ޣައްޒާ ހަނގުރާމަ ނިންމުމުގެ އެއްބަސްވުމަކަށް އާދެވިއްޖެ ކަމަށް ޓްރަމްޕް ވިދާޅުވެއްޖެ

އިސްރާއީލް އިން ޣައްޒާގައި ހިންގަމުން އަންނަ ހަނގުރާމަ ނިންމުމަށް ކުރަމުން އަންނަ މަސައްކަތުގައި، އެއްބަސްވުމަކާ ހަމައަށް އާދެވިފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

އެމެރިކާގެ ރިޔާސީ ގަނޑުވަރު، ވައިޓް ހައުސްގައި ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވީ، ހަނގުރާމަ ނިންމުމުގެ އެއްބަސްވުމަކަށް އާދެވިފައިވާ ކަމަށެވެ. މިފަދައިން ޓްރަމްޕް ވިދާޅުވެފައިވާއިރު، މި ފަހުން ޓްރަމްޕް ވަނީ އިސްރާއީލްގެ އިތުރުން، ޢަރަބި ޤައުމު ތަކުގެ އިސްވެރިންނާ އެކު ވެސް ބައްދަލު ކުރައްވައިފަ އެވެ.

ހަނގުރާމަ ނިންމުމަށް ވަރަށް ބޮޑަށް ވަކާލާތު ކުރައްވަމުން އަންނަ ޓްރަމްޕް ވިދާޅުވީ، އޭނާ އަށް ހީވާ ގޮތުގައި ހަނގުރާމަ ހުއްޓާލުމުގެ އެއްބަސްވުމަކަށް ވާސިލުވެފައިވާ ކަމަށެވެ. އަދި މިހާރު ކަންކަން ފެންނަ ގޮތުން ޣައްޒާއާ ގުޅޭ އެއްބަސްވުމެއް ވެވޭނެ ކަމަށް ވެސް ޓްރަމްޕް ވިދާޅުވި އެވެ.

ހަމަ އެހެންމެ، އެ އެއްބަސްވުމުގެ ދަށުން ހަމާސް ޖަމާއަތުން ރަހީނު ކޮށްފައިވާ އިސްރާއީލްގެ ރައްޔިތުން މިނިވަން ކުރުމާ އެކު، ހަނގުރާމަ ނިމުމަކަށް އަންނާނެ ކަމުގެ ވަރަށް ބޮޑު ޔަގީން ކަމެއް ވެސް އޮތް ކަމަށް ޓްރަމްޕް ވަނީ ވިދާޅުވެފަ އެވެ.

ޓްރަމްޕް މިހެން ވިދާޅުވެފައިވާއިރު، އިސްރާއީލް އިން ޣައްޒާގައި ހިންގަމުން އަންނަ ހަނގުރާމަ ނިމުމަކަށް ގެނައުމަށް އެމެރިކާ އިން ބާރު އަޅަ އެވެ. އަދި މިޞްރާއި، ޤަތަރު މެދުވެރިވެގެން ކުރިއަށް ގެންދާ މަޝްވަރާ ތަކަކީ އެމެރިކާ އިން ހުށަހަޅާފައިވާ ހުށަހެޅުމުގެ މަޝްވަރާތަކެވެ. ނަމަވެސް، އެމެރިކާ އަކީ އިސްރާއީލް އަށް އެންމެ ބޮޑަށް ވާގިވެރި ވަމުން އަންނަ ޤައުމެވެ.

އެއްބަަސްވުމަކަށް އާދެވިފައިވާ ކަމަށް ޓްރަމްޕް ވިދާޅުވެފައި ވީ ނަމަވެސް، އެކަމާ ގުޅޭ އިތުރު އެހެން އެއްވެސް ތަފްސީލެއް ހާމަކޮށްފައި ނުވެ އެވެ. ޓްރަމްޕްގެ ވާހަކަތަކާ ގުޅިގެން ހަމާސް ޖަމާއަތް، ނުވަތަ އިސްރާއީލް އިން ވެސް މިހާތަނަށް ވަކި އެއްޗެއް ބުނެފައި ނެތެވެ.

ޣައްޒާގައި ހިންގަމުން އަންނަ ހަނގުރާމަ ނިމުމަކަށް ގެނައުމަކީ އެމެރިކާގެ ރައީސް ޓްރަމްޕްގެ އެންމެ ބޮޑު އެއް ވައުދެވެ. މިދިޔަ އަހަރު އޮތް އެމެރިކާގެ ރިޔާސީ އިންތިޚާބުގައި އޭނާ ވަނީ، ޣައްޒާ ހަނގުރާމަ ނިމުމަކަށް ގެންނާނެ ކަމަށް ވައުދުވެ ވަޑައިގެންފަ އެވެ. ނަމަވެސް، ޓްރަމްޕްގެ ސަރުކާރަށް މިހާތަނަށް އަށް މަސް ދުވަސް ވެފައިވާއިރު، އެކަމުގައި އެއްވެސް ކާމިޔާބެއް ހޯދިފައި ނުވެ އެވެ.