ލެކޯނޫގެ އިސްތިއުފާ އާއެކު، ފްރާންސްގެ ސިޔާސީ ހަލަބޮލިކަން އިތުރަށް ގޯސްވެއްޖެ

ފްރާންސްގެ ބޮޑު ވަޒީރު ކަމުގެ މަޤާމުގައި ހުންނެވި ސެބަސްޓިއަން ލެކޯނޫ އިސްތިއުފާ ދެއްވުމާ އެކު، އެ ޤައުމުގެ ސިޔާސީ މަސްރަހު އަނެއްކާ ވެސް އިތުރު ހަލަބޮލި ކަމެއްގެ ތެރެއަށް ވެއްޓިއްޖެ އެވެ.

ފްރާންސްގެ ރައީސް އިމަނުއެލް މެކްރޮން ވަނީ، އެ ޤައުމުގެ ބޮޑު ވަޒީރުގެ މަޤާމަށް މިދިޔަ ސެޕްޓެމްބަރު މަހުގެ ކުރީ ކޮޅު ލެކޯނޫ އައްޔަން ކުރައްވައިފަ އެވެ. ނަމަވެސް، ބޮޑު ވަޒީރު މަޤާމުގައި އެންމެ 27 ދުވަހު ހުންނެވުމަށް ފަހު، ހޯމަ ދުވަހު ލެކޯނޫ ވަނީ މަގާމުން އިސްތިއުފާ ދެއްވައިފަ އެވެ. އެއީ ފްރާންސްގެ އައު ސަރުކާރު އެކުލަވާލިތާ އެންމެ 14 ގަޑިއިރުގެ ތެރޭގަ އެވެ.

މެކްރޮންގެ ވެރި ކަމުގައި ޑިފެންސް މިނިސްޓަރުކަން ވެސް ކުރައްވާފައިވާ ލެކޯނޫ އަކީ މެކްރޮންގެ ވަރަށް އަރިސް ބޭފުޅެކެވެ. ކުއްލި ގޮތަކަށް ހޯމަ ދުވަހު އޭނާ އިސްތިއުފާ ދެއްވާފައިވާއިރު، އޭނާގެ ސަރުކާރުން އަމަލު ކުރާނެ ގޮތް ވެސް ހާމަ ކޮށްފައި ނުވެ އެވެ. ސަރުކާރުގެ ސިޔާސަތުތައް ޤާނޫނު ހަދާ މަޖިލީހުގައި ލެކޯނޫ ހާމަ ކުރައްވަން އޮތީ ވެސް އަންގާރަ ދުވަހު އެވެ.

ބޮޑު ވަޒީރު ކަމުން އިސްތިއުފާ ދެއްވި ސަބަބެއްގެ ގޮތުގައި ލެކޯނޫ ވިދާޅުވެފައި ވަނީ، އެހެނިހެން ސިޔާސީ ޕާޓީ ތަކާ މަޝްވަރާ ކުރެއްވުމަށް ފަހު، ބަޖެޓާއި ސިޔާސަތުތަކާ ގުޅޭ ގޮތުން އެއްބަސްވުމަކަށް ނާދެވި، ސެންޓަރ ރައިޓް މައިނޯރިޓީ ސަރުކާރު ހިންގުމަށް ވަރަށް ބޮޑަށް ދަތިވާތީ އެވެ. ލެކޯނޫގެ ކުރިން ބޮޑު ވަޒީރު ކަމުގައި ތިއްބެވި ފްރާންސުއާ ބެއިރޫ އަދި މިޝެލް ބާނިއޭ ވެސް އިސްތިއުފާ ދެއްވާފައި ވަނީ ބަޖެޓާ ގުޅޭ މައްސަލައިގަ އެވެ.

ފްރާންސްގައި މިހާރު އުފެދިފައި އޮތް ސިޔާސީ ހަލަބޮލި ކަމަކީ، މައިގަނޑު ގޮތެއްގައި ފްރާންސްގެ ރައީސް މެކްރޮން އަމިއްލަ އަށް ނިންމެވި ނިންމުމެއްގެ ސަބަބުން ކުރިމަތިވެގެން އުޅޭ ޙާލަތެއް ކަމަށް ތަޖުރިބާކާރުން ދެކެ އެވެ. އެގޮތުން ޤާނޫނު ހަދާ މަޖިލީހުގެ ބާރުތައް "ސާފު ކުރުމަށް" ކަމަށް ބުނެ މިދިޔަ އަހަރު ޤާނޫނު ހަދާ މަޖިލިސް އުވާލަން ނިންމި ނިންމުމަކީ އެކަމުގެ ފެށުން ކަމަށް ބުނެފައިވެ އެވެ. އޭގެ ފަހުން ބޭއްވި އިންތިޚާބުގައި އެއްވެސް ޕާޓީ އަކަށް ސާފު އަޣުލަބިއްޔަތު ލިބިފައި ނުވެ އެވެ.

ފްރާންސްގެ ރައީސް މެކްރޮން އަށް މިހާރު ކުރިމަތިވެފައިވާ އެންމެ ބޮޑު ގޮންޖެހުމަކީ ދެން ކުރިއަށް ދާނެ މަގެއް، ނުވަތަ ގޮތެއް ނިންމުމެވެ. މެކްރޮން އަށް މިހާރު އޮތް ހަމައެކަނި ގޮތަކީ، އަނެއްކާ ވެސް އައު ބޮޑު ވަޒީރެއް އައްޔަން ކުރެއްވުމެވެ. މިއީ ދެ އަހަރު ނުވަނީސް، ފްރާންސްގައި މެކްރޮންގެ ވެރިކަމުގައި އައްޔަން ކުރެވޭނެ ހަ ވަނަ ބޮޑު ވަޒީރަށް ވާނެ އެވެ.

ނުވަތަ ދެން މެކްރޮން އަށް އޮތް ގޮތަކީ އަނެއްކާ ވެސް ޤާނޫނު ހަދާ މަޖިލިސް އުވާލައި، އައު އިންތިޚާބަކަށް ދިޔުން ކަމަށް ވަނީ ފާހަގަ ކޮށްފަ އެވެ. ނަމަވެސް، މިވަގުތު ވޯޓުގެ ސާވޭ ތަކުން ދައްކާ ގޮތުގައި މެރިން ލޫ ޕެންގެ ނެޝަނަލް ރެލީ ޕާޓީ އަށް 32 އިންސައްތަ ވޯޓު ކާމިޔާބު ކުރެވޭނެ ކަމަށް ވަނީ ލަފާ ކޮށްފަ އެވެ.

ސިޔާސީ މަސްރަހު ދިރާސާ ކުރާ ފަރާތްތަކުން ބުނާ ގޮތުގައި ފްރާންސްގެ ރައީސް ކަމުގެ މަޤާމުން މެކްރޮން އަމިއްލަފުޅަށް އިސްތިއުފާ ދެއްވުމަކީ ވަރަށް ދުރު ކަމެކެވެ. އިންސީޑްގެ ސިޔާސީ ސައިންސް ޕްރޮފެސަރު ޑަގްލަސް ޔޭޓްސް ވިދާޅުވެފައިވާ ގޮތުގައި، އަނެއްކާ ވެސް މެކްރޮން އަށް އެންމެ ފަސޭހަ ވާނީ އައު ބޮޑު ވަޒީރެއް އައްޔަން ކުރައްވައިގެންނެވެ.

ފްރާންސްގެ މިހާރު އޮތް ސިޔާސީ ހަލަބޮލި ކަމުގެ ތެރޭގައި ވަނީ، ކުރިއަށް އޮތް 2026 ވަަނަ އަަހަރުގެ ބަޖެޓު ހުއްޓިފަ އެވެ. އިޤްތިޞާދީ މާހިރުން ލަފާ ކުރާ ގޮތުގައި އެ ބަޖެޓު ވަގުތީ ގޮތުން ކުރިއަށް ގެންދަން ޖެހިދާނެ އެވެ. ޑޮއިޗެ ބޭންކުގެ ޔަސިން ރުއައިމީ ވިދާޅުވެފައިވާ ގޮތުގައި ޚާއްސަ ޤާނޫނެއްގެ ދަށުން ޚަރަދުތައް 2025 ވަނަ އަހަރުގެ އޮނިގަނޑާ އެއްގޮތަށް ބެހެއްޓުމަށް މަސައްކަތް ކުރެވިދާނެ އެވެ.

ލެކޯނޫ އަކީ, މިހާރު ދެ ވަނަ ދައުރަކަށް ފްރާންސްގެ ވެރިކަން ކުރައްވަމުން އަންނަ މެކްރޮންގެ ވެރި ކަމުގައި ފްރާންސްގައި އައްޔަން ކުރެވުނު ހަތް ވަނަ ބޮޑު ވަޒީރެވެ. އެހެންކަމުން ދެން އައްޔަން ކުރައްވާ ބޮޑު ވަޒީރު ވާނީ މެކްރޮންގެ ސަރުކާރުގައި އައްޔަން ކުރައްވާ އަށް ވަނަ ބޮޑު ވަޒީރަށެވެ.