އިސްރާއީލުން ދިން ހަމަލާއަށް ފަހު ވެސް، ޤަތަރުން ޣައްޒާގެ ހަނގުރާމަ ހުއްޓުވުމަށް މަސައްކަތްކުރުން މަތީ ދެމި އޮންނާނެ ކަމަށް ބުނުމާއެކު ގަތަރުން ބުނަނީ ހަމަލާ އަށް ރައްދު ދިނުމުގެ ހައްގު އެ ގައުމަށް ލިބިގެންވާ ކަމުގައެވެ.
ސެޕްޓެމްބަރު 9، 2025 ގައި އިސްރާއީލުން ދޯހާއަށް ދިން ހަމަލާތަކާ ގުޅިގެން ގަތަރުގެ ބޮޑުވަޒީރު އަދި ފޮރިން މިނިސްޓަރު ޝެއިޚް މުހައްމަދު ބިން އަބްދުއްރަހްމާން އަލް ޘާނީ ވާހަކަފުޅު ދައްކަވަނީ.
އިސްރާއީލުން ދޯހާގައި ހުރި ހަމާސްގެ މަރުކަޒަކަށް ދިން ނުރައްކާތެރި ހަމަލާއާ އެކު ވެސް، ޣައްޒާގައި ހިނގަމުންދާ ހަނގުރާމަ ހުއްޓުވުމަށާއި ރަހީނުން ދޫކޮށްލުމަށް މެދުވެރިއެއްގެ މަސައްކަތް ކުރިއަށް ގެންދާނެ ކަމަށް ގަތަރުން ބުނެފިއެވެ.
ހަމާސްގެ އިސް ތަރުޖަމާނު ޚަލީލް އަލް-ހައްޔާގެ ދަރިފުޅާއި ޤަތަރުގެ ސެކިއުރިޓީ އޮފިސަރެއް ހިމެނޭ ގޮތަށް 6 މީހުން މަރުވި މި ހަމަލާއަކީ، ގަތަރުން އަދާ ކުރަމުންދާ މަޝްވަރާތަކުގެ މެދުވެރިއެއްގެ ދައުރަށް ހުރަސްއެޅިދާނެ ކަމެއްގެ ގޮތުގައި ފާހަގަކުރެވެއެވެ.
ބޮޑުވަޒީރު ޝެއިޚް މުޙައްމަދު ބިން އަބްދުއްރަޙްމާން އާލް ޘާނީ ވިދާޅުވީ، މި ހަމަލާއަށް ރައްދު ދިނުމުގެ ޙައްޤު ގަތަރަށް ލިބިގެންވާ ކަމަށާއި، މިއީ ސަރަޙައްދަށް ނުރައްކާތެރި ދަނޑިވަޅެއް ކަމަށެވެ.
ނަމަވެސް އިތުރަށް ވިދާޅުވީ، "ސަރަޙައްދުގައި ހުރި އެކި މައްސަލަތަކުގައި މެދުވެރިއެއްގެ ދައުރު އަދާކުރުމުން އެއްވެސް ކަމަކުން ގަތަރުން ފަހަތަށް ނުޖެހޭނެ" ކަމަށެވެ.
ސަރަޙައްދުގައި އެމެރިކާގެ އެންމެ ބޮޑު އަސްކަރީ މަރުކަޒު ހުންނަ، އެމެރިކާގެ މުހިންމު ބައިވެރިއެއް ކަމަށްވާ ދޯހާގައި، 2012 އިން ފެށިގެން ހަމާސްގެ ސިޔާސީ އޮފީސް ހިންގަމުން އަންނަނީ އެމެރިކާގެ ރުހުމާ ވެސް އެކުގައެވެ.
ވައިޓް ހައުސް އިން ބުނެފައި ވަނީ، އެމެރިކާގެ އެކުވެރި ގައުމެއްގެ ބިމުގައި އިސްރާއީލުން އަސްކަރީ ޢަމަލެއް ހިންގުމަށް ރައީސް ޑޮނަލްޑް ޓްރަމްޕް އެއްބަސްވެވަޑައިނުގަންނަވާ ކަމަށާއި، ހަމަލާ އަންނާނެކަން ކުރިން ގަތަރަށް އަންގާފައިވާ ކަމަށެވެ.
ގަތަރުން އެއާ ޚިލާފަށް ބުނެފައިވަނީ އަންގާރަ ދުވަހުގެ ހަމަލާ އާ ބެހޭ މައުލޫމާތު އެމެރިކާ އިން ދިނީ ހަމަލާގެ އެންމެ ދިހަ މިނެޓު ކުރިން ކަމުގައެވެ.
