މީޑިއާ ކޮންޓްރޯލް ކުރާ ބިލުގެ މަސައްކަތްތައް ކުރިއަށް ގެންގޮސްފައިވަނީ ރަނގަޅު އުސޫލަކުން ނޫން: ކުރީގެ ޕީޖީ މުއިއްޒު
މީޑިއާ ބިލުގެ މަސައްކަތް ކުރިއަށް ގޮސްފައިވަނީ ރަނގަޅު އުސޫލަކުން ނޫން
ކުރީގެ ޕްރޮސެކިއުޓާ ޖެނެރަލް އަޙްމަދު މުއިއްޒު: ވިދާޅުވީ މީޑިއާ ބިލް ފާސްކުރުމުގައި ކަންކަން ގެންދިޔައީ ރަނގަޅަށް ނޫން ކަމަށް
ރައްޔިތުންގެ މަޖިލީހުން އަންގާރަ ދުވަހު ފާސްކުރި މީޑިއާ ބިލުގެ މަސައްކަތްތައް ކުރިއަށް ގެންގޮސްފައިވަނީ ރަނގަޅު އުސޫލަކުން ނޫން ކަމަށް ކުރީގެ ޕްރޮސިކިއުޓާ ޖެނެރަލް އަޙްމަދު މުއިއްޒު ވިދާޅުވެއްޖެ އެވެ.
ސަރުކާރުގެ މެޖޯރިޓީ އޮތް މަޖިލީހަށް, ސަރުކާރާ ގުޅުން ބޮޑު އަމިއްލަ މެންބަރު، އަބްދުލްހަންނާން އަބޫބަކުރު ހުށަހެޅުއްވި ބިލުގައި ނޫސްވެރިންގެ ގިނަ ކަންބޮޑުވުންތަކެއް ހުރިކަން ވަނީ ފާހަގަކޮށްފަ އެވެ. އޭގެ ތެރޭގައި ނޫސްވެރިންނަށް އަދަބު ދިނުމާއި މީޑިއާތައް ބަންދު ކޮށް އެ މީޑިއާތަކުގެ ރެޖިސްޓްރީ ބާތިލް ކުރުމުގެ ބާރު ދިނުން ހިމެނެއެވެ.
ފުރަތަމަ ދުވަހު ވެސް ސަރުކާރުން ބުނީ، މި ބިލާ ސަރުކާރާ ގުޅުމެއް ނެތް ކަމަށެވެ. ނަމަވެސް، ފަހުން ދައުލަތުގެ ބަންޑާރަނައިބާއި ޕީއެންސީން ވަނީ މުޅި ބިލުގެ ދިފާއުގައި ނުކުންނަވާފައެވެ.
ދައުރުން ބޭރުން މަޖިލީހުގެ ޖަލްސާތަކާއި ކޮމިޓީތައް ބާއްވައި އަންގާރަ ދުވަހު ބިލު ވަނީ ފާސްކޮށްފަ އެވެ.
އާ ގާނޫނުއަސާސީ އެކުލަވާލި މަޖިލީހުގައި މަސައްކަތް ކުރައްވާފައިވާ, މުއިއްޒު އަންގާރަ ދުވަހު ސޯޝަލް މީޑިއާގައި އާއްމު ކުރެއްވި ޕޯސްޓެއްގައި ވިދާޅުވީ، ގާނޫނު ހަދާ މަޖިލީހުން ގާނޫނުތައް އެކުލަވާލުމުގައި ފުޅާ ދާއިރާއެއްގައި ރައްޔިތުންގެ ޚިޔާލާއި މަޝްވަރާ ހޯދަން ޖެހޭނެ ކަމަށާއި އަދި ކަމާ ބެހޭ ފަންނީ ބޭފުޅުންނާއި ޚަބީރުންގެ ލަފަޔާއި އެންމެހާ ސްޓޭކްހޯލްޑަރުންގެ ޚިޔާލާއި މަޝްވަރާ ހޯދަން ޖެހޭނެ ކަމަށެވެ.
އެހެން ނަމަވެސް މީގެ ފާހަގަކުރެއްވި އެއްވެސް ކަމެއް ކޮށްފައި ނުވާތީ މި ބިލު ފާސްކުރަން މަޖިލީހުން މަސައްކަތްކުރަނީ އާދަޔާހިލާފަށް އަވަހަށް ކަމަށް މުއިއްޒު ވަނީ ވިދާޅުވެފަ އެވެ.
ގާނޫނު ހަދާ މަޖިލީހުން ގާނޫނުތައް އެކުލަވާލުމުގައި ފުޅާ ދާއިރާއެއްގައި ރައްޔިތުންގެ ޚިޔާލާއި މަޝްވަރާ ހޯދަން ޖެހޭނެ. އަދި ކަމާ ބެހޭ ފަންނީ ބޭފުޅުންނާއި ޚަބީރުންގެ ލަފަޔާއި އެންމެހާ ސްޓޭކްހޯލްޑަރުންގެ ޚިޔާލާއި މަޝްވަރާ ހޯދަން ޖެހޭނެކުރީގެ ޕްރޮސިކިއުޓާ ޖެނެރަލް އަޙްމަދު މުއިއްޒު
އޭނާ އިތުރަށް ވިދާޅުވީ، މިހާރު އެ ބިލު އެ އޮތްގޮތަށް ފާސްކުރުމާމެދު ކަންބޮޑުވާ ކަމަށެވެ. އަދި، ގިނަ ބަޔަކު ކަންބޮޑުވުން ފާޅު ކުރަމުންދަނިކޮށް, އަވަސްއަރުވާލައިގެން ބިލު ފާސްކުރުމަކީ ޑިމޮކްރެޓިކް އުސޫލެއް ނޫން ކަމަށް މުއިއްޒު ވިދާޅުވިއެވެ.
މުއިއްޒުގެ ލަފާފުޅަކީ ކުރީގެ އިންފޮމޭޝަން މިނިސްޓަރު މުޙައްމަދު ނަޝީދު ފަދަ ދާއިރާގެ އިލްމުހުރި ބޭފުޅުންގެ ޚިޔާލާއި ލަފާ ހޯދައިގެން ބިލު އަލުން އެކުލަވާލުމަށެވެ.
ގާނޫނީ ވަކީލުންގެ ކަންކަން ބަލަހައްޓާ, ބާ ކައުންސިލުން ވެސް ވަނީ މިހާރު ބިލު އޮތްގޮތަށް ފާސްކުރާތީ ކަންބޮޑުވުން ފާޅުކޮށްފައެވެ.
