ވ. އާރަށުގެ ޚިޔާނާތުގެ މައްސަލައިގައި ޔާމީނަށް ކުރާ ދައުވާގެ އަޑުއެހުމެއް މިމަހުގެ 29 ގައި
އަޑުއެހުން ބޭއްވުމަށް ތާވަލްކޮށްފައި ވަނީ 29 ސެޕްޓެންބަރު 2025 ވަނަ ދުވަހުގެ ހެނދުނު 11:30 ށް
ކުރީގެ ރައީސް އަބްދުﷲ ޔާމީން
ވ. އާރަށުގެ ޚިޔާނާތުގެ މައްސަލައިގައި ކުރީގެ ރައީސް އަބްދުﷲ ޔާމީންގެ މައްޗަށް އިއްވި 11 އަހަރުގެ ޖަލު ހުކުމް ބާތިލްކޮށް، އެ މައްސަލަ އަލުން ބެލުމުގައި ޔާމީނާ ދެކޮޅަށް ދައުލަތުން ހުށަހެޅި އާ ހެކިތައް ބަލައިގަނެވޭނެ ކަމަށް ކަނޑައަޅަން ދައުލަތުން ސުޕްރީމް ކޯޓަށް ހުށަހެޅި މައްސަލައިގެ އަޑު އެހުމެއް އެ ކޯޓުގައި ތާވަލްކޮށްފިއެވެ.
މި މައްސަލައިގައި އަޑުއެހުން ބޭއްވުމަށް ތާވަލްކޮށްފައި ވަނީ 29 ސެޕްޓެންބަރު 2025 ވަނަ ދުވަހުގެ ހެނދުނު 11:30 ށެވެ.
މިމައްސަލާގެ އަޑު އެހުން ތާވަލް ކުރިއިރު، ސުޕްރީމްކޯޓުގެ ބެންޗު މިސަރުކާރުން ވަނީ ބަދަލުކޮށްފައެވެ. މި މައްސަލައިގެ ބެންޗުގައި ކުރިން އިންނެވީ ޑރ. އަޒްމިރާލްދާ ޒާހިރު އެވެ. ނަމަވެސް ސުލޫކީ މައްސަލައެއްގައި ކަމަށް ބުނެ، އަޒްމިރާލްދާ ފަނޑިޔާރުކަމުން ވަކިކުރުމާއި ގުޅިގެން މިހާރު އެ ބެންޗުގައި އިންނެވީ އަބްދުﷲ ހަމީދެވެ.
ޔާމީންގެ މައްސަލަ ބައްލަވަނީ ތިން ފަނޑިޔާރުންގެ ބެންޗަކުން ކަމަށްވާއިރު، ބެންޗުގައި ދެން ހިމެނެނީ ފަނޑިޔާރު އާއިޝާ ޝުޖޫން މުހައްމަދާއި، ފަނޑިޔާރު ޑރ. މުހައްމަދު އިބްރާހީމް އެވެ.
ވ.އާރަށުގެ ޚިޔާނާތުގެ މައްސަލައިގައި ޔާމީނުގެ މައްޗަށް ކުރި، މަނީ ލޯންޑަރިންގއާއި ރިޝްވަތު ގަބޫލު ކުރުމުގެ ކުށުގެ ހުކުމް ސާބިތުވާ ކަމަށް ހުކުމްކޮށްފައިވަނީ 25 ޑިސެންބަރު 2022 ގައެވެ.
ޔާމީނަށް ކުރާ މަނީ ލޯންޑަރިންގގެ ކުށުގެ ދައުވާގައި 7 އަހަރަށް ޖަލަށް ލުމާއެކު 5 މިލިއަން ޑޮލަރުން ޖޫރިމަނާ ކުރުމަށް ހުކުމްކޮށްފައިވާއިރު، ޔާމީނުގެ މައްޗަށް ކުރާ ރިޝްވަތު ގަބޫލުކުރުމުގެ ކުށުގެ ދައުވާ ސާބިތުވެފައި ވާކަަމަށް ކަނޑައަޅައި، 4 އަހަރުގެ ޖަލު ހުކުމެއް ވަނީ އިއްވާފައެވެ. އަދި މި ހުކުމް ހައިކޯޓުން ބާތިލުކޮށްފައިވަނީ 18 އޭޕްރީލް 2024 ގައެވެ.
އެ މައްސަލަ އަލުން ބަލާއިރު، ޔާމީނާ ދެކޮޅަށް ދައުލަތުން ފަހުން ހުށަހެޅި އާ ހެކިތައް ބަލައިނުގަނެވޭނެ ކަމަށް ހައިކޯޓުން އޭރު އޮތީ ކަނޑައަޅައިފައެވެ.
އެ މައްސަލައިގެ އިސްތިއުނާފު ހައިކޯޓުގައި ބެލީ ހުޒައިފާ މުހައްމަދާއި، ހަސަން ޝަފީއުއާއި މުހައްމަދު ސަލީމެވެ. މީގެ ތެރެއިން ސަލީމަކީ މިހާރު ސުޕްރީމް ކޯޓުގެ ފަނޑިޔާރެކެވެ.
މީގެ އިތުރުން ރައްޔިތުންގެ މަޖިލީހުގެ ފެލިދޫ ދާއިރާގެ ކުރީގެ މެންބަރު ޔޫސުފް ނައީމްގެ ބައި ވެސް ހަމަ އެ ދުވަހު ސުޕްރީމް ކޯޓުގައި ކުރިއަށް ގެންދިއުމަށް ވަނީ ތާވަލްކޮށްފައެވެ.
އާރަށު ޚިޔާނާތުގެ މައްސަލާގައި ޔޫސުފް ނައީމަށް ކޮށްފައިވަނީ ރިޝްވަތު ދިނުމުގެ ކުށުގެ ދައުވާއެވެ. އެ ދައުވާ ސާބިތުވެ، އޭނާ 3 އަހަރާއި، 2 މަހާއި 12 ދުވަހަށް ޖަލަށް ލުމަށް ކްރިމިނަލް ކޯޓުން 25 ޑިސެންބަރު 2022 ގައި ހުކުމްކޮށްފައިވެއެވެ. މި މައްސަލަ ހައިކޯޓުގައި އިސްތިއުނާފު ކުރުމުން 18 އޭޕްރީލް 2024 ގައި ޔޫސުފް ނައީމަށް ކުރި ހުކުމް ބާތިލް ކަމަށް ކަނޑައަޅައި، އަލުން މައްސަލަ ބެލުމަށް އޭރު އަންގާފައިވެއެވެ.
