ސްޕެނިޝް ލީގުގައި ލެވަންޓޭއާ ދެކޮޅަށް ކުޅުނު މެޗުން މޮޅުވެ، ރެއާލް މެޑްރިޑް އިން އެ ޓީމުގެ މޮޅުވުމުގެ ސިލްސިލާ ދަމަހައްޓައިފި އެވެ.

ލެވަންޓޭގެ ދަނޑުގައި އަންގާރަ ދުވަހުގެ ރޭ ކުޅުނު މެޗު ރެއާލް އިން ކާމިޔާބު ކުރީ 4-1 އިންނެވެ.މެޗުގެ ފުރަތަމަ ހާފުގައި ރެއާލް އިން ދެ ލަނޑު ޖެހިއިރު، ފަހު ހާފުގައި ވަނީ އަނެއް ދެ ލަނޑު ޖަހައިފަ އެވެ. ލެވަންޓޭގެ ހަމައެކަނި ލަނޑު އެ ޓީމުން ޖެހީ ދެ ވަނަ ހާފުގަ އެވެ.

މެޗުގެ ފުރަތަމަ ހާފުގެ 28 ވަނަ މިނެޓުގައި ރެއާލް އަށް ލީޑު ނަގައިދިނީ ވިނީޝިއުސް ޖޫނިއާ އެވެ. އޭނާ އެ ލަނޑު ޖެހީ ފެޑެރިކޯ ވަލްވާޑޭ ތަނަވަސްކޮށްދިން ފުރުސަތެއްގަ އެވެ. އޭގެ ފަހުން 38 ވަނަ މިނެޓުގައި ރެއާލްގެ ދެ ވަނަ ލަނޑު ޖަހައި ލީޑު ފުޅާ ކޮށްދިނީ ފްރާންކޯ މަސްޓަންޓޫނޯ އެވެ. އެއީ ވިނީޝިއުސް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

މެޗުގެ ދެ ވަނަ ހާފު ފަށައިގެން ކުރީ ކޮޅު ލެވަންޓޭގެ ހަމައެކަނި ލަނޑު ޖެހީ އެޓާ އެޔޯން އެވެ. އޭގެ ފަހުން މެޗުގައި ރެއާލް އިން ވަނީ އިތުރު ދެ ލަނޑު ޖަހައިފަ އެވެ. ރެއާލްގެ ފަހު ދެ ލަނޑު ވެސް ޖެހީ ފްރާންސްގެ ކެޕްޓަން ކީލިއަން އެމްބާޕޭ އެވެ. އޭގެ ތެރެއިން ފުރަތަމަ ލަނޑަކީ އެމްބާޕޭ ޕެނަލްޓީ އަކުން ޖެހި ލަނޑެކެވެ.

މެޗަށް ފަހު ވާހަކަ ދައްކަމުން ރެއާލްގެ ކޯޗު ޒަބީ އަލޮންސޯ ބުނެފައި ވަނީ، ރެއާލް ކުރިއަށް ދަނީ ބޭނުންވާ މިސްރާބުގައި ކަމަށާއި، މިހާތަނަށް ކުރި މަސައްކަތްތައް ކާމިޔާބު ކަމަށެވެ. އޭނާ ބުނީ ރެއާލް އެ ޓީމުގެ އެންމެ ފުރިހަމަ ގޮތުގައި އަދި ފެންނާނެ ކަމަށާއި، މިހާރު ކުރިއަށްދާ ގޮތަށް ކުރިއަށް ގޮސްފި ނަމަ ވަރަށް އަވަހަށް އެކަން ފެންނާނެ ކަމަށެވެ.

ލެވަންޓޭ މެޗުގައި ރެއާލްގެ ކުޅުންތެރިންގެ ފަރާތުން ފެނުނު ކުޅުން ފާހަގަ ކުރަމުން އަލޮންސޯ ވަނީ، ވިނީޝިއުސް ދެއްކި ކުޅުމަށް ވަރަށް ބޮޑަށް ތައުރީފު ކޮށްފަ އެވެ. ޚާއްސަކޮށް އިދިކޮޅު ޓީމަށް ނުރައްކާވާ ގޮތަށް ވިނީޝިއުސް ދައްކަމުން އަންނަ ކުޅުމަކީ ފުރިހަމަ ކުޅުމެއް ކަމަށް އޭނާ ބުންޏެވެ.

މޮޅާއެކު ރެއާލް އެއް ވަނައިގައި އޮތީ މިހާތަނަށް ކުޅެފައިވާ ހަ މެޗުން ވެސް މޮޅުވެ 18 ޕޮއިންޓާ އެކު އެވެ.