މެދުއިރުމަތީގެ މައްސަލަ އަށް ޚާއްސަ ޙައްލެއް ލިބިދާނެ: ޓްރަމްޕް

މެދު އިރުމަތީގެ ހަނގުރާމައިގެ މައްސަލަ އަށް އެންމެހާ ފަރާތްތަކުން ޤަބޫލު ކުރާ ފެންވަރުގެ ޙައްލެއް ލިބިދާނެ ކަމަށް، އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ޓްރަމްޕް މިހެން ވިދާޅުވެފައި ވަނީ، އޭނާއާ ބައްދަލު ކުރައްވަން އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ އެމެރިކާގެ ރިޔާސީ ގަނޑުވަރު، ވައިޓް ހައުސް އަށް ވަޑައިގަންނަވާ ދަތުރުގެ ކުރިންނެވެ. ޓްރަމްޕްގެ ރިޔާސީ ދެ ވަނަ ދައުރުގައި އެންމެ ގިނައިން ވައިޓް ހައުސް އަށް ވަޑައިގަންނަވާ ލީޑަރަކީ ނަތަންޔާހޫ އެވެ.

ޓްރަމްޕްގެ އޭނާގެ ޓުރުތު ސޯޝަލް މީޑިއާގައި ކޮށްފައިވާ ޕޯސްޓުގައި ވިދާޅުވެފައި ވަނީ، މެދު އިރުމަތީގެ މައްސަލައިގައި އެމެރިކާ އަށް ހަގީގީ ފުރުސަތެއް ލިބިފައިވާ ކަމަށެވެ. އޭނާ ވިދާޅުވީ އެ މައްސަލަތައް ހައްލު ކުރުމަށް މަޝްވަރާތައް ކޮށްފައިވާ ކަމަށާއި، ހުރިހާ ފަރާތްތަކުން ވެސް އެކަމަށް އެއްބަސްވެފައިވާ ކަމަށެވެ. އެހެންކަމުން، އެ މައްސަލަ ހައްލު ކުރުމަށް ކުރަމުން އަންނަ މަސައްކަތް ކާމިޔާބު ކުރާނެ ކަމުގައި ޓްރަމްޕް ވިދާޅުވެފައިވެ އެވެ.

މީގެ ކުރިން ހުކުރު ދުވަހު ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވެފައި ވަނީ، އިސްރާއީލް އިން ޣައްޒާގައި ހިންގަމުން އަންނަ ހަނގުރާމަ ހުއްޓުވުމުގެ މައްސަލައިގައި އެއްބަސްވުމަކަށް އާދެވިފައިވާ ކަމަށެވެ. އެ އެއްބަސްވުމުގެ ދަށުން، ހަމާސް ޖަމާއަތުގެ ބެލުމުގެ ދަށުގައި ތިބި ރަހީނުން މިނިވަން ކުރުމާ އެކު، ހަނގުރާމަ އެއްކޮށް ނިމުމަކަށް އަންނާނެ ކަމަށް ވެސް ޓްރަމްޕް ވިދާޅުވެފައިވެ އެވެ.

އދ ގެ ޖެނަރަލް އެސެމްބްލީގައި ބައިވެރިވެ ވަޑައިގެންނެވި އަރަބި އަދި މުސްލިމް ޤައުމު ތަކުގެ ލީޑަރުންނާ އެކު ޓްރަމްޕް ވަނީ ބައްދަލު ކުރައްވައިފަ އެވެ. އެ މަޝްވަރާ ތަކުގައި ޓްރަމްޕް ވަނީ 21 ނުކުތާގެ މައްޗަށް އެކުލެވިގެންވާ ޕްލޭނެއް ހުށަހަޅުއްވައިފަ އެވެ. އެ ޕްލޭންގައި ގިނަ ކަންތައްތަކެއް ހިމެނޭއިރު، އެއީ އެންމެނަށް ވެސް ބަަލައި ގަނެވޭ ޕްލޭނެއް ކަމަށް ބައެއް ފަރާތްތަކުން ވަނީ ފާހަގަ ކޮށްފަ އެވެ.

އެކަންކަމާ ގުޅޭ ގޮތުން ފޮކްސް ނިއުސްއާ ވާހަކަ ދައްކަމުން ނަތަންޔާހޫ ވިދާޅުވެފައި ވަނީ، އިސްރާއީލް އިން މަސައްކަތް ކުރަމުން އަންނަނީ އެ ޤައުމުގެ ރައްޔިތުން މިނިވަން ކުރުމަށް ކަމަށާއި، އެކަން ކުރެވޭނެ ކަމަށް ޤަބޫލު ކުރާ ކަމަށެވެ. އަދި ހަމާސް ޖަމާއަތުގެ ވެރިކަން ނިމުމަކަށް ގެނެސް، އެ ޖަމާއަތުގެ ހަތިޔާރުތައް ނައްތާލައި، ޣައްޒާގެ ރައްޔިތުންނާއި، އިސްރާއީލްގެ ރައްޔިތުންނަށް އައު މުސްތަޤުބަލެއް ގެންނާނެ ކަމަށް ވެސް އޭނާ ވިދާޅުވެފައިވެ އެވެ.

އިސްރާއީލް އިން ޣައްޒާގައި ހިނގަމުން އަންނަ ހަނގުރާމައިގައި މިހާތަނަށް ވަނީ ޣައްޒާ އިން 66،000 އަށް ވުރެ ގިނަ މީހުން ޝަހީދު ކޮށްލައިފަ އެވެ. އަދި މިހާރު އިސްރާއީލް އިން އަންނަނީ ޣައްޒާ ހަނގުރާމަ ފުޅާކޮށް، މުޅި ޣައްޒާ އެ މީހުންގެ ބާރުގެ ދަށަށް ގެނައުމަށް އިތުރު ހަމަލާތައް ދެމުންނެވެ.