ސަރުކާރުން ފާސް ކުރަން މަސައްކަތް ކުރާ މީޑިއާ ރެގިއުލޭޓް ކުރާ ބިލުގައި އޮންލައިންކޮށް ޚިޔާލުފާޅު ކުރާ ކޮންމެ ފަރުދަކު ރަޖިސްޓަރީވެ ލައިސަންސް ހޯދާ ރެގިއުލޭޓު ވާންޖެހޭ ގޮތައް އޮތުމަކީ ދިވެހިރާއްޖޭގެ ހިއުމަން ރައިޓްސް ކޮމިޝަނުން ކަންބޮޑުވާ ކަމެއް ކަމަށް ބުނެފިއެވެ.

ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް) އިން މިކަން ހާމަ ކުރީ ރައްޔިތުންގެ މަޖިލީހަށް، ރާއްޖޭގެ ގިނަ ރައްޔިތުންގެ ނުރުހުން އަމާޒުވެފައިވާ މި ބިލާ ބެހޭ ގޮތުން ހުރި ކަންބޮޑުވުންތަކާއި ބިލަށް އިސްލާހު ގެންނަން ޖެހޭ ކަންކަން ފާހަގަ ކޮށް ފޮނުވި 24 ސަފްހާގެ ދިގު ލިޔުމެއްގައެވެ.

"ބްލޮގަރުން، ނުވަތަ އޮންލައިންކޮށް އަމިއްލަ ޚިޔާލު ފާޅުކުރާ، ނުވަތަ ވާހަކަ ހިއްސާކުރާ، ނުވަތަ އައު ޚިޔާލުތައް ހުށަހަޅާ، ކޮންމެ ފަރުދަކު ރަޖިސްޓަރީވެ، ލައިސަންސް ހޯދާ، ދައުލަތުގެ ކޮމިޝަނެއްގެ ބެލުމުގެ ދަށުން ރެގިއުލޭޓް ކުރުަމަށް ހުށަހަޅާފައިވާ ހުށަހެޅުމަކީ،" އެޗްއާރުސީއެމް އިން ކަންބޮޑުވާ ކަމެއް ކަމަށް ބުނެފައިވެއެވެ.

އެ ކޮމިޝަނުން ބުނެފައިވަނީ މިފަދަ އުސޫލެއް ގެންގުޅުމަކީ ބައިނަލްއަގްވާމީ އެންމެ ރަނގަޅު އުސޫލުތަކާ ޚިލާފު އަދި ޚިޔާލުފާޅު ކުރުމުގެ މިނިވަންކަން ވަރަށް ބޮޑަށް ހަނިވެގެންދާ ކަމެއް ކަމުގައެވެ.

"ޑިމޮކްރަޓިކް ގައުމުތަކުގައި މިނިވަން އަޑުތަކާއި، ރައްޔިތުންގެ ނޫސްވެރިކަން ރައްކައުތެރިކޮށްދޭ،" ކަމަށާއި "އަދި އެއީ ދައުލަތުގެ ބާރުގެ ދަށަށް ގެންނަން ޖެހޭ ކަމެއްގެ ގޮތުގައި އެ ގައުމުތަކުން ނުދެކޭ،" ކަމަށް ވެސް އެޗްއާރުސީއެމް އިން ފާހަގަ ކޮށްފައިވެއެވެ.

އެޗްއާރުސީއެމް ގެ ހުށަހެޅުމުގައި، މިހާރު މަޖިލިހުގައި އޮތް ބިލުގައި ވާ ގޮތާ ޚިލާފަށް، ބްރޯޑްކާސްޓް މީޑިއާ ރެގިއުލޭޓް ކުރުމަށް ކަނޑައަޅާ ކޮމިޝަން ތައް ހުރި ނަމަވެސް ޕްރިންޓް މީޑިއާ އަށް ޑިމޮކްރަޓިކް ގައުމުތަކުގައި އޮންނަނީ އަމިއްލަ އަށް ރެގިއުލޭޓް ކުރާ ނިޒާމެއް ކަމަށް ވެސް ވަނީ ބުނެފައެވެ.

އެޗްއާރުސީއެމް އިން ފާހަގަ ކޮށްފައިވާ ގޮތުގައި، އދ ގެ އިންސާނީ ހައްގުތަކާ ބެހޭ ކޮމިޓީ އާއި އޮގަނައިޒޭޝަން ފޯ ސެކިއުރިޓީ އެންޑް ކޯޕަރޭޝަން އިން ޔޫރަޕް އިން ކަނޑައަޅާފައިވާ ބައިނަލްއަގްވާމީ މިންގަނޑުތަކުން އޮންލައިން ކޮންޓެންޓް ކްރިއޭޓަރުންނަށް ލައިސަންސް ނުވަތަ ރެޖިސްޓްރޭޝަން ޝަރުތުކުރުން ނުވަތަ މަޖުބޫރު ކުރާ ގަވައިދުތައް ކަނޑަނޭޅުމަށް ބަޔާން ކޮށްފައިވާ ކަމަށެވެ.

"އެއީ މިނިވަން ޚިޔާލުފާޅު ކުރުަމަށް ހުރަސްއެޅި، ސަރުކާރު ޖަވާބުދާރީ ކުރުވަނިވި މަޝްވަރާތަކަށް ހުރަސްއެޅޭނެއަތީއެވެ."

ދިވެހިރާއްޖެ އިން ބައިވެރިވެފައިވާ މަދަނީ އަދި ސިޔާސީ ހައްގުތަކާ ބެހޭ ބައިނަލް އަގްވާމީ މުއާހަދާ (އައިސީސީޕީއާރު) ޖެނެރަލް ކޮމެންޓް 34 ގައި ބަޔާން ކޮށްފައިވާ ގޮތުން، ބްލޮގަރުން އަދި އެނަލިސްޓުން ފަދަ ފަރާތްތައް ރަޖިސްޓަރީ ކުރުވުމާއި ލައިސަންސް ނަގަންޖެހޭ ގޮތައް ހެދުމަކީ އެ މުއާހަދާގެ 19 ވަނަ މާއްދާ އާ ޚިލާފު ކަމެއް ކަމުގައިވެސް އެޗްއާރުސީއެމް އިން ވަނީ ބުނެފައެވެ.

އެޗްއާރުސީއެމް އިން ފާހަގަ ކޮށްފައިވާ ގޮތުގައި، އިނގިރޭސިވިލާތް، ނިއުޒީލެންޑް، އަދި އޮސްޓްރޭލިއާ ފަދަ ގައުމުތަކުގައިވެސް ނޫސް މަޖައްލާތައް ރަޖިސްޓަރީ ކުރުން ލާޒިމެއް ނޫނެވެ.

ޚިޔާލުފާޅު ކުރުމާއި، ނޫސްވެރިކަމުގެ މިނިވަންކަމަކީ ދިވެހިރާއްޖޭގެ ގާނޫނު އަސާސީ އިންނާއި ދިވެހިރާއްޖެ އިން ބައިވެރިވެފައިވާ މަދަނީ އަދި ސިޔާސީ ހައްގުތަކާ ބެހޭ މުއާހަދާ - އައިސީސީޕީއާރު އިން ކަށަވަރު ކޮށްދީފައިވާ އަސާސީ ހައްގެއް ކަމަށް ވެސް އެޗްއާރުސީއެމް އިން ވަނީ ބުނެފައެވެ.

ސަރުކާރު ޖަވާބުދާރީ ކުރުވުމަށްޓަކައި ފުޅާ ދާއިރާ އެއް ގައި މިނިވަންކަން ދޭންވާނެ ކަމަށް ބައިނަލްއަގްވާމީ މިންގަނޑުތަކުގައި ބަޔާން ކޮށްފައިވާކަން އެޗްއާރުސީއެމް އިން ރައްޔިތުންގެ މަޖިލީހަށް ފޮނުވި ލިޔުމުގައި ފާހަގަކޮށްފައި ވެއެވެ.

އެޗްއާރުސީއެމް ގެ ހުށަހެޅުމުގައި ވަނީ ބިލުގެ ހަތްވަނަ ބާބު މުޅިން އުވާލައި، އަދި މަޖައްލާ މި ބިލުގައި މާނަ ކޮށްފައިވާ ގޮތްވެސް އިސްލާހު ކުރުމަށެވެ.