ސަރުކާރު އަޑީގައި އޮވެގެން ރައްޔިތުންގެ މަޖިލީހަށް ހުށަހަޅާފައިވާ މީޑިއާތައް ތަޅުއަޅުވަން ހުށަހެޅި ބިލު ދިރާސާ ކުރާ މިނިވަން މުއައްސަސާތަކުގެ ކޮމިޓީ ސިއްރު ކުރީ މަޖިލިސް ގަވައިދާ ހިލާފަށްކަން ހާމަވެއްޖެއެވެ.

މިނިވަން މުއައްސަސާތަކުގެ ކޮމިޓީގެ 31 ވަނަ ބައްދަލުވުން ތާވަލުކޮށްފައި އޮތީ އަންގާރަ ދުވަހުގެ ހެނދުނު 10:00 ގައެވެ. އަދި މޯލްޑިވްސް މީޑިއާ އެންޑް ބްރޯޑްކާސްޓިންގ ރެގިއުލޭޝަން ބިލު ދިރާސާކުރުމަށް އޮތީ އެޖެންޑާ ކޮށްފައެވެ. މި ބައްދަލުވުމަށް ގިނަ އަދަދެއްގެ ނޫސްވެރިން ވެސް ވަދެފައިވެއެވެ. ނަމަވެސް ކުއްލި ގޮތަކަށް ކޮމިޓީ ސިއްރު ކުރަން ނިންމާ ނޫސްވެރިން ބޭރުކޮށްލިއެވެ.

ނަމަވެސް ކޮމިޓީ ސިއްރުކުރަން ނިންމި އިރު، ކޮމިޓީ ބައްދަލުވުން މީޑިއާއަށް ހާމަކުރުން ހިމެނޭ މަޖިލީހުގެ ގަވައީދުގެ 179 ވަނަ މާއްދާގައި ބުނެފައިވަނީ އެކިއެކި ޤާނޫނުތަކާ ގުޅޭގޮތުންނާއި ކޮމިޓީން ހިންގަމުންގެންދާ އެކިއެކި އެހެން މަސައްކަތްތަކާ ގުޅޭގޮތުން ބާއްވާ ބައްދަލުވުންތައް ޢާންމު އުސޫލެއްގެ ގޮތުން ބަލަން ބޭނުންވާ މީހުންނަށް ވަދެވޭގޮތަށް ހުޅުވާލަންވާނެއެވެ. އަދި ކޮމިޓީގެ މަސައްކަތަށް ދަތިނުވާ ގޮތަށް މީޑިއާގެ ވަސީލަތްތައް މެދުވެރިކޮށް ބްރޯޑްކާސްޓްކުރުމުގެ ފުރުޞަތު ދޭންވާނެއެވެ.

މީގެ އިތުރުން ޢާންމުންނަށާއި މީޑިއާގެ މީހުންނަށް ނުވަދެވޭގޮތަށް ކޮމިޓީގެ ބައްދަލުވުމެއް ބާއްވާކަމަށްވާނަމަ، އެކަން ކުރަންވާނީ ކޮމިޓީން ވޯޓަށް އަހައި އެގޮތަށް ފާސްކޮށްގެންނެވެ. އަދި ސިއްރުކުރަން ފާސްކުރެވޭނީ 3 ސަބަބުން ކުރެ ސަބަބަކަށްޓަކައި ކަމަށް ބުނެފައިވެއެވެ.

ނަމަވެސް މިއިން އެއްވެސް ސަބަބެއް ނެތި ކޮމިޓީ ސިއްރުކުރަން ނިންމިއެވެ.

ކޮމިޓީ ސިއްރުކުރަން ހުށަހެޅުއްވީ ތުލުސްދޫ ދާއިރާގެ މެންބަރު އިބްރާހިމް ނަސީމެވެ. އޭނާ ވިދާޅުވީ މަސައްކަތް ކޮންމެ ގޮތަކަށް ގެންދިޔަ ކަމުގައިވީ ނަމަވެސް ބިލުގެ މަސައްކަތް އަންގާރަ ދުވަހަށް ނިންމާ ނުލެވޭނެ ކަމަށާއި، ގިނަ އަދަދެއްގެ ކޮމެންޓްތައް ލިބިފައިވާ ކަމަށެވެ. އަދި ކޮމެންޓް ހުށަހެޅި ފަރާތްތަކުގެ ޒާތީ މައުލޫމާތު ހާމަވެދާނެތީ ކޮމިޓީ ލައިވްކުރުމަކީ އެންމެ ރަނގަޅު ނޫން ކަމަށް ވިދާޅުވެ ކޮމިޓީ ސިއްރު ކުރަން މެންބަރު ނަސީމް ހުށަހެޅުއްވިއެވެ.

ކޮމިޓި ސިއްރުކުރަން ހުށަހެޅި ހުށަހެޅުމަށް ތާއިދުކުރެއްވީ ކެލާ ދާއިރާގެ މެންބަރު އަބްދުﷲ ޝަރީފެވެ. އަދި ކޮމިޓީގައި ހާޒިރުވެތިއްބެވި މެންބަރުންގެ އިއްތިފާގުން ވަނީ ބައްދަލުވުން ސިއްރުކުރަން ފާސްކޮށްފައެވެ.