ރާއްޖޭގެ ސިޔާސީ ލީޑަރުންތަކެއް ޖަލަށް ލުމަށް ކުރަންޖެހޭ މަސައްކަތްތައް ރޭވުން ތެރި ކަމާ އެކު ދަނީ ކުރަމުން: މެމްބަރު އައްބާސް

ރާއްޖޭގެ ސިޔާސީ ލީޑަރުންތަކެއް ޖަލަށް ލުމަށް ކުރަންޖެހޭ މަސައްކަތްތައް ރޭވުން ތެރި ކަމާ އެކު ކުރިއަށް ދާ ކަމަށް ވެލިދޫ ދާއިރާގެ މެމްބަރު މުހައްމަދު އައްބާސް ވިދާޅުވެއްޖެ އެވެ.

އެކްސް ގައި ކުރެއްވި ޕޯސްޓެއްގައި ބުދަ ދުވަހު އައްބާސް ވިދާޅުވީ، "ހުރިހާ ސިޔާސީ ލީޑަރުންނާ ޗެލެންޖުކޮށްފައި އަޅުގަނޑު މިދަންނަވަނީ ސިޔާސީ ލީޑަރުންތަކެއް ޖަލަށް ލާނެ!" ކަމަށެވެ.

އެކަން ކުރުމަށް އެއްވެސް ހުރަހެއް ނެތް ގޮތަށް ކުރަން ޖެހޭ އެންމެ ބޮޑު މަސައްކަތް މިހާރު ވަނީ ކޮށްފައި ކަމަށާއި، ދެން ކުރަން ޖެހޭ މަސައްކަތްތަށް ރޭވުންތެރިކަމާއެކު އެދަނީ ކުރަމުން ކަމަށް އައްބާސް ވިދާޅުވިއެވެ.

"ދުނިޔޭގައި ތިބި ބަޔަކަށް ލަސްތަކެއް ނުވެ ބޮޑު މަންޒަރު ފެނިވަޑައިގަންނަވާނެ..އިންސާފު ލިބޭނެ ހަމަ އެއްތަނެއްވެސް މިހާރަކު ނޯންނާނެ..އެއްބާރުން އަނެއް ބާރަށް ފާޑުކިޔާ, ޖަވާބުދާރީ ކުރުވާނެ އެއްވެސް ބާރެއް މިހާރަކު ނޯންނާނެ،" ކަމަށް އައްބާސް ލިޔުއްވާފައިވެއެވެ.

އައްބާސް އިތުރަށް ވިދާޅުވީ ރައްޔިތުން އަމިއްލައަށް ކެހިކަޑުލުގެ ހިތި ފިލުވަންޖެހިފައި ވަނީ ރައްޔިތުން ކަމަށެވެ.

ވެރިކަމަށް ވަޑައިގެންނެވި އިރު، ސިޔާސީ ހައްޔަރީން ނުތިބޭނެ ކަމަށް ރައީސް މުއިއްޒު ވިދާޅުވި ނަމަވެސް މިހާރުވެސް ޖަލުގައި އެއްވެސް ކުށެއް ނެތި 6 މީހުން ތިބީ ބަންދުކޮށްފައެވެ. އެމީހުން ޖަލުގައި ބަންދުކޮށްގެން ގެންގުޅެނީ، ގާނޫނޫ އަސާސީ އިން ލިބިދޭ ޚިޔާލުފާޅު ކުރުމާއި އެއްވެ އުޅުމުގެ ހައްގުގެ ދަށުން މިދިޔަ ހުކުރު ދުވަހުގެ ރޭ މާލޭގައި ބޭއްވި 'ލޫޓުވައިފި، ލޫޓުވައިފި' މުޒާހަރާ ގައި ބައިވެރިވެގެންނެވެ.