"ލޫޓުވައިފި ލޫޓުވައިފި": ފުލުހުން ހާލަތާއި ނުބައްދަލު ބާރުގެ ބޭނުންކުރުން އެމްޑީޕީގެ ލީޑަރޝިޕް އިން ކުށްވެރިކޮށްފި
ރައީސް އިބޫ ވިދާޅުވީ ސުލްހަވެރި މުޒާހަރާގައި ސަރުކާރުން ބޭނުންކޮށްފައިވަނީ ހާލަތާއި ނުބައްދަލު ބާރު ކަމަށް
ކުރީގެ ރައީސް އިބްރާހިމް މުހައްމަދު ސާލިހް އާއި އެމްޑީޕީ އަށް ނިސްބަތްވާ މަޖިލިސް މެންބަރުން މުޒާހަރައިގެ އެންމެ ކުރީ ސަފުގައި
"ލޫޓުވައިފި ލޫޓުވައިފި" މުޒާހަރައިގައި ފުލުހުން ހާލަތާއި ނުބައްދަލު ބާރުގެ ބޭނުން ކުރުމުން އެމްޑީޕީގެ ލީޑަރޝިޕް އިން ފުލުހުންގެ އެ އަމަލުތައް ކުށްވެރި ކޮށްފި އެވެ.
އެމްޑީޕީގެ ލީޑަރޝިޕް ގައި މަސައްކަތް ކުރާ ބޭފުޅުން އެކަން ކުށްވެރިކޮށް އެކްސް ގައި ކުރި ޕޯސްޓުތަކުގައި ވިދާޅުވެފައިވަނީ، ސުލްހަވެރި މުޒާހަރާއެއްގައި ފުލުހުންގެ އަމަލުތައް ހުރީ ބަލައިގަނެވޭނެ ގޮތަކަށް ނޫންކަމަށާއި އެ އަމަލުތައް އެންމެ ހަރުކަށި އިބާރާތުން ކުށްވެރި ކުރާ ކަމަށެވެ.
އެގޮތުން ކުރީގެ ރައީސް އިބްރާހިމް މުހައްމަދު ސާލިހް އެކްސް ގައި ކުރެއްވި ޕޯސްޓެއްގައި ވިދާޅުވީ، ހުކުރު ދުވަހުގެ ރޭ ކުރިއަށްދިޔަ ސުލްހަވެރި މުޒާހަރާގައި ސަރުކާރުން ބޭނުންކޮށްފައިވަނީ ހާލަތާއި ނުބައްދަލު ބާރު ކަމަށާއި އެކަން އެންމެ ހަރުކަށި އިބާރާތުން ކުށްވެރި ކުރާ ކަމަށެވެ. އަދި ރައްޔިތުންގެ އަޑު ކަނޑުވާލުމަށް އަނިޔާވެރިކަން ބޭނުން ކުރުމަކީ، ސަރުކާރުގެ ލެޖިޓިމަސީ ގެއްލެމުންދާ ކަމުގެ ހެއްކެއް ކަމަށް ރައީސް އިބޫ ވިދާޅުވި އެވެ. އޭގެ އިތުރުން އެއްވުމުގައި ފުލުހުން ޕެޕާ ސްްޕްރޭ ބޭނުން ކުރުމުގެ ސަބަބުން އަސަރު ކޮށްފައިވާ ރަސްލާންގެ ޙާލަތާ މެދު ކަންބޮޑުވާ ކަމަށް ވެސް ރައީސް އިބޫ ވިދާޅުވި އެވެ.
ރައީސް އިބޫގެ އިތުރުން، ކުރީގެ ނައިބު ރައީސް ފައިޞަލް ނަސީމް ވެސް ވަނީ އެކަން ކުށްވެރި ކުރައްވައިފަ އެވެ. އެކްސްގައި ކުރެއްވި ޕޯސްޓެއްގައި ފައިޞަމް ވިދާޅުވެފައި ވަނީ އެއްވުމުގެ ތެރެއިން ހާޓް އެޓޭކެއް ޖެހުނު ރަސްލާން އަދި އަނިޔާވި އެންމެހާ ފަރާތްތަކަށް އަވަސް ޝިފާ އަކަށް އެދޭ ކަމަށެވެ. އަދި ޤާނޫނީ އިމުގެ ތެރެއިން ކުރިއަށް ގެންދާ ސުލްޙަވެރި އެއްވުންތަކަށް ޖާގަ ލިބެން ޖެހޭ ކަމަށް ފައިޞަލް ވަނީ ވިދާޅުވެފަ އެވެ.
ސުލްހަވެރި އިހްތިޖާޖެއްގައި ފުލުހުން ހާލަތާއި ނުބައްދަލު ބާރުގެ ބޭނުން ކުރުމުން އެމްޑީޕީގެ ރައީސް އަބްދުﷲ ޝާހިދު ވިދާޅުވީ، ޤާނޫނުއަސާސީގެ 4 ވަނަ މާއްދާގައި ސާފުކޮށް ބަޔާންކޮށްފައިވަނީ ދައުލަތުގެ އެންމެހައި ބާރުތައް ފެށިގެން އަންނަނީ، އަދި ދެމިއޮންނާނީ، ދިވެހިރާއްޖޭގެ ރައްޔިތުންގެ ކިބައިން ކަމަށެވެ. އެހެން ކަމުން ރޭ ރައްޔިތުން ނިކުމެ އެ ބާރުތައް އަދިވެސް އޮންނާނީ ރައްޔިތުންގެ އަތުގައި ކަން މިސަރުކާރަށް ހަނދާންކޮށްދީފައިވާކަމަށް ޝާހިދު ވިދާޅުވި އެވެ.
މީގެ އިތުރުން އެމްޑީޕީގެ ޗެއަރޕާސަން ފައްޔާޒް އިސްމާއިލް ވިދާޅުވީ އޮކްޓޯބަރު 3 ގައި ބޭއްވި އެއްވުމުގެ ތެރެއިން އަނިޔާވެރިކޮށް ހައްޔަރުކޮށްގެން ގެންދިޔަ ހުރިހާ އެންމެން އެއްވެސް ޝަރުތަކާ ނުލާ ދޫކޮށްލުމަށް ގޮވާލާ ކަމަށާއި ސިޔާސީ ގޮތުން ހައްޔަރުކޮށް ދައުވާ ކުރިޔަސް ފަސްޖެހުމެއް ނެތް ކަމަށެވެ.
އަދި ސަރުކާރުން މުޅި ދައުލަތް ބޭނުންކޮށްގެން ދައްކަމުން ދިޔަ ބިރު ފަހަނައަޅައި ރޭ މާލޭގެ މަގުތަކަށް ނުކުތް ހުރިހާ ބޭފުޅުންނަށް ސާބަސް ދަންނަވައި ކަމަށާއި ބެޓަނަކަށް، ކަރުނަ ގޭހަކަށް، ޕެޕާ ސްޕްރޭއަކަށް، ސޮނިކް ވެޕަނަކަށް ބިރުން ސިހިގެން ދިވެހިން ފަހަތަކަށް ނުޖެހޭނެކަން އަނެއްކާ ވެސް ސާބިތުކޮށްދީފި ކަމަށް ފައްޔާޒް ވިދާޅުވި އެވެ. ފައްޔާޒް ވިދާޅުވީ ދުވަހެއް ދުވަހަކަށް މީހުންގެ އަދަދު ދާނީ އިތުރުވަމުން ކަމަށެވެ.
މީގެ އިތުރުން އެތައް ބަޔަކު އަންނަނީ އެއްވުމުގައި ފުލުހުން ޙާލަތާ ނުބައްދަލު ބާރުގެ ބޭނުންކޮށް، އެއްވުމުގެ ބައިވެރިންނަށް އަނިޔާ ކޮށްފައިވާ ކަަމަށް ފާހަގަކޮށް، އެކަން ކުށްވެރި ކުރަމުންނެވެ. ރޭ މުޒާހަރާގައި ފުލުހުން ތަކުރާރުކޮށް ސޮނިކް ވެޕަން ބޭނުން ކުރި އެވެ. އެމްޑީޕީން ވަނީ ސޮނިކް ވެޕަން އެއް ކަމަށްވާ ލޯންގް ރޭންޖް އެކޯސްޓިކް ޑިވައިސް (އެލްއާރުއޭޑީ) ބޭނުންކުރުމަކީ މީގެ ކުރިން ރާއްޖޭގެ އެއްވުންތައް ރޫޅާލަން ބޭނުންކުރި ހަތިޔާރެއް ނޫން ކަން ފާހަގަކޮށް އެކަން ކުށްވެރި ކޮށްފަ އެވެ.
އެމްޑީޕީ އިން ބުނީ، ރޭ ފުލުހުން އަމަލުކުރި ގޮތުން ފެނިގެންދަނީ ރައީސް މުހައްމަދު މުއިއްޒުގެ ވެރިކަމުގައި ރާއްޖޭގެ ޑިމޮކްރަސީ ނެތިދަމުންދާ މިންވަރު ކަމަށެވެ. އަދި، އެއްވެ އުޅުމުގެ މިނިވަންކަމަށް ހުރަސްއަޅައި، ސަރުކާރުން މި އަމަލުތައް ހިންގާފައި މި ވަނީ ރާއްޖޭގެ އިގުތިސޯދު ނާޒުކު ހާލަތެއްގައި އޮވެ، ދައުލަތުގެ ދަރަނި އިންތިހާއަށް ގޮސްފައި އޮތް ހާލަތެއްގައި ކަން އެމްޑީޕީ އިން ފާހަގަ ކުރި އެވެ.
