ލިލީ ހޯލްސޭލް ފިހާރައެއްގައި ރޯވެ ބޮޑެެތި ގެއްލުންތަކެއް ވެއްޖެ
މާލޭ މަސްމާރުކޭޓް ކައިރީގައި ހުންނަ ލިލީ އެފްއެންބީ ސަޕްލައި ބާޒާރު 1 ގައި ހޮނިހިރު ދުވަހުގެރޭ ހިނގި އަލިފާނުގެ ހާދިސާއިން ފިހާރައަށް ބޮޑެތި ގެއްލުންތަކެއް ލިބުނު
ލިލީގެ ބާޒާރުމަތީ ފިހާރައިގައި ރޯވި އަލިފާންގަނޑު ނިއްވާލަން ސިފައިން ހަރަކާތްތެރިވަނީ
މާލޭ މަސްމާރުކޭޓް ކައިރީގައި ހުންނަ "ލިލީ އެފްއެންބީ ސަޕްލައި ބާޒާރު 1" ގައި ހޮނިހިރު ދުވަހުގެރޭ ހިނގި އަލިފާނުގެ ހާދިސާއެއްގައި ގިނަ މުދާތަކެއް އަނދައި ފިހާރައަށް ބޮޑެތި ގެއްލުންތަކެއް ވެއްޖެއެވެ.
އެމްއެންޑީއެފުން މައުލޫމާތު ދިން ގޮތުގައި، އަލިފާނުގެ ހާދިސާ ހިނގަމުންދާ ކަމުގެ ރިޕޯޓް ލިބުނީ ހޮނިހިރު ދުވަހުގެރޭ މެންދަމުން އަލިވެ، 1:00 ހާއިރުއެވެ. އެ ހާދިސާގެ މައުލޫމާތު ލިބުމާއެކު، ފަޔާ އެންޑް ރެސްކިއު ސަރވިސްގެ އޮފިސަރުން ވަގުތުން އެ ސަރަހައްދަށް ގޮސް ކުރި މަސައްކަތުން އަލިފާން ނިއްވާލެވުނީ ރޭ 2:39 ހާއިރުއެވެ.
މި ހާދިސާގައި ރާއްޖެއަށް ގިނަ އަދަދެއްގެ މުދާ އިމްޕޯޓްކޮށް، ހޯލްސޭލް އަދި ރީޓެއިލްކޮށް ފުޅާ ދާއިރާއެއްގައި ވިޔަފާރިކުރާ ލިލީގެ މި ފިހާރައިގެ ގިނަ މުދަލަށް ގެއްލުންވެ، ފުރާޅުން ބައެއް ވަނީ ވެއްޓިފައެވެ. އަލިފާން ނިއްވުމުގެ މަސައްކަތުގައި ހަރަކާތްތެރިވި ސިފައިންގެ އޮފިސަރަކު ހާލު ދެރަވުމާ ގުޅިގެން ސެނަހިޔާ ހޮސްޕިޓަލަށް ގެންގޮސް ފަރުވާ ދީފައިވާ ކަމަށް އެމްއެންޑީއެފުން ބުންޏެވެ. ނަމަވެސް އެ ސަރަހައްދުން އިތުރު މީހަކަށް އަނިޔާވިކަމުގެ މައުލޫމާތެއް ލިބިފައެއް ނުވެއެވެ.
މި ހާދިސާ ހިނގަން މެދުވެރިވި ސަބަބު އަދި ވަނީ ނޭނގިއެވެ. އަދި މިކަމާ ގުޅޭ އިތުރު ތަހުގީގުތައް ކަމާބެހޭ ފަރާތްތަކުން ކުރިއަށްދާ ކަމަށް ބެލެވެއެވެ.
ފާހަގަކޮށްލެވޭ ކަމަކީ، މީގެ ކުރިން ވެސް މާފަންނު ސަރަހައްދުގައި ހުރި ލިލީގެ ޓިނުން ހަދާފައިވާ ގުދަނެއްގައި އަލިފާނުގެ ހާދިސާއެއް ހިނގާފައިވާކަމެވެ. މިފަދަ ހާދިސާތަކުން ރައްކާތެރިވުމަށްޓަކައި އިތުރު ސަލާމަތީ ފިޔަވަޅުތައް އަޅަން ޖެހިފައިވާކަން މި ހާދިސާއިން ވަނީ ހާމަވެފައެވެ.
