އޮކްޓޯބަރ މަހުގެ ތިންވަނަ ދުވަހު، އިދިކޮޅު މައި ޕާޓީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ބާއްވަން ތައްޔާރުވަމުން ގެންދާ ބޮޑު މުޒާހަރާއަށް، މާލޭގެ މަގުތަކުގައި ހަރުކޮށްފައި ހުރި ބެނާތައް ނެގުމުގެ މަސައްކަތް މާލޭ ސިޓީ ކައުންސިލުން ފަށައިފިއެވެ.

"ލޫޓުވައިފި ލޫޓުވައި" ނަމުގައި އެމްޑީޕީން ބޮޑު އެއްވުމެއް ބާއްވަން ނިންމައި، އެކަމަށް ތައްޔާރުވުމުގެ މަސައްކަތް އަންނަނީ ކުރަމުންނެވެ. އެގޮތުން މާލެއާއި ހުޅުމާލޭގެ ބޮޑެތި މަގުތަކުގައި އެމްޑީޕީން އަންނަނީ ޕޯސްޓަރުތަކާއި ބެނާތައް ހަރުކުރަމުންނެވެ.

ނަމަވެސް މިހާރު ސިޓީ ކައުންސިލުން ވަނީ މާލޭގެ މަގުތަކުގައި އަޅުވައިފައި ހުރި ބެނާތައް ކަނޑަން ފަށައިފައެވެ. އެގޮތުން މަޖީދީ މަގުގައި ހުރި ބައެއް ބެނާތައް ކަނޑަމުން އަންނައިރު، މި މަންޒަރުތައް ސޯޝަލް މީޑިއާގައި ވެސް އަންނަނީ ދައުރުކުރަމުންނެވެ.

އެމްޑީޕީން މަގުތަކުގައި ދަމާފައި ހުރި ބެނާތަށް ނަގަމުން ގެންދާތީ މާލެ ސިޓީ ކައުންސިލުގެ ބަހެއް ހޯދަން މަސައްކަތްކުރި ނަމަވެސް އެ ކައުންސިލްގެ ބަހެއް އަދި ލިބޭގޮތް ވަނީ ނުވެފައެވެ.

މިކަމާއި ގުޅިގެން އެމްޑީޕީގެ ބަހެއް ހޯދާލުމަށް ރާއްޖެ އެމްވީ އިން ގުޅުމުން އެ ޕާޓީގެ ޑެޕިއުޓީ ޗެއާޕާސަން އިބްރާހިމް ވަހީދު (އިބުރޭ) ވިދާޅުވީ އެ ޕާޓީން ބޮޑު މުޒާހަރާއަށް ތައްޔާރުވުމަށް މާލޭގެ މަގުތަކުގައި ހަރުކޮށްފައި ހުރި ބެނާތަށް ނަގަނީ މާލޭ ސިޓީ ކައުންސިލުން އަންގައިގެން ކަމަށެވެ.

އިބުރޭ ވިދާޅުވީ އަންނަ މަހުގެ ތިން ވަނަ ދުވަހު އެމްޑީޕީން ބާއްވަން ތައްޔާރުވަމުން އަންނަ ބޮޑު މުޒާހަރާ އިސްތިހާރު ކުރުމަށް މާލެއާއި ވިލިމާލޭގައި ހުއްދަދެވިފައިވާ ސަރަހައްދުތަކުގައި ބެނާތައް ދެމުމުގެ ހުއްދައަށް އެދި މާލޭ ސިޓީ ކައުންސިލުގެ ހުއްދައަށް އެދި ސެޕްޓެމްބަރު މަހުގެ 15 ވަނަ ދުވަހު ސިޓީ ފޮނުވާފައިވާ ކަމަށެވެ. އެހެން ނަމަވެސް އަދި ވެސް އެ ސިޓީއަށް ސިޓީ ކައުންސިލުން ޖަވާބު ދީފައި ނުވާކަމަށް އިބުރޭ ވިދާޅުވިއެވެ.

އިބުރޭ ވިދާޅުވީ ރާއްޖޭގެ ގާނޫނު އަސާސީން މަނާ ނުކުރާ ކޮންމެ ކަމަކީ ކުރެވޭނޭ ކަމެއް ކަމަށާއި އެގޮތުން ބެނާތަށް ދެމުމަށް ހުއްދަ އޮންނަ ސަރަހައްދުތަކުގައި ބެނާތަށް ދަމާފައި ވަނީ އެގޮތުގެ މަތިން ކަމަށެވެ.

އިބުރޭ ވިދާޅުވީ މާލޭ ސިޓީ ކަންއުންސިލުން ބެނާތަށް ނެގިނަމަވެސް އަލުން ބެނާތަށް ހަރުކުރާނެ ކަމަށެވެ. އަދި އެކަން ނުހުއްޓުވޭނޭ ކަމަށް އޭނާ ވިދާޅުވި އެވެ.

އެމްޑީޕީއަށް ނިސްބަތްވާ މޭޔަރަކު ސިޓީ ކައުންސިލުގައި ހުންނެވި ނަަމަވެސް، ކައުންސިލްގެ މެޖޯރިޓީ މިހާރު އޮތީ ވެރިކަން ކުރާ ޕީއެންސީއަށެވެ.

މާލޭގެ މަގުތަކުގައި ބެނާތަކާއި ޕޯސްޓަރު ހަރުކުރުމުގެ ކުރިން ސިޓީ ކައުންސިލުން ހުއްދަ ހޯދަން ޖެހެއެވެ.