މީޑިއާ ބްރޯޑްކާސްޓިންގ ބިލާ މެދު މަސައްކަތްތެރިންގެ ޖަމިއްޔާއިން ކަންބޮޑުވުން ފާޅުކޮށްފި

މޯލްޑިވްސް ޓްރޭޑް ޔޫނިއަން ކޮންގްރެސް (އެމްޓީޔޫސީ) އިން ރައްޔިތުންގެ މަޖިލީހުން ފާސްކޮށްފައިވާ މީޑިއާ ބްރޯޑްކާސްޓިންގ ބިލާ މެދު ކަންބޮޑުވުން ފާޅުކޮށް، އެ ބިލު ތަސްދީޤު ނުކުރުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު އަށް ގޮވާލައިފިއެވެ.

އެ ޖަމިއްޔާއިން މިފަދައިން ގޮވާލާފައިވަނީ މިނިވަން މީޑިއާގައި ތަޅުއެޅުވޭ ގޮތަށް މަޖިލީހުން ފާސްކުރި ބިލާއި ގުޅިގެން ކަންބޮޑުވުން ފާޅުކޮށް ނެރުނު ނޫސްބަޔާނެއްގައެވެ.

Advertisement

16 ސެޕްޓެމްބަރ 2025 ގައި މަޖިލީހުން ފާސްކުރި މި ބިލަކީ ނޫސްވެރިކަމުގެ މިނިވަންކަމާއި، ޚިޔާލުފާޅުކުރުމުގެ މިނިވަންކަމަށް އަދި މަޢުލޫމާތު ހޯދުމުގެ ޙައްޤަށް ހުރަސްއެޅިދާނެ ބިލެއްކަމަށް ކަންބޮޑުވުން ފާޅުކޮށް 151 ނޫސްވެރިން ސޮއިކުރި ޕެޓިޝަނަކަށް އެއްވެސް ސަމާލުކަމެއް ދީފައިނުވާކަން އެމްޓީޔޫސީން ފާހަގަކުރެއެވެ.

ބުދަ ދުވަހު ބޭއްވުނު އިހުތިޖާޖުގައި ފުލުހުން ބޭނުންކުރި ބާރުގެ ސަބަބުން ނޫސްވެރިންނާއި އާންމުންނަށް އަނިޔާވެފައިވާތީ އެމްޓީޔޫސީން ވަނީ ކަންބޮޑުވުން ފާޅުކޮށްފައެވެ. މިފަދަ ޢަމަލުތަކަކީ ޑިމޮކްރެޓިކް މުޖުތަމަޢުއެއްގައި ބަސްބުނުމުގެ މިނިވަންކަން ހަނިކުރެވިދާނެ ކަމެއްކަމަށް އެމްޓީޔޫސީން ބުނެއެވެ.

މި ބިލުގެ ސަބަބުން މަސައްކަތްތެރިންގެ ޙައްޤުތަކަށާއި، ވަޒީފާގެ މާޙައުލުގައި ދިމާވާ މައްސަލަތައް ހާމަކުރުމަށް ހުރަސްއެޅި، މަސައްކަތްތެރިންގެ ޙައްޤުތައް ރައްކާތެރިކުރުމަށް ދަތިތަކެއް ކުރިމަތިވެދާނެކަމަށް އެމްޓީޔޫސީން ވަނީ ފާހަގަކޮށްފައެވެ.

އެމްޓީޔޫސީން ވަނީ ރައްޔިތުންގެ މަޖިލީހަށާއި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއަށް ގޮވާލައި، މި ބިލު ފާސްކުރުމުގައި ގެންގުޅެފައިވާ އިޖުރާއަތުތަކާމެދު ވިސްނައި، އަސާސީ ޙައްޤުތަކަށް އުނިކަމެއް ނާންނާނެ ގޮތަކަށް ކަންކަން ނިންމުމަށް އިލްތިމާސްކޮށްފައެވެ.

އެމްޓީޔޫސީން ބުނާގޮތުގައި، ޑިމޮކްރަސީގެ އަސާސްތަކާއި މީޑިއާގެ މިނިވަންކަން ދިފާޢުކުރުމަށް އެ ޖަމްޢިއްޔާއިން ދަނީ މަސައްކަތްކުރަމުންނެވެ. އަދި އެންމެހައި މަސައްކަތްތެރިންނަށް ގޮވާލާފައިވަނީ އަސާސީ ޙައްޤުތަކަށް އަރައިގަންނަ ކޮންމެ ކަމަކާ ދެކޮޅަށް އެއް އަޑަކުން ތެދުވުމަށެވެ.