ޕީއެންސީއަށް ނޫނެކޭ ބުނުމަކީ ގައުމީ ވާޖިބެއް: ބިގޭ
ލާމަރުކަޒީ ނިޒާމު ނައްތާލުމަށް މިސަރުކާރުން މަސައްކަތްކުރަމުންދޭ
އަލިފުށީ ދާއިރާގެ ކުރީގެ މެންބަރު މުހައްމަދު ރަޝީދު ހުސައިން (ބިގޭ)11-09-2025
ޕީއެންސީގެ ވެރިކަމުގައި ބާރުތައް އެއްކޮށް، ތަރައްޤީގެ އެއްވެސް މަސައްކަތެއް މިސަރުކާރުން ނުކުރާ ކަމަށާއި ރާއްޖޭގެ މިވަގުތުގެ އިޤްތިޞާދީ އަދި ސިޔާސީ ހާލަތަށް ބަލާއިރު، ޕީއެންސީއަށް ނޫނެކޭ ބުނުމަކީ ގައުމީ ވާޖިބެއްކަމުގައި ބުނުމަށް އަލިފުށީ ދާއިރާގެ ކުރީގެ މެންބަރު މުހައްމަދު ރަޝީދު ހުސައިން (ބިގޭ) ވިދާޅުވެއްޖެއެވެ.
ކުރީގެ ރައީސް އިބްރާހިމް މުހައްމަދު ޞާލިޙް ބޮޑުފޮޅުދޫގެ ރައްޔިތުންނާއި ބައްދަލުކުރެއްވުމަށް ބޭއްވި ޖަލްސާގައި ވާހަކަ ދައްކަވަމުން ބިގޭ ވިދާޅުވީ އަތޮޅު ކައުންސިލްތައް އުވާލާ މީގެ 30 އެތައް އަހަރު ކުރިން އޮތް އަތޮޅުވެރިންގެ ޒަމާން ގެންނަން ސަރުކާރުން މަސައްކަތް ކުރަމުންދާ ކަމަށާއި، ލޯކަލް ކައުންސިލް އިންތިހާބުގައި މިކަމަށް ނޫނެކޭ ބުނަން ޖެހޭ ކަމަށެވެ.
މިހާރުގެ ސަރުކާރުގެ ސިޔާސަތުތަކުގެ ސަބަބުން ރައްޔިތުންނަށް ކުރިމަތިވަމުންދާ ދަތިތަކާއި ގޮންޖެހުންތައް އިތުރުވަމުންދާކަން ފާހަގަކުރައްވަމުން ބިގޭ ވިދާޅުވީ، އެމްޑީޕީގެ ވެރިކަމުގައި ރައްޔިތުންގެ ޙައްޤުތައް ކަށަވަރުކޮށްދިން ނަމަވެސް، މިހާރުގެ ސަރުކާރުން ރައްޔިތުންގެ ބާރުތައް ނިގުޅައިގަނެ، އާންމު ރައްޔިތުން ނިކަމެތި ކުރަމުންދާކަމަށެވެ. ލިބޭ އާމްދަނީން ދިރިއުޅުމުގެ ޚަރަދުތައް ހަމަނުޖެހި، ވިޔަފާރިތައް ބަނގުރޫޓުވަމުންދާކަމަށާއި، އިމާރާތްކުރުމުގެ ދާއިރާގައި މަސައްކަތްކުރާ ފަރާތްތަކަށް ސަރުކާރުން ފައިސާ ނުދައްކާ، ހަމައެކަނި ސަރުކާރާ ގުޅުންހުރި ކުންފުނިތަކަށް މަސައްކަތް ޙަވާލުކުރަމުންދާއިރު، ރަށްރަށުގައި އުމްރާނީ ތަރައްޤީގެ އެއްވެސް މަސައްކަތެއް ނުކޮށް، ރައްޔިތުންނަށް އެއްވެސް ޚިދުމަތެއް ފޯރުކޮށްނުދޭކަމަށް ބިގޭ ވިދާޅުވި އެވެ.
ލާމަރުކަޒީ ނިޒާމު ނައްތާލުމަށް މިސަރުކާރުން މަސައްކަތްކުރަމުންދާއިރު، އަތޮޅު ކައުންސިލްތައް އުވާލުމާއި ދެކޮޅަށް ހުރިހާ އެންމެންވެސް އަޑު އުފުލަންޖެހޭ ކަމަށް ބިގޭ ވިދާޅުވި އެވެ. ބިގޭ ވިދާޅުވީ ލާމަރުކަޒީ ގާނޫނަށް މިހާރު ގެނެސްފައިވާ އިސްލާހުގެ އިތުރުން ވެސް ބޮޑެތި ބަދަލުތަކެއް ގާނޫނަށް ގެންަނަން މަސައްކަތް ކުރަމުން އަންނަ ކަމަށެވެ. އެގޮތުން ކައުންސިލްތައް އުވާލުމުގެ ބާރު އެލްޖީއޭއަށް ނެންގެވުމާއި ވަކިވަކި ކައުންސިލަރުން މަގާމުން ދުރުކުރުމުގެ ވާހަކައާއި ކައުންސިކްތަކުގައި އޮތް ބާރު ސަރުކާރުގެ ބާރުގެ ދަށަށް އެތަކެއް ކަމެއް ނެގުމުގެ ވާހަކަ ދައްކަމުން އަންނަ ކަމަށެވެ. އޭނާ ވިދާޅުވީ މި ސަރުކާރަށް ނޫނެކޭ ބުނަން ރައްޔިތުންނަށް ލިބޭ ފުރަތަމަ ފުރުސަތަކީ ލޯކަލް ކައުންސިލް އިންތިހާބު ކަމަށެވެ. އެ އިންތިހާބުގައި މި ސަރުކާރުން ނެރޭ ކެންޑިޑޭޓުންނަށް ބޮޑުތަނުން ނޫނެކޭ ބުނުން އެއީ ރައްޔިތުންގެ ފަރުދީ ޒިންމާއެއް ކަމަށް ދެކިގެން ގަބޫލުކުރައްވަން ޖެހޭ ކަމަށެވެ ބިގޭ ވިދާޅުވީ މިއީ ދަރިންގެ ދަރީންގެ މުސްތަގުބަލަށްޓަކައި އަދާކުރަންޖެހޭ ފަރުދީ ޒިންމާއެއް ކަމަށެވެ.
ރާއްޖެ ސަލާމަތްކުރުމަކީ ކޮންމެ ފަރުދެއްގެ ޒިންމާއެއް. އަޅުގަނޑު ތަކުރާރުކޮށް ދަންނަވާލަން ބޭނުން. މިފަދަ ހުދުމުހުތާރު އަނިޔާވެރި ރައްޔިތުންގެ އަތާއި އަނގައާއި ދިމާނުވާގޮތަށް ހުރިހާކަމެއް ތަރުތީބުކޮށްފައި މިއޮތް ސަރުކާރަށް ބޮޑުތަނުން ނޫނެކޭ ބުނޭ. މިހާރު އޮތް ކައުންސިލްގެ ކުޑަމިންވަރުގެ ތެރެއިން ޕްރީ ސްކޫލުގެ ހިދުމަތާއި ސިއްހީ ކަންކަމާއި ކައުންސިލް ފެންވަރުގައި ދެމުންދާ ހިދުމަތްތައް ނިގުޅައިގަންނަމުންދާ ވާހަކަ މި އަޑު އިވެނީ. އަތޮޅުވެރިންގެ ޒަމާން އަންނަނީ. އަތޮޅު ކައުންސިލްތައް އުވިގެންދަނީ. ރައްޔިތުން ވިސްނާ ފިކުރުކުރަންއެޖެހޭ.އަލިފުށީ ދާއިރާގެ ކުރީގެ މެމްބަރު މުހައްމަދު ރަޝީދު ހުސައިން (ބިގޭ)
އެހެންކަމުން އޮކްޓޯބަރު 3 ވަނަ ދުވަހު ބޭއްވުމަށް ތައްޔާރުވަމުންވާ އިޙްތިޖާޖުގައި ބައިވެރިވުމަށް އާންމު ރައްޔިތުންނަށް ބިގޭ ވަނީ ގޮވާލައްވާފައެވެ.
ސަރުކާރު ޖަވާބުދާރީ ކުރުވުމަށްޓަކައި އެންމެން އެކުގައި މަސައްކަތްކުރަން ޖެހޭކަމަށާއި، ކުރިއަށް އޮތް އިންތިޚާބުތަކުގައި ރައްޔިތުން އެމީހުންގެ ނިންމުން ސާފުކޮށް ދައްކުވައިދޭނެކަމަށްވެސް ބިގޭ ވިދާޅުވި އެވެ.
