އެމެރިކާގެ ރައީސް ޑޮނަލްޑް ޓްރަމްޕް، އޭނާގެ އަނބިކަނބަލުން މެލާނިއާ ޓްރަމްޕް އަށް އިނގިލި ދިއްކުރައްވައި ދެއްކެވި ވާހަކަ އަށް ގިނަ ބައެއްގެ ސަމާލުކަން ލިބިއްޖެ އެވެ.

އދ ގެ ޖެނަރަލް އެސެމްބްލީގައި ބައިވެރިވެ ވަޑައިގެންނެވުމަށް ފަހު، އެނބުރި ވޮޝިންޓަން ޑީސީ އަށް ހެލިކޮޕްޓަރުގައި ވަޑައިގެންނެވިއިރު، ޓްރަމްޕް އާއި މެލޭނިއާއާ ދެމެދު ވަނީ ވާހަކަ ތަކެއް ދެކެވިފަ އެވެ. ސޯޝަލް މީޑިއާގައި ދައުރު ވަމުން އަންނަ ވީޑިއޯ ތަކުން ފެންނަ ގޮތުގައި، ޓްރަމްޕް މެލޭނިއާއާ ވާހަކަ ދައްކަވަނީ އިނގިލި ދިއްކުރައްވައިގެންނެވެ.

އެކަމާ ގުޅިގެން ބައެއް ފަރާތްތަކުން ބުނެފައި ވަނީ، ޓްރަމްޕް އާއި މެލޭނިއާއާ ދެމެދު ކޮންމެ ވެސް ވަރެއްގެ ދެބަސްވުމެއް ހިނގާފައިވާ ކަމަަށެވެ. އަދި ޓްރަމްޕް މެލޭނިއާއާ ވާހަކަ ދައްކަވާފައި ވަނީ ނުރުހުންވެ ހުންނަވައިގެން ކަމަށް ބައެއް ފަރާތްތަކުން ބުނެފައިވެ އެވެ.

އެހެން ނަމަވެސް، ހެލިކޮޕްޓަރުން ފައިބައި ވަޑައިގެންނެވުމަށް ފަހު، ޓްރަމްޕް އާއި މެލާނިއާ ރިޔާސީ ގަނޑުވަރު ވައިޓް ހައުސް އަށް ވަޑައިގެންނެވީ އެކުގަ އެވެ. ހިންގަވާފައި ވަޑައިގެންނެވިއިރު، ޓްރަމްޕް ހުންނެވީ މެލާނިއާގެ އަތުގައި ހިއްޕަވައިގެންނެވެ.

އެކަމާ ގުޅިގެން އިނގިރޭސިވިލާތުގެ ލިޕް ރީޑާ ޖެރެމީ ފްރީމަން ބުނެފައި ވަނީ، ޓްރަމްޕް އާއި މެލާނިއާ ވާހަކަ ދައްކަވާފައި ވަނީ އދ ގައި ހިނގި ކަންތައްތަކާ ގުޅޭ ގޮތުން ކަމަށެެވެ. އެގޮތުން ޓްރަމްޕް އާއި މެލާނިއާ އދ ގައި ހުރި އެސްކަލޭޓަރަށް އަރައި ވަޑައިގެންނެވި ވަގުތު، އެސްކަލޭޓަރު ހުއްޓުނު ހާދިސާގެ ވާހަކަ ދެއްކެވީ ކަމަށް އޭނާ ބުންޏެވެ.

އޭނާގެ އިތުރުން، ނިކޯލާ ހިކްލިން ބުނެފައިވާ ގޮތުގައި މެލޭނިއާ އަށް އިޝާރާތް ކުރައްވައި ޓްރަމްޕް ވިދާޅުވެފައި ވަނީ، އދ ގައި ހިނގި ކަންތަކުގައި އެ މީހުންނަށް މައާފު ނުކުރެވޭނެ ކަމަށެވެ. އަދި އެސްކަލޭޓަރު ހުއްޓުވައިގެން މަސައްކަތް ކުރީ މެލާނިއާ އަށް އަނިޔާއެއް ދެއްވަން ކަމަށް ޓްރަމްޕް ވިދާޅުވާ ކަމަށް ހިކްލިން ބުންޏެވެ.

ޓްރަމްޕްގެ އެ ވާހަކަތަކާ ގުޅިގެން މެލާނިއާ ވިދާޅުވެފައިވާ ކަމަށް ހިކްލިން ބުނެފައި ވަނީ، އޭނާ އާއި ޓްރަމްޕް އަށް އެހެން ކަންތައް ނުކުރެވޭނެ ކަމަށެވެ. އަދި ޓްރަމްޕް އާއި މެލާނިއާ ރައްކާތެރިވާން ޖެހޭ ކަމަށް ވިދާޅުވެފައިވާ ކަމަށާއި، މިވަގުތު ޓްރަމްޕް ރައްކާތެރި ނޫން ކަމަށް ވެސް މެލޭނިއާ ވިދާޅުވެފައިވާ ކަމަށް ހިކްލިން ބުނެފައިވެ އެވެ.

އދ ގައި ހިނގައި ދިޔަ ކަންތައްތަކާ ގުޅޭ ގޮތުން ޖެނަރަލް އެސެމްބްލީގައި ވާހަކަ ދައްކަވަމުން ޓްރަމްޕް ވިދާޅުވެފައި ވަނީ، އދ އިން އޭނާ އަށް ލިބުނީ ދެ އެއްޗެއް ކަމަށެވެ. އެއީ ހަލާކުވެފައިވާ އެސްކަލޭޓަރެއްގެ އިތުރުން، މައްސަލަ ޖެހިފައިވާ ޓެލްޕްރޮމްޓަރެއް ކަމަށް ޓްރަމްޕް ވިދާޅުވެފައިވެ އެވެ.

އދ ގައި ޓްރަމަޕް ތަޤުރީރު ކުރައްވަމުން ގެންދަވަނިކޮށް އޭނާގެ ކުރިފުޅު މަތީގައި ހުރި ޓެލްޕްރޮމްޓަރު ވެސް ވަނީ މައްސަލަ ޖެހި ހުއްޓިފަ އެވެ. ނަމަވެސް، ވާހަަކަފުޅު ކުރިއަށް ގެންދަވަމުން ޓްރަމްޕް ވަނީ އެކަން ވެސް ފާހަގަ ކުރައްވައިފަ އެެވެ. އަދި ޓެލްޕްރޮމްޓަރު އޮޕަރޭޓު ކުރަން ހުރި މީހާ އަށް ބޮޑު އުނދަގުލެއް ޖެހޭނެ ކަމަށް ވެސް ވިދާޅުވި އެވެ.