ކޮރަޕްޝަނާއި ނާޖާއިޒް ފައިދާއާއި ދެކޮޅަށް ނަޝީދު ކޮންފަރެންސެއް ބާއްވަނީ

ރާއްޖޭގެ ދައުލަތުގެ ޚަޒާނާއިން ވައްކަންކުރުމާއި ކޮރަޕްޝަންގެ މައްސަލަތަކާ މެދު މަޝްވަރާކޮށް، ހެކި ހޯދުމަށް ޚާއްޞަ ކޮންފަރެންސެއް ބާއްވާނެކަން ކުރީގެ ރައީސް މުޙައްމަދު ނަޝީދު އިއުލާނުކުރައްވައިފިއެވެ.

ނަޝީދުގެ އޮފީހުން ނެރުނު ބަޔާނެއްގައި ބުނީ، މި ކޮންފަރެންސަކީ އެކި ސަރުކާރުތަކުގައި ހިންގާފައިވާ ކޮރަޕްޝަންތަކާއި މަގާމުގެ ނުފޫޒު ނަހަމަ ގޮތުގައި ބޭނުންކުރުމުގެ މައްސަލަތައް ތަޙުލީލުކުރުމަށް ބާއްވާ ކޮންފަރެންސެއް ކަމަށެވެ.

މި ކޮންފަރެންސްގައި ގާނޫނީ ތަޖުރިބާކާރުންނާއި މަދަނީ މުޖުތަމަޢުގެ ލީޑަރުންނާއި ނޫސްވެރިން ވެސް ބައިވެރިވެވޭނެ ކަމަށް އެ އޮފީހުން ބުނެއެވެ. އަދި ކޮރަޕްޝަންގެ އަމަލުތަކަށް ފުޅާ ދާއިރާއެއްގައި ނަޒަރު ހިންގައި، އެކަންކަން ގަނޑަކަށް ތިރިކުރެވޭނެ ކަމަށް ނަޝީދުގެ އޮފީހުން ބުނެފައިވެއެވެ.

ކޮންފަރެންސްގެ މުހިންމު ބައެއްގެ ގޮތުގައި، ވިސްލްބްލޯވަރުންނާއި ކޮރަޕްޝަންގެ ޝިކާރައަކަށް ވެފައިވާ ފަރާތްތަކުގެ ހެކިބަސް ނެގުމާއި، ލިޔެކިޔުންތައް މުތާލިޔާކުރުން ހިމެނެއެވެ. މީގެ އިތުރުން، ގާނޫނީ އިޞްލާޙުތަކާއި ދެފުށްފެންނަ އިޖުރާޢަތުތަކާއި އުޞޫލުތައް އަދި ބައިނަލްއަޤްވާމީ އެހީތެރިކަން ހޯދުމާ ގުޅޭ އިސްތިރާޖީ މަޝްވަރާތައް ކުރެވޭނެ ކަމަށްވެސް ނަޝިދުގެ އޮފީހުން ބުނެއެވެ.

ނަޝީދު ވިދާޅުވީ، ކޮރަޕްޝަނަކީ ހަމައެކަނި ފައިސާ ވަގަށް ނެގުން ނޫން ކަމަށެވެ. "މި ވައްކަމުގައި ރައްޔިތުންގެ ކިބައިން ފޭރިގަނެވެނީ އަބުރާއި އިންސާފާއި އިއްޒަތް" ކަމަށް އެމަނިކުފާނު ފާހަގަކުރެއްވިއެވެ.

ކޮންފަރެންސްގައި އެމްއެމްއޭގެ ކުރީގެ ގަވަރުނަރު އަދި ކުރީގެ ފައިނޭންސް މިނިސްޓަރު ޢަލީ ހާޝިމާއި، އިކޮނޮމިކް ޑެވެލޮޕްމަންޓްގެ ކުރީގެ މިނިސްޓަރު މަޙްމޫދު ރާޒީގެ ބައިވެރިވުމާއި އެހީތެރިކަން ލިބޭނެ ކަމަށް ނަޝީދުގެ އޮފީހުން ބުންޏެވެ.

ކޮންފަރެންސް ބާއްވާނެ ތަނާއި ތާރީޚު އަދި އެޖެންޑާގެ އިތުރުން ރަޖިސްޓަރީކުރާނެ ގޮތުގެ ތަފްޞީލު އަންނަ ދުވަސްތަކުގައި އާންމުކުރާނެ ކަމަށް ނަޝީދުގެ އޮފީހުން ނެރުނު ބަޔާނުގައި ބުނެފައިވެ އެވެ.