ބީއެމްއެލް ކްރެޑިޓް ކާޑް އިން މަހަކު ބޭނުން ކުރެވޭ ޑޮލަރު ލިމިޓު ބޮޑު ކުރުމަށް ރައީސް ނިންމަވައިފި
ބޭންކް އޮފް މޯލްޑިވްސްގެ ކްލެސިކް ކާޑުގެ ލިމިޓް 750 ޑޮލަރުން 1400 ޑޮލަރަށް އިތުރު ކުރެވޭނެ
ބީއެމްއެލް އިން އޭޓީއެމް ނެޓްވޯކް ފާފު އަތޮޅުގައި ގާއިމް ކުރުމަށް ބޭއްވި ރަސްމިއްޔާތުގެ ތެރެއިން
1 ފެބްރުއަރީ 2026 އިން ފެށިގެން ބޭންކް އޮފް މޯލްޑިވްސް ގެ ކްލެސިކް ކާޑުގެ ލިމިޓް 750 ޑޮލަރުން 1400 ޑޮލަރަށް، ގޯލްޑް ކާޑުގެ ލިމިޓް 750 ޑޮލަރުން 1500 ޑޮލަރަށް، އަދި ޕްލެޓިނަމް ކާޑުގެ ލިމިޓް 1500 ޑޮލަރުން 2000 ޑޮލަރަށް ބޮޑު ކުރެވިގެންދާނެ ކަމަށް ރައީސް މުހައްމަދު މުއިއްޒު ވިދާޅުވެއްޖެ އެވެ.
ރައީސް މުއިއްޒުގެ ޕޯސްޓުގައި ވިދާޅުވީ މިކަން ކުރަން ހަމަ ޖެއްސެވީ ކްރެޑިޓް ކާޑް އިން މަހަކު ބޭނުން ކުރެވޭ ޑޮލަރު ލިމިޓު ބޮޑު ކުރުމަށް ސަރުކާރުން ކުރަމުންދާ މަސައްކަތުގެ ތެރެއިނ ކަމުގައެވެ.
ރައީސް މިހެން ވިދާޅުވީ އެކްސް ގައި ހޯމަ ދުވަހު ކުރެއްވި ޕޯސްޓެއްގައެވެ.
ކްރެޑިޓް ކާޑުގެ ލިމިޓް ބޮޑު ކުރުމުގެ ވާހަކަ އިއުލާނު ކުރެއްވުމުގެ އެއްދުވަސް ކުރިން އާދިއްތަ ދުވަހު ޕޭ ހާމަނައިޒޭޝަން ގެ ތެރެއިން މިހާތަނަށް މުސާރަ ބޮޑުވެފައިނުވާ ސިވިލް ސާރވިސް ހުރިހާ މުވައްޒަފުންނާއި، ޖުޑިޝަރީގެ ހުރިހާ މުވައްޒަފުން އަދި ކައުންސިލްތަކުގެ ހުރިހާ މުވައްޒަފުންގެ މުސާރަ މިއަހަރު ނޮވެމްބަރު 1 ގައި ހާމަނައިޒް ކުރެވި، މުސާރަ ބޮޑުވެގެންދާނެ ކަމަށް މުއިއްޒު ވަނީ އިއުލާނު ކުރައްވާފައެވެ.
މިއަހަރުގެ ރިޔާސީ ބަޔާނުގައި މި ފަރާތްތަކުގެ މުސާރަ މިއަހަރު ބޮޑުވެގެންދާނެ ކަމަށް ވާނީ ދަންނަވާފައި ކަމަށާއި އަދި ކުރިންވެސް ދަންނަވާފައިވާ ފަދައިން، މިއަހަރު މުސާރަ ބޮޑު ނުވާ ހުރިހާ މުއައްސަސާތަކެއްގެ ހުރިހާ މުވައްޒަފުންގެ މުސާރަ 2026 ގައި ބޮޑުވެގެންދާނެ ކަމަށް ވެސް މުއިއްޒު އެކްސްގައި ކުރެއްވި ޕޯސްޓެއްގައި ވިދާޅުވިއެވެ.
ސަރުކާރުގެ ކަންކަން ދޯދިޔާވެ، ރައްޔިތުންގެ ހައްގުތައް ގެއްލި ތަކެތީގެ އަގު މައްޗަށް އުފުލޭތީ އެކަމާ ނުރުހުން ފާޅު ކުރުަމަށް އަންނަ މަހު ގެ 3 ވަނަ ދުވަހު ބޮޑު އެއްވުމެެއް ބޭއްވުމަށް އެންމެ ބޮޑު އިދިކޮޅު ޕާޓީން އަންނަނީ ތައްޔާރުވަމުންނެވެ.
