ސަން ސިޔާމުގެ ދެ ކުންފުނީގެ މައްޗަށް ކުރި މަނީ ލޯންޑްރިންގެ ދައުވާ ސާބިތު ނުވާ ކަމަށް ކޯޓުން ސިއްރުން ނިންމައިފި

މަޝްހޫރު ވިޔަފާރިވެރިޔާ ސަން ސިޔާމުގެ ދެ ކުންފުނި ކަމަށްވާ ސަން އިންވެސްޓްމަންޓް އަދި ސަން ކޮންސްޓްރަކްޝަންގެ މައްޗަށް ކުރި މަނީ ލައުންޑަރިންގެ ދައުވާތައް ސާބިތުނުވާ ކަމަށް ސިއްރުން ކޯޓުން ނިންމައިފި އެވެ.

ކްރިމިނަލް ކޯޓުން މި ދެކުންފުނީގެ މައްޗަށް ކުށް ސާބިތު ނުވާ ކަމަށް ހުކުމް ކުރި ޝަރީއަތުގެ މަޖިލިސް އޮތީ ސެޕްޓެމްބަރު 17 ގައި ކަމަށް ވިޔަސް އެއީ ކޯޓުން ޝެޑިއުލް ކޮށްގެން ހުޅުވާލައިގެން ބޭއްވި ޝަރީއަތެއް ނޫން ކަން ވަނީ ހާމަ ވެފައެވެ.

ގާނޫނުން ލާޒިމު ކުރި ނަމަވެސް ކްރިމިނަލް ކޯޓުގެ ވެބް ސައިޓުގައި ވެސް މައްސަލަ ނިންމި ގޮތުގެ ރިޕޯޓު ވެސް ޝާއިއު ކޮށްފައެއް ނުވެއެވެ.

ސަން ޝިޔާމުގެ ދެ ކުންފުންޏެއްގެ މައްޗަށް ދައުލަތުން އުފުލި ދެ ދައުވާ އަކީ 1.7 މިލިއަން ޑޮލަރު ކުރީގެ ރައީސް ޔާމީން އަށް ނުހައްގުން ފޯރުކޮށްދިނުމުގައި މެދުވެރިއެއްގެ ދައުރު އަދާ ކުރުމެވެ.

ފުއްގިރި މައްސަލައިގައި ރިޝްވަތު ނެގުމުގެ ދައުވާ ރައީސް ޔާމީނުގެ މައްޗަށް ވެސް ދައުލަތުން ވަނީ އުފުލާފައެވެ. އެ މައްސަލަ މިހާރު ވެސް ދަނީ ހިނގަމުންނެވެ.