އިސްރާއީލް އިން ޔުކްރެއިން އަށް ޕެޓްރިއޮޓް މިސައިލް ހަދިޔާ ކޮށްފި

އިސްރާއީލްގެ ފަރާތުން، ޔުކްރެއިން އަށް ޕެޓްރިއޮޓް މިސައިލްގެ ދިފާއީ ނިޒާމު ހަދިޔާ ކޮށްފައިވާ ކަމަށް، ޔުކްރެއިންގެ ރައީސް ވުލޮޑިމިއަރ ޒެލެންސްކީ ވިދާޅުވެއްޖެ އެވެ.

ހޮނިހިރު ދުވަހު ޒެލެންސްކީ ވިދާޅުވެފައިވާ ގޮތުގައި، އެމެރިކާ އިން އުފައްދާފައިވާ ޕެޓްރިއޮޓް މިސައިލްގެ ދިފާއީ ނިޒާމެއް އިސްރާއީލް އިން ވަނީ ޔުކްރެއިން އަށް ދީފަ އެވެ. އަދި އެއީ މީގެ މަހެއްހާ ދުވަސް ކުރިން ފޯރުކޮށްދީފައިވާ ތަކެތި ކަމަށް ވެސް ޒެލެންސްކީ ވިދާޅުވި އެވެ.

އެކަން ފާހަގަ ކުރައްވައި ޒެލެންސްކީ ވިދާޅުވީ، ކުރިއަށް އޮތް މަސް ތަކުގެ ތެރޭގައި އިތުރު ދެ ޕެޓްރިއޮޓް މިސައިލްގެ ނިޒާމު ލިބޭނެ ކަމަށް އުންމީދު ކުރެވޭ ކަމަށެވެ.

ޔުކްރެއިން އިން އަންނަނީ އެ ޤައުމުގެ ވައިގެ ދިފާއީ ނިޒާމު ވަރުގަދަ ކުރުމުގެ މަސައްކަތް ވަރަށް ބޮޑަަށް ކުރަމުންނެވެ. އެއީ ދުވާލަލު އެތައްް ފަހަރެއްގެ މަތިން ރަޝިޔާ އިން ޔުކްރެއިން އަށް ޑްރޯން އަދި މިސައިލް ހަމަލާ ދެމުން އަންނާތީ އެވެ.

ޒެލެންސްކީ ވިދާޅުވެފައި ވަނީ، އިސްރާއީލް އިން ފޯރުކޮށްދީފައިވާ ޕެޓްރިއޮޓް މިސައިލްގެ ނިޒާމު މިހާރު ޔުކްރެއިން އަންނަނީ ބޭނުން ކުރަމުން ކަމަށެވެ. މިކަން ޒެލެންސްކީ ހާމަ ކުރައްވާފައި ވަނީ، އދ ގެ ޖެނަރަލް އެސެމްބްލީގައި ބައިވެރިވެ ވަޑައި ގަތުމަށް އެމެރިކާ އަށް ވަޑައިގެން، އެ ޤައުމުގެ ރައީސް ޑޮނަލްޑް ޓްރަމްޕްއާ ބައްދަލު ކުރެއްވުމަށް ފަހު އެވެ.

ރަޝިޔާ އިން ޔުކްރެއިންއާ ދެކޮޅަށް ކުރަމުން އަންނަ ހަނގުރާމައުގައި، ހުޅަނގުގެ ޤައުމު ތަކުން ރަޝިޔާއާ ދެކޮޅަށް ގިނަ ފިޔަވަޅު ތަކެއް އެޅި ނަމަވެސް، އިސްރާއީލް އިން ގެންގުޅިފައި ވަނީ މެދު މިނުގެ ސިޔާސަތެކެވެ. ނަމަވެސް، ރަޝިޔާ އިން އީރާންއާ ގުޅުން ބަަދަހި ކުރަން ފެށުމާާއި، ޣައްޒާ ހަނގުރާމައިގައި އިސްރާއީލް އަށް ފާޑު ކިޔަން ފެށުމާ އެކު، އިސްރާއީލް އާއި ރަޝިޔާގެ ގުޅުން ވަނީ ހީނަރުވެފަ އެވެ.

އިތުރަށް ވާހަކަ ދައްކަވަމުން ޒެެލެންސްކީ ވިދާޅުވެފައި ވަނީ އޮކްޓޫބަރު މަހު އެމެރިކާ އަދި ޔުކްރެއިންގެ ވަފުދުތަކުން އެކި ޕްރޮގްރާމް ތަކުގެ ދަށުން ހަތިޔާރު ގަތުމާ ގުޅޭ ގޮތުން އެތައް ބައްދަލުވުމެއް ބާއްވާނެ ކަަމށެވެ.