ގައުމީ ޔުނިވަރސިޓީ އިން ހުކުރު ދުވަހު ހުރާ އަށް ދަތުރެއް ރާވައިފި
ފުރުމަށް ހަމަ ޖެހިފައިވަނީ ހުކުރު ދުވަހު މެންދުރު ފަހު 1:30 ހާ އިރު
އިންޓަރނޭޝަނަލް ކޮންފަރެންސް އޮން އިނޮވޭޝަންސް އިން އިންޖިނިއަރިންގ، ސައިންސް އެންޑް ޓެކްނޮލޮޖީ ފޯރ ސަސްޓެއިނަބަލް ޑިވެލޮޕްމަންޓް ހުޅުވުމުގެ ރަސްމިއްޔާތުގެ ތެރެއިން
ހުކުރު ދުވަހަށް ގައުމީ ޔުނިވަރސިޓީ އިން މާލެ އަތޮޅު ހުރާ އަށް ދަތުރެއް ރާވައިފިއެވެ.
ގާލާ ޑިނަރ އަކާ އެކު އޮންނަ މި ދަތުރުގައި ފުރުމަށް ހަމަ ޖެހިފައިވަނީ ހުކުރު ދުވަހު މެންދުރު ފަހު 1:30 ހާ އިރު ކަމަށް މައުލޫމާތު ލިބިފައިވެއެވެ.
ގައުމީ ޔުނިވަރސިޓީގެ ފެކަލްޓީ އޮފް އިންޖިނިއަރިން، ސައިންސް އެންޑް ޓެކްނޮލޮޖީ ގެ ފަރާތުން މި ދަތުރުގެ އިންތިޒާމުތަކުގައި އުޅޭ ފަރާތަކުން ނަން ނުޖެހުމަށް ޝަރުތުކޮށް ބުނީ މި ދަތުރުގައި މޫދު ކުޅިވަރު ތަކާއި ހުރާ ކަނޑޫފާ ސަރަހައްދު ބަލާލުން ފަދަ ކަންކަން ރޭވިފައިވާ ކަމަށެވެ.
އޭގެ އިތުރުން ރޭގަނޑުގެ ކެއުމާއި އެކު ސަގާފީ ޝޯ އެއް ވެސް ރޭވިފައިވާ ކަމަށް އޭނާ ބުންޏެވެ.
ހުރާ އިން މާލެ އަށް ފުރުމަށް ހަމަ ޖެހިފައިވަނީ ހުކުރު ދުވަހުގެ ރޭ 9:30 ގައެވެ.
ދަތުރު އިންތިޒާމުވެފައިވަނީ ބައިވެރިންނަށް އާއިލާގެ މެމްބަރުން ވެސް ގެންދެވޭ ގޮތައް ކަމަށް މައުލޫމާތު ދިން ފަރާތުން ބުނެފައިވެއެވެ.
އެންމެ ބޮޑު އިދިކޮޅު ޕާޓީ - އެމްޑީޕީ އިން އިންތިޒާމު ކުރާ ބޮޑު އެއްވުން ހުކުރު ދުވަހުގެ ރޭ 8:30 ގައި ފެށުމަށް ތައްޔާރު ވަމުންދާ އިރު ސަރުކާރުން ގެންދަނީ އެ އެއްވުމަށް މީހުން އައުން މަދު ކުރުމަށް ކަމަށް ބެލޭ ވަރަށް ގިނަ ހަރަކާތްތައް ރާވަމުން ކަން ފާހަގަ ކުރެވެއެވެ.
