އިސްރާއީލް އިން ޤަތަރުގެ ވެރި ރަށް ދޯހާ އަށް ދިން ހަމަލާއާ މެދު ހިތްހަމަ ނުޖެހޭ ކަމަށް ވިދާޅުވެ، އެމެރިކާގެ ރައީސް ޑޮނަލްޑް ޓްރަމްޕް، އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ އަށް ފާޑު ވިދާޅުވެއްޖެ އެވެ.

އަންގާރަ ދުވަހުގެ ރޭ އިސްރާއީލް އިން ވަނީ ޤަތަރުގައި ތިއްބެވި ހަމާސް ޖަމާއަތުގެ އިސް އޮފިޝަލުންނަށް އަމާޒުކޮށް ހަމަލާ ދީފަ އެވެ. އެކަމާ ގުޅިގެން ޤަތަރުން ވެސް ވަނީ އެކަން ކުށްވެރިކޮށް، އެކަމުން ދިފާއުވުމުގެ ހައްގު އޮތް ކަމަށް ހާމަކޮށްފަ އެވެ.

ޤަތަރާއި އެމެރިކާ އަކީ ގާތް ގުޅުމެއް އޮންނަ ދެ ޤައުމަށްވާއިރު، ޓްރަމްޕް ވިދާޅުވެފައި ވަނީ ޤަތަރަށް އަމާޒުކޮށް އިސްރާއީލް އިން ހަމަލާ ދިނުމުގައި އެމެރިކާ އިން އެއްވެސް ދައުރެއް އަދާ ކޮށްފައި ނުވާނެ ކަމަށެވެ.

ނޫސްވެރިންނާ ވާހަކަ ދައްކަމުން ޓްރަމްޕް ވިދާޅުވީ، އިސްރާއީލް އިން ޤަތަރަށް ދިން ހަމަލާގެ އެއްވެސް މައުލޫމާތެއް ކުރިން އޭނާ އަށް ލިބިފައި ނެތް ކަމަށެވެ. ޓްރަމްޕް ވިދާޅުވީ، މުޅި މައްސަލައާ މެދު އޭނާ ހިތްހަމަ ނުޖެހޭ ކަމަށާއި، އޭނާ ވެސް ބޭނުން ވަނީ ހަމާސްގެ ބެލުމުގެ ދަށުގައި ތިބި ރަހީނުން މިނިވަން ކުރަން ކަމަށެވެ. އެހެން ނަމަވެސް، މިއަދު ކަންތައް ވެގެން ދިޔަ ގޮތާ މެދު ކަންބޮޑުވުން އޮތް ކަމަށް ޓްރަމްޕް ވިދާޅުވި އެވެ.

އިސްރާއީލް އިން ޤަތަރަށް ހަމަލާ ދީފައިވާއިރު، ޤަތަރަކީ ޣައްޒާ ހަނގުރާމަ ނިންމުމަށް ކުރަމުން އަންނަ މަސައްކަތުގައި މެދުވެރިއެއްގެ ދައުރު އަދާ ކުރަމުން އަންނަ ޤައުމެވެ. އެ މަޝްވަރާ ތަކުގައި ޤަތަރުން އަންނަނީ، ހަމާސްގެ ބެލުމުގެ ދަށުގައި ތިބި އިސްރާއީލްގެ ރައްޔިތުން މިނިވަން ކުރުމަށް ވެސް ބާރު އަޅަމުންނެވެ.

ޤަތަރަކީ އެމެރިކާގެ އެންމެ ބޮޑު އެއާ ބޭސް ހުރި ޤައުމެވެ. އަދި އަބަދު ވެސް ޤަތަރާއި، އެމެރިކާ އަކީ ވަރަށް ގާތް ގުޅުމެއް އޮންނަ ދެ ޤައުމެވެ. މިއަހަރުގެ ތެރޭގައި އެމެރިކާގެ ރައީސް ޓްރަމްޕް ވަނީ ޤަތަރަށް ވަޑައިގެންފަ އެވެ. ޓްރަމްޕްގެ އެ ދަތުރުފުޅުން ވެސް ދެ ޤައުމުގެ ދެ މެދުގައި އޮތް ގާތް ގުޅުން ވަނީ ހާމަވެގެން ގޮސްފަ އެވެ.

ޓްރަމްޕް ވިދާޅުވީ ޤަތަރަށް ހަމަލާ ދިނުމަށް ނިންމި ނިންމުމަކީ އިސްރާއީލްގެ ބޮޑު ވަޒީރު ނަތަންޔާހޫ ނިންނި ނިންމުމެއް ކަމަށާއި، އެއީ އޭނާގެ ނިންމުމެއް ނޫން ކަމަށެވެ. އަދި ޤަތަރަކީ އެމެރިކާގެ ވަރަށް ވަރުގަދަ ރަޙުމަތްތެރިއެއްކަން ފާހަގަ ކުރައްވައި ޓްރަމްޕް ވިދާޅުވީ، ހަމަލާއާ މެދު އޭނާ ހިތާމަ ކުރައްވާ ކަމަށެވެ.

އިތުރަށް ޓްރަމްޕް ވިދާޅުވެފައި ވަނީ، ދެން އަލުން ޤަތަރުގެ ބިމުގައި އެފަދަ ކަމެއް ތަކުރާރު ނުވާނެ ކަމުގެ ޔަގީންކަން، ޤަތަރުގެ އަމީރު ޝެއިޚް ތަމީމް ބިން ހަމަދު އަލް ޘާނީ އަށް ދެއްވާފައިވާނެ ކަމަށެވެ. އަދި ޤަތަރާ އެކު ދިފާއީ އެއްބާރުލުމުގެ އެއްބަސްވުމުގއި ސޮއި ކުރުމަށް، ސެކްރެޓަރީ އޮފް ސްޓޭޓް މާކޯ ރޫބިއޯ އަށް އަންގަވާފައި ވާނެ ކަމަށް ވެސް ޓްރަމްޕް ވަނީ ވިދާޅުވެފަ އެވެ.

އެކަމާ ގުޅިގެން ޤަތަރުގެ ފޮރިން މިނިސްޓްރީގެ ތަރުޖަމާނު މާޖިދު އަލް އަންސާރީ ވިދާޅުވެފައި ވަނީ، އެ ހަމަލާގެ އެއްވެސް އިންޒާރެއް ލިބިފައި ނުވާ ކަމަށެވެ. އޭނާ ވިދާޅުވީ، އެމެރިކާގެ އޮފިޝަލުންގެ ފަރާތުން ފޯނު ކޯލު ލިބުނުއިރު، ވެރި ރަށް ދޯހާގައި އިސްރާއީލް އިން ދިން ހަމަލާގެ އަޑުތައް އިވެމުން ދިޔަ ކަމަށެވެ.