އިސްރާއީލް އާއި ފަލަސްޠީނާ ދެމެދު ދެ ދައުލަތުގެ ޙައްލު ހޯދުމަށް ކުރަމުން އަންނަ މަސައްކަތްތަކާ ގުޅޭ ގޮތުން ސައުދީ އަރަބިއްޔާގެ ވަލީ އަޙުދު މުޙައްމަދު ބިން ސަލްމާން އަދި ފްރާންސްގެ ރައީސް އިމަނުއެލް މެކްރޮން މަޝްވަރާ ކުރައްވައިފި އެވެ.

މުޙައްމަދު ބިން ސަލްމާން އާއި މެކްރޮން މަޝްވަރާ ކުރައްވާފައި ވަނީ ހޮނިހިރު ދުވަހު ފޯނުން ގުޅުއްވައިގެންނެވެ. މެކްރޮންގެ އޭނާގެ އެކްސް އެކައުންޓުގައި ކޮށްފައިވާ ޕޯސްޓެއްގައި ވިދާޅުވެފައި ވަނީ، މުޙައްމަދު ބިން ސަލްމާން އާއެކު މަޝްވަރާ ކުރައްވާފައިވާ ކަމަށެވެ.

މި ދެ ބޭފުޅުންގެ މަޝްވަރާގައި ވަނީ އދ ގެ 142 ޤައުމުގެ ތާއީދާ އެކު ދާދި ފަހުން ފާސްކޮށްފައިވާ ނިއު ޔޯކް ޑެކްލަރޭޝަންގެ މައްސަލައާ އެވެ. އެކަމަށް އިޝާރާތް ކުރައްވައި މެކްރޮން ވިދާޅުވެފައި ވަނީ، އެ ޑެކްލަރޭޝަން ފާސްވެގެން ދިޔުމަކީ، މެދު އިރުމަތީގެ ސުލްޙަ އާއި ރައްކާތެރިކަން ޤާއިމު ކުރުމަށް އެޅުމު މުހިންމު ފިޔަވަޅެއް ކަމަށެވެ.

ހޯމަ ދުވަހު ނިއު ޔޯކުގައި ހުންނަ އދ ގެ މައި މަރުކަޒުފައި ކުރިއަށްދާ ބައްދަލުވުމުގައި ދެ ދައުލަތުގެ ޙައްލާ ގުޅޭ ގޮތުން ޗެއާ ކުރުމަށް ހަމަޖެހިފައި ވަނީ ވެސް ސައުދީ އަރަބިއްޔާ އާއި ފްރާންސް އިންނެވެ.

އިތުރަށް މެކްރޮން ވިދާޅުވެފައި ވަނީ، އެ ބައްދަލުވުމުގެ ސަބަބުން ބައިނަލްއަޤުވާމީ މުޖުތަމައު އެއްބައިވަންތަ ވުމަށް އިތުރު ފިޔަވަޅުތަކެއް އެޅިގެން ދާނެ ކަމަށެވެ. އަދި ދެ ޤައުމުގެ ރައްޔިތުންނާއި، ދެ ދައުލަތުގެ ސަބަބުން، އެންމެނަށް ވެސް ސުލްޙަ އާއި ރައްކާތެރިކަން ލިބިގެންދާނެ ކަމަށް ވެސް މެކްރޮން ވިދާޅުވި އެވެ.

ފްރާންސް އިން ވަނީ ފަލަސްޠީނުގެ މިނިވަން ދައުލަތް ބަލައި ގަންނަން ނިންމައިފަ އެވެ.