އެމްޑީޕީން ހުކުރު ދުވަހުގެ ރޭ އާރޓިފިޝިއަލް ބީޗުގައި ބާއްވާ ބޮޑު އެއްވުމަށް ރާއްޖޭގެ އެކި ކަންކޮޅުތަކުން ރައްޔިތުން މާލެ ޖަމާވާން ފަށައިފި އެވެ.

"ލޫޓުވައިފި ލޫޓުވައިފި" ނަމުގައި އެމްޑީޕީން އިސްނަގައިގެން ބާއްވާ ބޮޑު އެއްވުން ފެށެން ވަގުތު ކުޑަތަން ވާވަރަކަށް އެކި ރަށްރަށުގެ މީހުން މާލެ ޖަމަވާން ވަނީ ފަށާފައެވެ. އެގޮތުން ލޯންޗުތަކުގައާއި ވައިގެ މަގުންވެސް މީހުން މާލެ އަންނަން ދަތުރު ފަށާފައިވާކަމަށް މައުލޫމާތު ލިބެ އެވެ.

އޭގެ އިތުރުން ބުރާސްފަތި ދުވަހާއި ހުކުރު ދުވަހުގެ މެންދުރާ ހަމައަށްވެސް ގިނަ ބަޔަކު މާލެ އަރާފައިވާއިރު އެމީހުން މާލެ އަރާފައި ވަނީ އެމްޑީޕީގެ ދިދަވެސް ހިފައިގެންނެވެ. އަދި މިހާރުވެސް ގިނަ އަދަދެއްގެ ލޯންޗުތައް މާލެ އައުމަށް ވަނީ ދަތުރު ފަށައިފަ އެވެ. ގިނަ ބަޔަކު މާލެއަށް ދަތުރު ފަށާފައިވާއިރު، ކަނޑުދަތުރުކުރާ އުޅަނދުތައް ބަލައިފާސްކުރަން ސިފައިން ހާއްސަ އޮޕަރޭޝަނެއް ވަނީ ފަށާފަ އެވެ. މި އޮޕަރޭޝަނުގައި އޭރިއާ ކޮމާންޑްތައް ވެސް ހިމެނޭ ގޮތަށް ކުރިއަށްގެންދަން ނިންމާފައިވާ ކަމަށް ވެސް އެމްއެންޑީއެފް އިން ބުންޏެވެ.

މި އޮޕަރޭޝަނުގެ ދަށުން މިވަގުތުވެސް މާލޭ ފަޅުގައި ބަދަރުކޮށްފައިވާ އުޅަނދުތަކަށް ސިފައިން އަރައި ބަލައިފާސްކުރަމުން ދާކަމަށް މައުލޫމާތު ލިބެއެވެ. އެގޮތުން ލޯންޗުތަކަށް ސިފައިން އަރާ މަންޒަރު ފެންނަ ވީޑިއޯ އެއްވެސް ސޯޝަލް މީޑިއާގައި ދަނީ ދައުރުވަމުންނެވެ.

އެމްޑީޕީގެ ބޮޑު މުޒާހަރާ އާއި ގުޅުގެން ސަރުކާރުގެ ކުންފުނިތަކުން ވަނީ ބޮޑު މުޒާހަރާގައި އެ ކުންފުނިތަކުގެ މުވައްޒަފުން ބައިވެރި ވެދާނެތި ގިނަ ހަރަކާތްތަކެއް ރާވާފަ އެވެ.