ޢައްޒާ އަށް އިސްރާއީލުން ހަމަލާ ދިނީ ކުރީގެ ރައީސް ޞާލިހުގެ ވެރިކަމުގައި ކަމަށް މެމްބަރު އައިފާން ވިދާޅުވުމުން ބޮޑު ލަދެއްގައި ބެދިއްޖެ

ޢައްޒާ އަށް އިސްރާއީލުން ހަމަލާ ދިނީ ކުރީގެ ރައީސް އިބްރާހިމް މުހައްމަދު ޞާލިހުގެ ވެރިކަމުގައި ކަމަށް ވިދާޅުވުމުން މެމްބަރު އައިފާން ބޮޑު ލަދެއްގައި ބެދިއްޖެއެވެ.

ރައްޔިތުންގެ މަޖިލީހުގެ ބުރާސްފަތި ދުވަހުގެ ޖަލްސާގައި ވާހަކަދައްކަވަމުން މިހާރު ޢައްޒާ އަށް ދެމުންދާ ހަމަލާތައް ދޭން ފެށީ ނިމިދިޔަ ވެރިކަމުގައި ކަމަށް އޭނާ ވިދާޅުވި ނަމަވެސް އެއީ ހަގީގަތާއި ޚިލާފު ދޮގު ވާހަކަތަކެކެވެ. އޭނާ އެފަދައިން ވިދާޅުވީ ގްލޯބަލް ސުމޫދު ފްލޮޓިލާ މޫވްމެންޓްއަށް ރާއްޖެއިން ދެވެން އޮތް އެހީތެރިކަމެއް ދިނުމަށް ގޮވާލާ ރައްޔިތުންގެ މަޖިލީހަށް ހުށަހެޅި ކުއްލި މައްސަލަަ އަށް ބަހުސްކުރައްވަމުންނެވެ.

"މިހާ ނުލަފާކަމުގައި މުޅި ޢައްޒާ އަށް ހަމަލާ ދޭން ފެށީ އިބްރާހިމް މުހައްމަދު ޞާލިހުގެ ވެރިކަމުގައި އޭ އިއްޒަތްތެރި ރައީސް." އައިފާން ވިދާޅުވިއެވެ.

އައިފާން އެހެން ވިދާޅުވެފައި ވަނީ ސަރުކާރު ދިފާއުކުރުމަށް މަސައްކަތްކުރައްވާ ވާހަކަދައްކަވަމުންނެވެ. އެގޮތުން މި ސަރުކާރުން ޢައްޒާ ދިފާއުކުރުމަށް މަސައްކަތްކުރާ ކަަމަށް ސިފަކުރައްވާ އައިފާން ވަނީ ވާހަކަދައްކަވާފައެވެ.

އައިފާންގެ އެ ވާހަކަތަކަށް އާއްމުން ވަނީ ވަރަށް ބޮޑަށް ފާޑުކިޔުން އަމާޒުކޮށްފައެވެ. އާއްމު މީހަކު މިކަމާއި މެދު ކުރި ޕޯސްޓެއްގައި ބުނެފައި ވަނީ އެފަދަ ވާހަކަތައް ދެއްކުމަކީ އެއީ ވަރަށް ލަދުވެތި ކަމެއް ކަމަށެވެ. އަދި ޢައްޒާ އަށް ދެމުންދާ ހަމަލާތަކުގެ މައުލޫމާތަކީ އާއްމުންނަށް ވަރަށް ބޮޑަށް އެނގޭ މައުލޫމާތުތަކަކަށް ވީ ނަމަވެސް އެކަން ވެސް ސިޔާސީކުރާ ކަމަށް ބައެއް އާއްމުން ވަނީ ބުނެފައެވެ.

މީގެ އިތުރުން ބައެއް އާއްމުން ވަނީ އެއީ މަޖިލީހުގެ މެމްބަރަކު ދައްކާ މިންވަރަށް ވުރެ ތަންދޮރު ނޭނގޭ ވާހަކަ އެއް ކަމަށް ވެސް ބުނެފައެވެ. މި ވާހަކަތަކާއި މެދު އައިފާން މީސްމީޑިއާގައި ހޫނުފެނަށް ވެއްޓުމުން އެކަން ދިފާއުކުރުމަށް ސަރުކާރަށް ތާއީދުކުރާ ބައެއް ފަރާތްތަކުން މަސައްކަތްކޮށްފައިވެއެވެ. އެހެންނަމަ ވެސް މިކަމާއި މެދު ވާހަކަދެއްކި ބައެއް އާއްމުން ވަނީ ޢައްޒާ އަށް އަނިޔާވެރިކަމާއި އެކު އިސްރާއީލުން ދޭ ހަމަލާތަކާއި ނިމިދިޔަ ސަރުކާރާއި ގުޅުވުމުން އެކަމަކީ ދިފާއު ކުރެވޭ ވަރަށް ވުރެ ދޯދިޔާ ވާހަކަތަކެއް ކަމަށް ބުނެފައެވެ.