައި ބައިވެރިންގެ އަޑުތައް އެހުމަށް ފަހު ހެރިޓޭޖް މިނިސްޓްރީގެ ސްޓޭޓް މިނިސްޓަރު މުހައްމަދު ތޯރިގް ވިދާޅުވީ، އާޓްސްގެ ދާއިރާ އަށް ދިމާވެފައިވާ ދަތިތައް ހައްލު ކުރެވޭނީ ފަންނާނުންގެ އެހީތެރިކަމާއި އެކު ކަމަށެވެ.

އަދި އެކަމަށް އެފާރާތްތަކުގެ ފުރިހަމަ އެއްބާރުލުން ބޭނުންވާ ކަމަށްވެސް އޭނާ ވިދާޅުވިއެވެ. ހެރިޓޭޖް މިނިސްޓްރީ އަކީ ރާއްޖޭގައި އޮތް އެންމެ ''ސަޅި'' މިނިސްޓްރީ ގޮތަށް ތޯރިގް ވަނީ ސިފަކޮށްފައެވެ. 

 ''މީ ހަގީގަތުގައި ވަރަށް ސަޅި މިނިސްޓްރީއެއް. ވަރަށް ސަޅި ދާއިރާއެއް މީ. އަޅުގަނޑު ގަބޫލުކުރާ ގޮތުގައި މީ ރާއްޖޭގައި އޮތް އެންމެ ވަރުގަދަ އެންމެ ސަޅި ދާއިރާ އެންމެ ރަނގަޅު މިނިސްޓްރީ. މި މިނިސްޓްރީ ވަރުގަދަވެގެން ދަނީ. މި ދާއިރާ ރަނގަޅު ވެގެންދަނީ . ތިޔަ ހުރިހާ ބޭފުޅުންގެ އެއްބާރުލުމާއި އެހީތެރިކަމާއި އެކު. އެހެންނޫނިއްޔާ އަޅުގަނޑުމެން އެކަނި ކޮށްގެން ނުވާނެ. އަޅުގަނޑުމެން އެންމެން ވީމާ މިކަންތައް ކުރެވޭނެ ކަމުގެ ޔަގީކަން އެބައޮތް'' ތޯރިގް ވިދާޅުވިއެވެ.

ރާއްޖޭގައި ފުރަތަމަ ފަހަރަށް ފަންނާނުންގެ ދާއިރާގައި މަސައްކަތް ކުރާ ފަރާތްތަކަށް ފޯރަމެއް ބޭއްވުމުން އެކަމުން ދޭހަވަނީ އެމިނިސްޓްރީން ފަންނާނުންނަށް ދެމުން އަންނަ އަހައްމިއްޔަތުކަން ކަމަށް އޭނާ ވިދާޅުވިއެވެ. ފަންނާނުގެ ފުރަތަމަ ފޯރަމެކޭ އެއްގޮތަށް މި ފޯރަމްގައި ވެސް ގިނަ ފަރާތްތަކުން ވަނީ ނެޝަނަލް ސެންޓާ ފޯދަ އާޓްސް ( އެންސީއޭ) އަށް ފާޑުކިޔުންތައް އަމާޒުކޮށްފައެވެ.

 މި ފޯރަމްގައި ބައިވެރިވި ވިޝުއަލް އާޓިސްޓް އަލީ ފަތުހީ ވަނީ މިފޯރަމާއި މެދު އޭނާދެކޭ ގޮތް ރާއްޖެ.އެމްވީއާ ހިއްސާ ކޮށްފައެވެ.  

''މި ފޯރަމަކީ ވަރަށް މުހިއްމު ފޯރަމެކޭ. އަޅުގަނޑުމެން ކަހަލަ އާޓިސްޓުންގެ އާޓްތައް ކުރިއަރުވާ، ވިއްކާ. ސަރުކާރުގެ ފަރާތުން އަޅުގަނޑުމެންގެ އަޑުއަހާކަން އިނގޭ ފޯރަމެއްކަން މީ. އަޅުގަނޑު ގަބޫލްކުރާ ގޮތުން" އޭނާ ބުންޏެވެ. 

މި ފޯރަމްގައި ހެރިޓޭޖް މިނިސްޓަރ ޔުމްނާގެ އިތުރުން އެ މިނިސްޓްރީގެ އިސް ބޭފުޅުން ވެސް ބައިވެރިވެވަޑައިގެންނެވިއެވެ. މި ސަރުކާރުން ރައްޔިތުންގެ ކަންބޮޑުވުންތައް އަޑު އެހުމުގެ ގޮތުން ދަނީ ގިނަ ފޯރަމްތަކެއް ބާއްވަމުންނެވެ. އަދި އެ ފޯރަމް ތަކުގައި ގިނަ ބަޔަކު ދަނީ އެ ފަރާތްތަކަށް ދިމާވެފައިވާ ކަންތައްތައް ފާޅުކަން ބޮޑު ގޮތެއްގައި ހާމަކުރަމުންނެވެ.