ނަތަންޔާހޫގެ ތާއީދާ އެކު، ޣައްޒާގެ ސުލްހައިގެ ޕްލޭން ޓްރަމްޕް ހުށަހަޅުއްވައިފި

އިސްރާއީލް އިން ޣައްޒާގައި ހިންގަމުން އަންނަ ހަނގުރާމަ ހުއްޓުމަކަށް ގެނައުމަށް ކުރަމުން އަންނަ މަސައްކަތުގައި، އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫގެ ތާއީދާއެކު، ޣައްޒާ ސުލްޙައިގެ ޕްލޭން އެމެރިކާގެ ރައީސް ޑޮނަލްޑް ޓްރަމްޕް ހުށަހަޅުއްވައިފި އެވެ.

މި ޕްލޭން ޓްރަމްޕް ހުށަހަޅުއްވާފައި ވަނީ، އެމެރިކާގެ ރިޔާސީ ގަނޑުވަރު ވައިޓް ހައުސްގައި ނަތަންޔާހޫއާ އެކު ބޭއްވި ބައްދަލުވުމުގަ އެވެ. މިއީ ޓްރަމްޕްގެ ރިޔާސީ ދެ ވަނަ ދައުރުގައި ނަތަންޔާހޫ އެމެރިކާ އަށް ވަޑައިގެންނެވި ހަތަރު ވަނަ ފަހަރެވެ.

ޓްރަމްޕް ހުށަހަޅުއްވާފައިވާ ޕްލޭނަށް ނަތަންޔާހޫ ތާއީދު ކޮށްފައިވާއިރު، ނަތަންޔާހޫ ވިދާޅުވެފައި ވަނީ ފަލަސްޠީނުގެ މިނިވަން ކަމަށް މަސައްކަތް ކުރަމުން އަންނަ ހަމާސް ޖަމާއަތުން އެ ހުށަހެޅުން ބަަލައި ނުގަތުމުގެ ފުރުސަތު އޮތް ކަމަށެވެ. އެފަދަ ފުރުސަތެއް މެދުވެރިއްޖެ ނަމަ، "އެކަން ނިންމާލަން" އިސްރާއީލް އިން އޮންނާނީ ތައްޔާރަށް ކަމަށް ވެސް ނަތަންޔާހޫ ވަނީ ވިދާޅުވެފަ އެވެ.

ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޓްރަމްޕް ވިދާޅުވެފައި ވަނީ، ހަމާސް ޖަމާއަތުން ހެޔޮ ނިޔަތެއްގައި އެ ޕްލޭން ދިރާސާކޮށް، އެއަށް ޖަވާބެއް ދޭނެ ކަމަށް ބުނެފައިވާ ކަމަށެވެ.

ޖުމުލަ 20 ނުކުތާގެ މައްޗަށް އެކުލެވިގެންވާ މި ޕްލޭންގައި ހިމަނާފައި ވަނީ، ހަނގުރާމަ ހުއްޓާލުމަށާއި، ހަމާސްގެ ބަންދުގައި ތިބި އިސްރާއީލްގެ ރަހީނުން މިނިވަން ކުރުމާއި، ހަމާސްގެ ހަތިޔާރުތައް ދޫކޮށްލުމާއި، މަރުހަލާ ތަކަކަށް ބަހާލައިގެން އިސްރާއީލްގެ ސިފައިން ޣައްޒާ އިން ފޭބުމުގެ އިތުރުން، ބައިނަލްއަޤުވާމީ ސްޓެބިލައިޒޭޝަން ބާރެއް ޤާއިމު ކުރުމާއެކު، ޓްރަމްޕްގެ އިސް ނެގުމުގެ މަތިން ވަގުތީ ސަރުކާރެއް އުފެއްދުމެވެ.

މި ޕްލޭންގެ ދަށުން ހަމާސް ޖަމާއަތުގެ ހަތިޔާރުތައް މުޅިން ދޫކޮށްލަން ޖެހޭއިރު، މުސްތަޤުބަލުގައި ވުޖޫދު ވެގެން އަންނަ ސަރުކާރުގައި އެ ޖަމާއަތުގެ އެއްވެސް ދައުރެއް ނޯންނާނެ އެވެ. އެހެން ނަމަވެސް، "އަމާން އެކުވެރި ދިރިއުޅުމަލަށް" އެއްބަސްވާ ފަރާތްތަކަށް މައާފު ދިނުމަށް އެ ޕްލޭންގައި ވަނީ ހިމަަނައިފަ އެވެ.

މީގެ އިތުރުން، އިސްރާއީލްގެ ސިފައިން ޣައްޒާ އިން ފޭބުމަށް ފަހު، އިންސާނީ އެހީ އާއި، އިންވެސްޓްމަންޓު ތަކަށް ޣައްޒާގެ ބޯޑަރު ހުޅުވާލެވޭނެ އެވެ. އަދި ކުރިން ޓްރަމްޕް ވިސްނާފައިވާ ގޮތާ ޚިލާފަކަށް، ފަލަސްޠީނުގެ ރައްޔިތުން ޣައްޒާ އިން ބޭރު ކުރުމުގެ ބަދަލުގައި، އެ ތަނުގައި ދިރިއުޅުމަށް ހިތްވަރުދީ، ރަނގަޅު ޣައްޒާއެއް ބިނާ ކުރުމަށް ވެސް އެ ޕްލޭންގެ ދަށުން ފުރުސަތު ދޭނެ އެވެ.

ޕްލޭނާ ގުޅޭ ގޮތުން ނަތަންޔާހޫ ވިދާޅުވެފައި ވަނީ، އެ ޕްލޭންގެ ދަށުން، އިސްރާއީލް އިން ކަނޑައަޅާފައިވާ ހަނގުރާމައިގެ މަޤުސަދުތައް ޙާސިލު ކުރެވޭނެ އެވެ. އަދި ޓްރަމްޕް ވިދާޅުވެފައި ވަނީ، އޭނާ އުންމީދު ކޮށްގެން ހުންނެވީ ހަމާސް އިން އެ ހުށަހެޅުން ބަލައި ގަންނާނެ ކަމަށެވެ.

އިސްރާއީލް އިން ޣައްޒާގައި ހިންގަމުން އަންނަ ހަނގުރާމައިގައި، ޣައްޒާ އިން ވަނީ މިހާތަނަށް 66،000 އަށް ވުރެ ގިނަ މީހުން ޝަހީދު ކޮށްލައިފަ އެވެ. އޭގެ ތެރޭގައި ގިނައީ މައުސޫމް އަންހެނުންނާއި، ކުޑަ ކުދިންނެވެ. އިސްރާއީލް އިން އަންނަނީ ޣައްޒާ އަށް ދެމުން އަންނަ ހަމަލާތައް އެއް ދުވަހުން އަނެއް ދުވަހަށް ވަރުގަދަ ކުރަމުންނެވެ.