ފްރާންސްގެ ދަރަނި ހަތަރު ޓްރިލިއަން ޑޮލަރަށް، އައު ބޮޑު ވަޒީރަށް ގޮންޖެހުން އިތުރުވެއްޖެ

ފްރާންސްގެ ދަރަނި ހަތަރު ޓްރިލިއަން ޑޮލަރަށް އަރައި، އައު ބޮޑު ވަޒީރު ސެބަސްޓިއަން ލެކޯނޫ އަށް ގޮންޖެހުންތައް އިތުރުވެއްޖެ އެވެ.

ފްރާންސްގެ މާލީ ތަފާސް ހިސާބުތައް ދައްކާ ގޮތުގައި، އެ ޤައުމުގެ ދަރަނި ވަނީ ރެކޯޑު މިންވަރަކަށް އަރައިފަ އެވެ. އެގޮތުން ފްރާންސްގެ ދަރަނި ހަތަރު ޓްރިލިއަން ޑޮލަރު، ނުވަތަ 3.4 ޓްރިލިއަން ޔޫރޯ އަށް ވަނީ އަރައިފަ އެވެ. އެއާއެކު މިއީ، ފްރާންސްގެ އައު ބޮޑު ވަޒީރު ލެކޯނޫ އަށް ކުރިމަތިވެފައިވާ ބޮޑު ގޮން ޖެހުމަކަށް ވާނެ އެވެ.

އިންސީ ސްޓެޓިސްޓިކްސް އެޖެންސީ އިން ހާމަ ކޮށްފައިވާ ތަފާސް ހިސާބުތައް ދައްކާ ގޮތުގައި، މިއަހަރުގެ ދެ ވަނަ ކުއާޓަރުގައި ފްރާންސްގެ ދަރަނި އެ ޤައުމުގެ ޖީޑީޕީގެ 115.6 އިންސައްތަ އަށް އަރާފައިވެ އެވެ. މިއީ މިއަހަރުގެ މާޗު މަހުގެ ތެރޭގައި ރެކޯޑު ކުރެވުނު 3.3 ޓްރިލިއަން ޔޫރޯ، ނުވަތަ ޖީޑީޕީގެ 113.9 އިންސައްތަ އަށް ވުރެ މަތީ އަދަދެކެވެ.

ފްރާންސްގެ ދިފާއީ ވަޒީރު ކަމުގައި މީގެ ކުރިން ހުންނެވި ލެކޯނޫ، އެ ޤައުމުގެ ބޮޑު ވަޒީރު ކަމަށް އައްޔަން ކުރައްވާފައި ވަނީ މި ހިނގާ ސެޕްޓެމްބަރު މަހުގެ ކުރީ ކޮޅު އެވެ. އެއީ އޭނާގެ ކުރިން ބޮޑު ވަޒީރު ކަމުގައި ހުންނެވި ފްރާންސުއާ ބެއިރޫގެ އިތުބާރު ނެތް ކަމަށް ޤާނޫނު ހަދާ މަޖިލީހުން ފާސްކޮށް، އޭނާގެ ސަރުކާރު ވައްޓާލުމާ ގުޅިގެންނެވެ. ބޮޑު ވަޒީރު ކަމުގައި ބެއިރޫ އަށް ހޭދަ ކުރެވުނީ އެންމެ ނުވަ މަސް ދުވަހެވެ.

ބޮޑު ވަޒީރު ކަމަށް ވަޑައިގެންނެވުމާ އެކު، ލެކޯނޫ އަށް އޮތީ ބަޖެޓު ހުށަހެޅުމުގެ ޒިންމާ އުފުލަން ޖެހިފަ އެވެ. އޮކްޓޫބަރު މަހުގެ މެދާ ހަމައިން ބަޖެޓު ހުށަހަޅަން ޖެހޭއިރު ވެސް، އަދި ލެކޯނޯ އަށް އޭނާގެ ސަރުކާރު އެކުލަވާލެވިފައި ނުވެ އެވެ.

ފްރާންސްގެ އިޤްތިޞާދީ ޙާލަތު ނާޒުކު ފައްތަރެއްގައި އޮތްއިރު، އެ ޤައުމުގެ ރައީސް އިމަނުއެލް މެކްރޮންގެ އިޤްތިޞާދީ ސިޔާސަތުތަކާ ދެކޮޅަށް އެތައް ހާސް ބަޔަކު ވަނީ މަގުތަކަށް ނިކުމެ މުޒާހަރާ ކޮށްފަ އެވެ. އެ މުޒާހަރާ އިންތިޒާމު ކުރި ޔޫނިއަން އިން ވަނީ، އޮކްޓޫބަރު މަހުގެ ދެ ވަނަ ދުވަހު އިތުރު މުޒާހަރާއެއް އޮންނާނެ ކަމަށް އިއުލާން ކޮށްފަ އެވެ.

ލެކޯނޫ އަކީ، ފްރާންސްގެ ރައީސް ކަމުގެ މަޤާމަށް 2017 ވަނަ އަހަރު މެކްރޮން އިންތިޚާބުވެ ވަޑައިގެންނެވި ފަހުން އެ ޤައުމުގެ ބޮޑު ވަޒީރު ކަމަށް ވަޑައިގެންނެވި ހަތް ވަނަ ފަރާތެވެ. ބޮޑު ވަޒީރު ކަމަށް ވަޑައިގެންނެވުމަށް ފަހު ލެކޯނޫ ވަނީ ފްރާންސްގެ ސިޔާސީ ހަމަ ނުޖެހުން ކުޑަ ކުރުމަށް އައު ސިޔާސަތު ތަކެއް ގެންގުޅުއްވާނެ ކަމަށް ވައުދުވެ ވަޑައިގެންފަ އެވެ.

އޭގެ ތެރޭގައި ކުރިން ބޮޑު ވަޒީރުކަން ކުރައްވާފައި ތިއްބަވާ ފަރާތްތަކަށް އުމުރު ދުވަހަށް ލިބިގެންދާ އިމްތިޔާޒުތައް އުވާލައި، ރަސްމީ ބަންދު ދެ ދުވަސް އުވާލުމަށް ބެއިރޫ ހުށަހަޅުއްވާފައިވާ ޕްލޭން ހުއްޓުވުން ފަދަ ކަންކަން ހިމެނެ އެވެ.

ކުރިން ބޮޑު ވަޒީރު ކަމުގައި ހުންނެވި ބެއިރޫ ހުށަހަޅުއްވާފައިވާ ޕްލޭންގައި 44 ބިލިއަން ޔޫރޯ، ނުވަތަ 52 ބިލިއަން އެމެރިކާ ޑޮލަރު ސަލާމަތް ކުރުމަށް އަމާޒުކޮށް، ފްރާންސްގެ މަތީ ދަރަނި ކުޑަ ކުރުމަށް ފިޔަވަޅުތައް އެޅުމަށް ވަނީ ހުށަހަޅުއްވައިފަ އެވެ.