އިސްރާއީލް އިން ޣައްޒާގައި ހިންގަމުން އަންނަ ހަނގުރާމައިގެ ސަބަބުން، ހަމާސް ޖަމާއަތުން ރަހީނު ކޮށްފައިވާ އިސްރާއީލްގެ ރައްޔިތުން މިނިވަން ކުރުމުގެ މައްސަލައިގައި، އެމެރިކާގެ ރައީސް ޑޮނަލްޑް ޓްރަމްޕް ހަމާސް ޖަމާއަތަށް އެންމެ ފަހުގެ އިންޒާރު ދީފި އެވެ.

އާދީއްތަ ދުވަހު ޓްރަމްޕް ވަނީ، ހަމާސް އިން ހިފަހައްޓާފައިވާ އިސްރާއީލްގެ ރައްޔިތުން މިނިވަންކުރުމާ ގުޅޭ އެއްބަސްވުމަކަށް އައުމަށް، އެންމެ ފަހުގެ އިންޒާރު އަދި ފުރުސަތު ދީފަ އެވެ.

އެކަމާ ގުޅޭ ގޮތުން ޓްރަމްޕް ވިދާޅުވީ، އޭނާގެ ފަރާތުން ހުށަހަޅާފައިވާ ހުށަހެޅުންތައް އަދި ޝަރުތު ތަކަށް އިސްރާއީލް އިން އެއްބަސްވެފައިވާ ކަމަށެވެ. އެހެންކަމުން، ހަމާސް އިން ވެސް އެކަމަށް އެއްބަސްވުމުގެ ވަގުތު މިހާރު ޖެހިފައިވާ ކަމުގައި ޓްރަމްޕް ވިދާޅުވި އެވެ.

ޓްރަމްޕް މިފަދައިން ވިދާޅުވި ނަމަވެސް، އޭނާ އެ އިޝާރާތް ކުރެއްވި އެއްބަސްވުމުގެ އެއްވެސް ތަފުސީލެއް ހާމަ ކުރައްވާފައި ނުވެ އެވެ.

މި އަހަރުގެ މާޗު މަހުގެ ތެރޭގައި ވެސް ޓްރަމްޕް ވަނީ ހަމާސް ޖަމާއަތަށް އެ ފަދަ އިންޒާރެއް ދެއްވައިފަ އެވެ. އެއީ ހަމާސް އިން ރަހީނު ކޮށްފައިވާ މީހުންގެ ތެރެއިން، މިނިވަން ކުރި އަށް މީހަކާ، އެމެރިކާގެ ރިޔާސީ ގަނޑުވަރު ވައިޓް ހައުސްގައި ބައްދަލު ކުރުމަށް ފަހު އެވެ.

އޭރު ވެސް ޓްރަމްޕް ވިދާޅުވެފައި ވަނީ، އިސްރާއީލް އަށް ހަމަލާ ދިނުމަށް ފަހު، ހަމާސް ޖަމާއަތުން ރަހީނު ކޮށްފައިވާ އެންމެން ދޫކޮށްލުމަށް ގޮވާލާ ކަމަށެވެ. އަދި ރަހީނުންގެ ތެރެއިން މަރުވެފައިވާ މީހުންގެ ހަށިގަނޑުތައް ވެސް ހަވާލު ކުރުމަަށް ގޮވާލާ ކަމަށް ޓްރަމްޕް ވިދާޅުވެފައިވެ އެވެ.

ހަމާސް އިން ވަނީ، 2023 ވަނަ އަހަރުގެ އޮކްޓޫބަރު މަހުގެ ހަތް ވަނަ ދުވަހު އިސްރާއީލް އަށް ހަމަލާ ދިނުމަށް ފަހު، 251 މީހަކު ރަހީނުންގެ ގޮތުގައި ހިފަހައްޓައިފަ އެވެ. އޭގެ ތެރެއިން ގިނަ ބަޔަކު މިނިވަން ކޮށްފައިވާއިރު، މިވަގުތު ވެސް ހަމާސްގެ ބެލުމުގެ ދަށުގައި 47 މީހަކު ތިބި ކަމަށް ވަނީ ލަފާ ކޮށްފަ އެވެ.

އެކަމާ ގުޅިގެން އިސްރާއީލްގެ އަސްކަރިއްޔާ އިން ބުނެފައި ވަނީ، ހަމާސްގެ ބެލުމުގެ ދަށުގައި ތިބި 47 ރަހީނުންގެ ތެރެއިން، 25 މީހަކު މަރުވެފައިވާ ކަމަށް ބެލެވޭ ކަމުގަ އެވެ. އަދި އިސްރާއީލް އިން ވެސް އަންނަނީ ރަހީނުން މިނިވަން ކުރުމަށް ހަމާސް އަށް ގޮވާލަމުންނެވެ.

މިދިޔަ ހުކުރު ދުވަހު ޓްރަމްޕް ވިދާޅުވެފައި ވަނީ، އެމެރިކާ އިން ހަމާސް އާއެކު ގިނަ މަޝްވަރާތައް ކުރިއަށް ގެންދަމުން އަންނަ ކަމަށެވެ. އަދި މިހާރު ކުރިއަށް ގެންދާ ހަނގުރާމަ އާއި، ހަނގުރާމަ ފުޅާ ކުރުމުގެ ސަބަބުން އިތުރު ރަހީނުން ތަކެއް މަރުވުމުގެ ފުރުސަތު އޮތް ކަމަށް ވެސް ޓްރަމްޕް ވިދާޅުވެފައިވެ އެވެ.

ހަމާސް އިން ހައްޔަރު ކޮށްފައިވާ ރަހީނުން މިނިވަން ކުރުމަށް ބާރު އެޅުމުގެ ގޮތުން ކަމަށް ބުނެ، އިސްރާއީލް އިން ވަނީ ޣައްޒާގައި ހިންގަމުން އަންނަ ހަނގުރާމަ ފުޅާ ކުރުމަށް ނިންމައިފަ އެވެ. އެގޮތުން ޣައްޒާ ސިޓީ އާއި އެ ސަރަހައްދު ވަށައިގެންވާ ތަންތަނަށް އިސްރާއީލް އިން އަންނަނީ ވަރުގަދަ ހަމަލާ ތަކެއް ދެމުންނެވެ.

މިދިޔަ އަހަރު އޮތް އެމެރިކާގެ ރިޔާސީ އިންތިޚާބުގައި ޓްރަމްޕް ވަނީ، ޣައްޒާ ހަނގުރާމަ ނިންމުމަކަށް ގެންނާނެ ކަމަށް ވައުދުވެ ވަޑައިގެންފަ އެވެ. ނަމަވެސް، ޓްރަމްޕްގެ ވެރި ކަމަަށް ހަތް މަސް ދުވަސް ވެގެން ދިޔައިރު ވެސް، އެކަމުގައި ޓްރަމްޕް އަށް ކާމިޔާބު ހޯދިފައި ނުވެ އެވެ.

ޣައްޒާ ހަނގުރާމަ ނިންމުމާއި، ހަނގުރާމަ ނިންމުމުގެ މުހިންމު ކަމުގެ ވާހަކަ ދޭތެރެ އަކުން ޓްރަމްޕް ދައްކަވާއިރު، ޓްރަމްޕް އަކީ އިސްރާއީލް އަދި އެ ޤައުމުގެ ބޮޑު ވަޒީރު ބެންޖަމިން ނަތަންޔާހޫ އަށް އެންމެ ބޮޑަށް ވާގިވެރިވާ އެކަކެވެ.