އެމެރިކާ އިން ހަމަލާ ދީފާނެ ކަމަށް، މަދޫރޯ ހުންނެވީ ކުއްލި ނުރައްކަލުގެ ޙާލަތު އިއުލާން ކުރުމަށް ތައްޔާރަށް

ވެނެޒުއެލާގެ އަސްކަރިއްޔާ އަށް އަމާޒުކޮށް، އެމެރިކާ އިން ހަމަލާ ދީފާނެ ކަމުގެ ބިރު ބޮޑުވެފައިވާއިރު، ކުއްލި ނުރައްކަލުގެ ޙާލަތު އިއުލާން ކުރުމަށް ވެސް ތައްޔާރަށް ހުންނެވި ކަމަށް ވެނެޒުއެލާގެ ރައީސް ނިކޮލަސް މަދޫރޫ ވިދާޅުވެއްޖެ އެވެ.

މި ފަހަކަށް އައިސް އެމެރިކާ އިން ވަނީ، ވެނެޒުއެލާ އިން އެ ޤައުމަށް މަސްތުވާ ތަކެތި އެތެރެ ކުރާ ކަމަށް ތުހުމަތު ކޮށްފަ އެވެ. އެގޮތުން މަސްތުވާ ތަކެތި އެތެރޭ ކުރާ ކަމަށް ބުނެ، ވެނެޒުއެލާގެ އުޅަނދުތަކަށް ވަނީ ހަމަލާ ތަކެއް ވެސް ދީފަ އެވެ.

އެކަމާ ގުޅޭ ގޮތުން ވާހަކަ ދައްކަވަމުން މަދޫރޯ ވިދާޅުވެފައި ވަނީ، ވެނެޒުއެލާ އިން އެކަމާ ގުޅިގެން މަޝްވަރާ ކުރަން ފަށާފައިވާ ކަމަށެވެ. އެގޮތުން އެމެރިކާ އިން އަސްކަރީ ގޮތުން ހަމަލާ ދޭން އުޅެފި ނަމަ، ޤާނޫނު އަސާސީގެ ދަށުން ކުއްލި ނުރައްކަލުގެ ޙާލަތު އިއުލާން ކުރުމަށް ވެސް ތައްޔާރަށް ހުންނެވި ކަަމަށް މަދޫރު ވިދާޅުވެފައިވެ އެވެ. މަދޫރޯ ވިދާޅުވީ ވެނެޒުއެލާގެ ރައްޔިތުންނާއި، އެ ޤައުމުގެ ސުލްޙަ އާއި، ދެމެހެއްޓުމަށް ފިޔަވަޅު އަޅުއްވާނެ ކަމަށެވެ.

މަދޫރޯ އެހެން ވިދާޅުވުމުގެ ކުރިން، ވެނެޒުއެލާގެ ނައިބު ރައީސް ޑެލްސީ ރޮޑްރިގެޒް ބޭރުގެ ޑިޕްލޮމަޓުންނަށް އަންގަވާފައިވާ ގޮތުގައި، އެމެރިކާ އިން ވެނެޒުއެލާ އަށް ހަމަލާ ދޭ ހާލަތެއް ކުރިމަތިވެއްޖެ ނަމަ، ދިފާއީ އަދި ސާލަމަތީ ކަންކަމުގައި ޚާއްސަ ބާރުތަކެއް ދޭ ޤަރާރުގައި މަދޫރޯ ސޮއި ކުރައްވާފައިވާ ކަމަށެވެ.

އެމެރިކާގެ ރައީސް ޓްރަމްޕް ވަނީ، އަށް ހަނގުރާމަ މަތީ އުޅަނދާއި، ނިއުކްލިއާ ސަބްމެރިންނާއި، އެފް-35 ސެޓެލްތު ފައިޓާ ޖެޓުތަކެއް ވެނެޒުއެލާގެ ކަނޑުގެ ސަރަހައްދަށް ފޮނުއްވައިފަ އެވެ. މިއީ ކެރީބިއަން ސަރަހައްދުގައި އެމެރިކާ އިން މިހާތަނަށް ކޮށްފައިވާ އެންމެ ބޮޑު ކަނޑުގެ އޮޕަރޭޝަން ކަމަށް ވަނީ ބުނެފަ އެވެ.

އެކަމާ ގުޅިގެން ޓްރަމްޕް ވިދާޅުވެފައި ވަނީ އެއީ މަސްތުވާ ތެކެތި އެތެރެ ކުރުން ހުއްޓުވުމަށް ހިންގާ އޮޕަރޭޝަނެއް ކަމަށެވެ. ނަމަވެސް، އދ އާއި އެމެރިކާގެ ތަފާސް ހިސާބުތަކުން ދައްކާ ގޮތުގައި ވެނެޒުއެލާ އަކީ، އެމެރިކާ އަށް ކޮކެއިން އެތެރެ ކުރުމުގައި މައިގަނޑު ދައުރެއް އަދާ ކުރާ ޤައުމެއް ނޫނެވެ.

މިހާތަނަށް އައިއިރު، އެމެރިކާގެ އަސްކަރިއްޔާ އިން ވަނީ ވެނެޒުއެލާގެ ކަނޑުގެ ސަރަހައްދުގައި ތިން އުޅަނދަކަށް ހަމަލާ ދީފަ އެވެ. އެމެރިކާ އިން ދިން ހަމަލާ ތަކުގައި މަދުވެގެން ވެނެޒުއެލާގެ 17 މީހަކު ވަނީ މަރުވެފަ އެވެ. އެކަމާ ގުޅިގެން ވެނެޒުއެލާ އިން ބުނެފައި ވަނީ، އެމެރިކާ އިން ވަނީ "އިއުލާން ނުކުރާ ހަނގުރާމައެއް" ފަށާފައިވާ ކަމަށެވެ.

ކުއްލި ނުރައްކަލުގެ ޙާލަތު އިއުލާން ކުރާ ވާހަކަ މަދޫރޯ ދައްކަވާފައިވާއިރު، އެ ޤަރާރުގެ ދަށުން މަދޫރޯ އަށް ލިބިވަޑައިގަންނަވާ ބާރުތައް 90 ދުވަހުގެ މުއްދަތަކަށް ދެމި އޮންނާނެ އެވެ. އަދި އިތުރު 90 ދުވަހަށް އެ މުއްދަތު އިތުރު ވެސް ކުރެވޭނެ އެވެ. ވެނެޒުއެލާގެ ޤާނޫނު އަސާސީގައިވަ ގޮތުން، މި ބާރުތައްކުގެ ދަށުން އަސްކަރިއްޔާ އަށް ޤައުމުގެ އާންމު ޚިދުމަތްތަކާއި، ތެޔޮ ސިނާއަތުގެ މައްޗަށް ބިނާކޮށް ބާރު ލިބިގެންދާނެ އެވެ.