ރައީސްގެ ދަރިކަލުންނާއި ގުޅޭގޮތުން އެމްޑީޕީ އެއްވުމުގައި ދެއްކި ވާހަކަތަކެއް އަނެއްކާވެސް ބޮރޯޑްކޮމް އިން ބަލަނީ
ބްރޯޑްކަސްޓިން ކޮމިޝަނުގެ ޑިރެކްޓަރ ލީގަލް އެފެއާރޒް އައިޝަތު ހާދިޔާ މުޙައްމަދު ސޮއިކޮށް ފޮނުވާފައިވާ ލިޔުމެއްގައި ބުނެފައިވަނީ، ރާއްޖެ ޓީވީ އާއި މެދު ހުށަހަޅާފައިވާ މި މައްސަލަ އަކީ ބްރޯޑްކާސްޓު ކުރުމުގެ ކޯޑް އޮފް ޕްރެކްޓިސްއާ ޚިލާފް ވެފައިވާ ކަމަށް ބުނެ ހުށަހަޅާފައިވާ މައްސަލައެއް ކަމަށް
ބްރޯޑްކާސްޓިންގ ކޮމިޝަން
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ދަރިކަލުންނާއި ގުޅޭގޮތުން އެމްޑީޕީގެ އެއްވުމެއްގައި ދެއްކި ވާހަކަތަކުގެ މައްސަލައެއް ރާއްޖެ ޓީވީ އިން ބްރޯޑްކާސްޓް ކުރުމުން އަނެއްކާވެސް މޯލްޑިވްސް ބްރޯޑްކާސްޓިން ކޮމިޝަނުން ބަލަން ފަށައިފިއެވެ.
23 ޖޫން 2025 ގައި މޯލްޑިވްސް ބްރޯޑްކަސްޓިން ކޮމިޝަނުގެ ޑިރެކްޓަރ ލީގަލް އެފެއާރޒް އައިޝަތު ހާދިޔާ މުޙައްމަދު ސޮއިކޮށް ފޮނުވާފައިވާ ލިޔުމެއްގައި ބުނެފައިވަނީ، ރާއްޖެ ޓީވީ އާއި މެދު ހުށަހަޅާފައިވާ މި މައްސަލަ އަކީ ބްރޯޑްކާސްޓު ކުރުމުގެ ކޯޑް އޮފް ޕްރެކްޓިސްއާ ޚިލާފް ވެފައިވާ ކަމަށް ބުނެ ހުށަހަޅާފައިވާ މައްސަލައެއް ކަމަށެވެ.
އަދި މި މައްސަލަ އަކީ މޭއި 5 ވަނަ ދުވަހު ބޭއްވި އެމްޑީޕީގެ އެއްވުމެއްގައި ދެއްކި ވާހަކަތަކަކާއި ގުޅުން ހުރި މައްސަލަ އެއް ކަމަށް އެ ލިޔުމުގައި ބަޔާންކޮށްފައިވެއެވެ. ރާއްޖެޓީވީ އަށް އެ ކޮމިޝަނުން ފޮނުނު ލިޔުމުގައި އެ އެއްވުމާއި ގުޅުން ހުރި ކޮންޓެންޓް ރައްކާކޮށްފައި ބެހެއްޓުމަށް ވަނީ އަންގާފައެވެ.
މި މައްސަލައިގައި ރިޔާއަތްކޮށްފައިވާ އެއްވުން ބާއްވާފައި ވަނީ މީގެ ދޮޅު މަހެއްހާ ދުވަސް ކުރިން ކަމަށް ވާއިރު މިފަދަ މައްސަލަތައް ބަލަން ބްރޯޑްކޮމް އިން ފަށަނީ އެމްޑީޕީގެ ހަރަކާތްތައް ގިނަވާ ދުވަސްކޮޅާއި ދިމާކޮށް ކަމަށް ވާތީ އެއީ ސަރުކާރުން ބޭނުންވާ ގޮތަށް ބްރޯޑްކޮމް މެދުވެރިކޮށް ނުފޫޒު ފޯރުވުމަށް ކުރާ ކަމެއް ކަމަށް ބައެއް އާއްމުން ތުހުމަތު ކުރެއެވެ،
އެގޮތުން ރައީސް ޑރ.މުހައްމަދު މުއިއްޒުގެ ދަރިކަލުން ކަރާމާތް ގެއްލޭ ފަދަ ވާހަކަ އެއް ބްރޯޑްކާސްޓް ކުރި ކަމަށް ބުނެ، ރާއްޖެޓީވީ އާއި ގުޅުން ހުރި މައްސަލަ އެއް ބްރޯޑްކާސްޓިން ކޮމިޝަނުން ވަނީ މީގެ ކުރިން ވެސް ވަނީ ބަލާފައެވެ. އެ މައްސަލަ ބަލާފައި ވަނީ މާރޗް މަހުގެ ތެރޭގައެވެ.
އޭރު ހުށަހެޅި މައްސަލަ އަކީ ވެސް ބްރޯޑްކާސްޓް ކުރުމުގެ ކޯޑް އޮފް ޕްރެކްޓިސްގެ ހަމަތަކާއި ޚިލާފު ކޮންޓެންޓްތައް އެމްޑީޕީގެ މުޒާހަރާގެ ތެރެއިން ދައްކާފައިވާ ކަމަށް ބުނެ ހުށަހެޅި މައްސަލައެކެވެ. އެ ގޮތުން ކޮންޓެންޓަކީ މީހެއްގެ ނުވަތަ ބައެއްގެ ހުރުމަތް ކެނޑިދާފަދަ އިއްޒަތާއި ގަދަރަށް އުނިކަން ނުވަތަ ނިކަމެތިކަމެއް ލިބިދާނެ ބަސްތަކާއި މަންޒަރާއި އަޑު ބްރޯޑްކާސްޓް ނުކުރުމުގެ ހަމަ އާއި، ކުޑަކުދިންގެ ކަރާމާތާއި ހައްގުތަކަށް ރައްކާތެރިވާ ގޮތަށް ބްރޯޑްކާސްޓްކުރުން އަދި ބްރޯޑްކާސްޓްކުރުމުގައި ކުޑަކުދިން ހިމާޔަތް ކުރުމަށް އަމަލު ކުރަންވީ ގައިޑްލައިންގެ ހަތަރު ވަނަ ހަމައިގެ (ނ) އާއި ޚިލާފު ކޮންޓެންޓެއް ކަމަށް އެ ކޮމިޝަނުން އޭރު ވަނީ ބުނެފައެވެ.
