ގއ. ކޮލަމާފުށި "ކޮލަމާ" ބޯޓުގެ ކެޕްޓަން އާދަމް ސައީދު (ސައީދުބެ) އަކީ ވަރަށް މަސައްކަތްތެރި މީހެކެވެ. މުޅި އުމުރު ހޭދަކޮށްފައިވަނީ އަތޮޅާއި، ރަށަށް ޚިދުމަތް ކުރުމުގައެވެ. ގިނަ ބައެއްގެ ލޯތްބާއި އިހުތިރާމް ހޯދާފައިވާ ސައީދުބެއަކީ ޚާއްސަ ގޮތެއްގައި ތައުލީމީ ދާއިރާއާއި، ވިޔަފާރީގެ ދާއިރާގައި އިސްކޮށް ހަރަކާތްތެރިވި މީހެކެވެ. އަދި ގިނަބައެއްގެ ދިރިއުޅުން އެތައް ގުނައަކުން ފަސޭހަކޮށްދިން އޯގާތެރި މިތުރެކެވެ.

އުމުރުން ދުވަސްވެފައިވީ ނަމަވެސް ސައީދުބެ އަކީ ސިއްހަތު ރަނގަޅު ގަދަފަދަ ފަހުލަވާނެކެވެ. ބޯޓު ދުއްވަން ހުންނަ ޝައުގުވެރިކަމެއްގެ ބޮޑުކަމުން އެ މަސައްކަތުގައި ހަރަކާތްތެރިވަމުންދިޔަ ސައީދުބެ ކުއްލި ގޮތަކަށް މިދުނިޔެއާ އަލްވަދާއު ކީ ނަމަވެސް އެ ޚަބަރު ގަބޫލުކުރަން އެއަތޮޅުގެ ގިނަ ރައްޔިތުންނަށް އަދިވެސް ދައްޗެވެ.

އޮގަސްޓު މަހުގެ 31 ވަނަ ދުވަހު ހިނގި ނުރައްކާތެރި ހާދިސާ ކޮލަމާފުށީ ކައުންސިލްގެ ރައީސް އިބްރާހިމް ވަހީދު ރާއްޖެއެމްވީއާ ވަނީ ހިއްސާކޮށްފައެވެ.

ވަހީދު ވިދާޅުވި ގޮތުގައި، ސައީދުބެ ކޮލަމާ ބޯޓުގައި ދަތުރުކުރަމުންދިޔައީ ލ.އަތޮޅުން ފުރައިގެން ހުވަދު އަތޮޅަށެވެ. ފުރުމުގެ ކުރިން އާއިލާއަށް އެންގި ކަމަށާއި، ގއ. ވިލިނގިއްޔަށް ދެވޭނެ ވަގުތު ވެސް ބުނެފައިވާ ކަމަށެވެ. ނަމަވެސް ވިލިނގިއްޔަށް ލެފޭނެ ކަމަށް ބުނެފައިވާ ވަގުތު ފަހަނައަޅާ ދިޔައިރު ވެސް ބޯޓު އައިސްފައިނުވާތީ، ބޯޓު ހޯދުމުގެ މަސައްކަތް ފެށިއެވެ. ހުވަދޫ ކަނޑުގެ ވަކި ހިސާބަކުން ރޭންޖު ކެނޑުނު ނަމަވެސް ވަކި ވަގުތެއްވާއިރު، ނުގުޅޭ ކަމަށްވާނަމަ އެކަން ސަމާލުކަމަށް ގެންނަ ކަމަށް އޭނާ ވިދާޅުވިއެވެ.

އެއްވެސް ގޮތަކަށް ކޮލަމާ ބޯޓަށް ނުގުޅުމުން، ކަމާބެހޭ ފަރާތްތަކަށް ރިޕޯޓުކޮށް އެ ބޯޓް ހޯދަން ފެށީ 31 އޮގަސްޓް 2025 ވަނަ ދުވަހުގެ ރޭ 10:00 ހާއިރު އެވެ. އަދި ބޯޓް ފެނުނީ އެކެފަރަ ސަރަހައްދުން ކަމަށާއި، ބޯޓް ފެނުނުއިރު ވެސް ސައީދުބެ އެއްވެސް ހަރަކާތެއް ނެތް ކަމަށް ފުލުހުންނާ ހަވާލާދީ ވަހީދު ވިދާޅުވިއެވެ.

ބޯޓުގައި މަސައްކަތް ކުރަމުންދިޔަ ބިދޭސީ މީހުން ކިޔައިދީފައިވާ ގޮތުގައި ސައީދުބެ އިންޖީނު ރޫމަށް ފޭބީ އޮޓޯ ޕަމްޕުގައި މައްސަލައެއް ދިމާވެގެން އެ ވީ ގޮތެއް ބެލުމަށެވެ. ވަހީދު ވިދާޅުވި ގޮތުގައި، ސައީދުބެ މަރުވީ އިންޖީނު ރޫމަށް ފޭބި ވަގުތު ޝާފްޓްގައި އަޅައިގަނެގެން ކަމަށް ބެލެވޭ ކަމަށެވެ.

ސައީދުބެ ކުއްލި ވަކިވުމާއެކު އޭނާ ދުއްވި ކޮލަމާ ބޯޓު މިހާރު އޮތީ އެރަށުގެ ބަނދަރުގައެވެ.

އެ އާއިލާގެ ތިން ބޯޓާއެކު އަތޮޅުގެ ގިނަ ރަށްތަކަށް މުދާއުފުލައި، އެހެނިހެން ގިނަ އެހީތެރިކަމާއި، ޚިދުމަތެއް ދިން ސައީދުބެ ނެތުމުން އެފަޅުކަން ވަނީ ކުރިމަތިވެފައެވެ. އަދި މިފަދަ ހިތާމަވެރި ހާދިސާތައް ހިނގިޔަ ނުދިނުމަށް ކުރަންޖެހޭ ކަންކަން ކުރުމާއި، އިތުރަށް ސަމާލުވެ މަސައްކަތް ކުރުމަށް އެ އަތޮޅުގެ ރައްޔިތުންނާއި، އެރަށުގެ ކައުންސިލުން އެދެއެވެ.