ޤަތަރުގެ ބޮޑު ވަޒީރުގެ ކިބައިން ނަތަންޔާހޫ މައާފަށް އެދިވަޑައިގެންފި

އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ، ޤަތަރުގެ ބޮޑު ވަޒީރު ޝައިޚް މުޙަައްމަދު ބިން ޢަބްދުއް ރަޙުމާން އަލް ޘާނީގެ ކިބައިން މައާފަށް އެދިވަޑައިގެންފި އެވެ.

ޤަތަރުގެ ބޮޑު ވަޒީރުގެ ކިބައިން ނަތަންޔާހޫ މައާފަށް އެދިވަޑައިގެންފައި ވަނީ، އެމެރިކާގެ ރައީސް ޑޮނަލްޑް ޓްރަމްޕްއާ ބައްދަލު ކުރެއްވުމަށް، އެމެރިކާގެ ރިޔާސީ ގަނޑުވަރު ވައިޓް ހައުސް އަށް ވަޑައިގެންނެވެ.

ނަތަންޔާހޫއާ އެކު އޮތް ބައްދަލުވުމުގައި ޓްރަމްޕް ވަނީ ޤަތަރުގެ ބޮޑު ވަޒީރަށް ފޯނުން ގުޅުއްވައިފަ އެވެ. އަދި ޓްރަމްޕް ވަނީ އިސްރާއީލް އާއި ޤަތަރުގެ ގުޅުން ރަނގަޅު މަގަން އެޅުވުމަށް ބޭނުންފުޅުވާ ކަމަށް ވިދާޅުވެފައިވެ އެވެ. އެ ފޯނު ކޯލުގައި ވަނީ ތިން ޤައުމުގެ މެދުގައި ރަނގަޅު ކަންތައްތަކެއް އެކުލަވާލުމަށް ވެސް އެއްބަސްވެފަ އެވެ.

އެކަމާ ގުޅިގެން އެމެރިކާގެ ރިޔާސީ ގަނޑުވަރު ވައިޓް ހައުސް އިން ބުނެފައި ވަނީ، ބައްދަލުވުމުގެ ފުރަތަމަ ފިޔަވަޅެއްގެ ގޮތުން، ޤަތަރުގައި ތިބި ހަމާސްގެ އިސްވެރިންނަށް އަމާޒުކޮށް އިސްރާއީލް އިން ދިން ހަމަލާއާ ގުޅިގެން، ބަޔަކު މަރުވެފައިވާތީ ނަތަންޔާހޫ އެކަމުގެ ހިތާމަ ފާޅު ކޮށްފައިވާ ކަމަށެވެ.

ހަމަ އެހެންމެ، ހަމާސްގެ ބެލުމުގެ ދަށުގައި ތިބި އިސްރާއީލްގެ ރައްޔިތުން މިނިވަން ކުރުމުގެ މަޝްވަރާތައް ކުރިއަށް ދަނިކޮށް، ހަމާސްގެ އިސްވެރިންނަށް ދިން ހަމަލާގެ ސަބަބުން ޤަތަރުގެ ސިޔާދަތަށް ގެއްލުން ވެފައިވާތީ، އެކަމާ ހިތާމަ ކުރައްވާ ކަމަށާއި، އަދި މުސްތަޤުބަލުގައި އެފަދަ ހަމަލާއެއް ނުދޭނެ ކަމުގެ ޔަގީންކަން ނަތަންޔާހޫ ދީފައިވާ ކަމަށް ވެސް ވަނީ ބުނެފަ އެވެ.

ވައިޓް ހައުސް އިން ބުނެފައި ވަނީ، ނަތަންޔާހޫގެ ފަރާތުން ދީފައިވާ ޔަގީންކަމާއި، ދެއްކެވި ވާހަކަތަކަށް ޤަތަރުގެ ބޮޑު ވަޒީރު މަރުޙަބާ ވިދާޅުވެފައިވާ ކަމަށެވެ. އަދި ޣައްޒާ ހަނގުރާމަ ނިމުމަކަށް ގެނައުމާއި، ސުލްޙަވެރިކަން ހޯދުމުގައި މެދުވެރިއެއްގެ ދައުރު އަދާ ކުރަން ތައްޔާރަށް ހުންނެވި ކަމަށް، ޤަތަރުގެ ބޮޑު ވަޒީރު ވިދާޅުވެފައިވާ ކަމަށް ވައިޓް ހައުސް އިން ބުނެފައިވެ އެވެ.

ޤަތަރުގެ ބޮޑު ވަޒީރާ ފޯނުން ގުޅުއްވައި ނަތަންޔާހޫ ވާހަކަ ދައްކަވާފަައިވާއިރު، ޤަތަރަށް އަމާޒުކޮށް އިސްރާއީލް އިން ވަނީ މި ފަހުން ހަމަލާ ދީފަ އެވެ. އެއީ ޤަތަރުގައި ތިބި ހަމާސް ޖަމާއަތުގެ ސިޔާސީ އިސްވެރިންނަށް އަމާޒުކޮށްގެން އިސްރާއީލް އިން ދީފައިވާ ހަމަލާ އެކެވެ.

އެ ހަމަލާއާ ގުޅިގެން އެމެރިކާގެ އިތުރުން، އެތައް ޤައުމަކުން ވަނީ އިސްރާއީލް އަށް ނުރުހުން އަމާޒުކޮށްފަ އެވެ. އަދި ޤަތަރަކީ ހަނގުރާމަ ނިންމުމަށް ކުރަމުން އަންނަ މަސައްކަތުގައި މުހިންމު ދައުރެއް އަދާ ކުރަމުން އަންނަ ޤައުމެއް ކަމަށާއި، އިސްރާއީލް އިން ދިން ހަމަލާ ކުށްވެރި ކުރައްވާ ކަމަށް ޓްރަމްޕް ވެސް އޮތީ ވިދާޅުވެފަ އެވެ.

އިސްރާއީލް އިން ޣައްޒާގައި ހިންގަމުން އަންނަ ހަނގުރާމަ ހުއްޓުމަކަށް ގެނައުމަށް އެމެރިކާގެ ރައީސް ޓްރަމްޕް މަސައްކަތް ކުރައްވަމުން ގެންދަވާއިރު، ޓްރަމްޕް ވަނީ ހަނގުރާމަ ހުއްޓުމުގެ އައު ހުށަހެޅުމެއް ވެސް ހުށަހަޅުއްވައިފަ އެވެ. އެ ހުށަހެޅުމަށް އިސްރާއީލް އިން ޤަބޫލު ކޮށްފައިވާއިރު، ޓްރަމްޕް ވިދާޅުވީ ހަމާސް އިން ވެސް އެކަން ޤަބޫލު ކުރާނެ ކަމަށް އުންމީދު ކުރައްވާ ކަމަށެވެ.