ޣައްޒާގެ މައްސަލައާ ގުޅޭ ގޮތުން އިސްލާމީ ޤައުމުތަކުގެ ވެރިންނާ ޓްރަމްޕް ބައްދަލު ކުރައްވަނީ

އިސްރާއީލް އިން ޣައްޒާގައި ހިންގަމުން އަންނަ ހަނގުރާމައާ ގުޅިގެން، ޣައްޒާގެ ޙާލަތާ މެދު އިސްލާމީ ޤައުމު ތަކުގެ އިސްވެރިންނާ ބައްދަލު ކުރުމަށް އެމެރިކާގެ ރައީސް ޑޮނަލްޑް ޓްރަމްޕް ނިންމަވައިފި އެވެ.

އެމެރިކާގެ ރިޔާސީ ގަނޑުވަރު، ވައިޓް ހައުސް އިން ހާމަކޮށްފައިވާ ގޮތުގައި އިސްލާމީ ޤައުމު ތަކުގެ އިސްވެރިންނާ އެކު ޓްރަމްޕް ބައްދަލު ކުރައްވާނީ އަންގާރަ ދުވަހު އެވެ.

ވައިޓް ހައުސްގެ ޕްރެސް ސެކްރެޓަރީ ކެރޮލިން ލެވިޓް ވިދާޅުވެފައިވާ ގޮތުގައި، އެ ބައްދަލުވުމުގައި ސައުދީ އަރަބިއްޔާ، ޔޫއޭއީ، ޤަތަރު، މިޞްރު، ޖޯޑަން، ތުރުކީ، އިންޑޮނޭޝިއާ އަދި ޕާކިސްތާންގެ އިސްވެރިން ބައިވެރިވެ ވަޑައިގަންނަވާނެ އެވެ.

އެކްސިއޯސްގައި ރިޕޯޓު ކޮށްފައިވާ ގޮތުން، އެ ބައްދަލުވުމުގައި ޣައްޒާ ހަނގުރާމަ ނިމުމަކަށް ގެނައުމަށް ފަހު އެ ސަރަހައްދު ހިންގާ ގޮތް އެމެރިކާގެ ރައީސް ޓްރަމްޕް ހުށަހަޅުއްވާނެ އެވެ. އޭގެ އިތުރުން ހަނގުރާމަ ހުއްޓުވުމާއި، ހަމާސްގެ ބައިވެރިވުމެއް ނެތި ޣައްޒާ ހިންގުމާ ގުޅޭ ގޮތުން މަޝްވަރާ ކުރެވޭނެ ކަމަށް ވަނީ ރިޕޯޓު ކޮށްފަ އެވެ.

އެމެރިކާ އިން ބޭނުން ވަނީ އަރަބި އަދި މުސްލިމު ޤައުމު ތަކުން ޣައްޒާ އަށް ސިފައިން ފޮނުވައި، އިސްރާއީލްގެ ސިފައިން އެ ސަރަހައްދުން ފައިބައި، އެ ސަރަހައްދު އަލުން އާރާސްތު ކުރުމުގެ މަސައްކަތަކަށް ފައިސާގެ އެހީތެރިކަން ފޯރުކޮށްދިނުމަށެވެ.

އެ ބައްދަލުވުމުގެ ކުރިން، އދ ގެ އާންމު މަޖިލީހުގެ ބައްދަލުވުމުގައި ޓްރަމްޕް ވާހަކަ ދައްކަވާނެ އެވެ. މިއީ ގިނަ އަދަދެއްގެ ދުނިޔޭގެ ލީޑަރުން ފަލަސްޠީނުގެ މިނިވަން ދައުލަތް ޤާއިމު ކުރުމަށް ތާއީދު ކުރިތާ އެއް ދުވަސް ފަހުން އޮންނަ ބައްދަލުވުމެއްކަން ފާހަގަ ކުރެވެ އެވެ. ނަމަވެސް، ފަލަސްޠީނުގެ މިނިވަން ދައުލަތް ޤަބޫލު ކުރުމަށް އިސްރާއީލް އާއި އެމެރިކާ އިން ވަނީ ދެކޮޅު ހަދައިފަ އެވެ.

އިސްރާއީލް އިން ޣައްޒާގައި ހިންގަމުން އަންނަ ހަނގުރާމައިގައި، އެއް ދުވަހުން އަނެއް ދުވަހަކަށް އަންނަނީ ހަމަލާތައް ވަރުގަދަ ކުރަމުންނެވެ. އެ ހަނގުރާމައިގައި މިހާތަނަށް 65،000 އަށް ވުރެ ގިނަ ޣައްޒާގެ ރައްޔިތުން ވަނީ ޝަހީދުވެފަ އެވެ. އެތައް ހާސް ބަޔަަކަށް އަނިޔާވެފައިވާއިރު، ޣައްޒާގެ އިންސާނީ ޙާލަތު ވަނީ އިންތިހާ ދަރަޖަ އަށް ދަށަށް ގޮސްފަ އެވެ.