ބައްޕައަށް ވަޅިން ދިން ހަމަލާ: މެންޓަލް ހެލްތް ކެއަރގައި ދަރިފުޅަށް ދަނީ ފަރުވާ ދެމުން، ބައްޕައަށް ފަރުވާ ދިނުމަށްފަހު ދޫކޮށްލައިފި

އއ. އުކުޅަހުގައި ދެބަފައިންގެ ދެމެދު ހިނގި ހާދިސާއެއްގައި އަނިޔާވި ބައްޕައަށް އައިޖީއެމްއެޗްގައި ފަރުވާ ދިނުމަށްފަހު ދޫކޮށްލައިފި އެވެ.

ރާއްޖެއެމްވީއަށް އައިޖީއެމްއެޗްގެ މީޑިއާ އޮފިޝަލް ވިދާޅުވީ އުކުޅަހުގައި ބައްޕައަށް ވަޅިން ހަމަލާ ދިން ޒުވާނާއަށް އައިޖީއެމްއެޗްގެ މެންޓަލް ހެލްތް ކެއަރ ޔުނިޓްގައި އަދިވެސް ފަރުވާ ދެމުންދާ ކަމަށެވެ. ނަމަވެސް ފަރުވާގެ ތަފްސީލެއް ދެއްވާފައިނުއެވެ.

Advertisement

މީގެ އިތުރުން އޮފިޝަލް ވިދާޅުވީ އެޒުވާނާގެ ބައްޕައަށް ފަރުވާ ދިނުމަށްފަހު މިމަހުގެ 3 ވަނަ ދުވަހު ދޫކޮށްލާފައިވާ ކަމަށެވެ. އަދި އޭނާގެ ހާލު ރަނގަޅު ކަމަށް އޮފިޝަލް ވިދާޅުވިއެވެ.

60 އަހަރުން މަތީގެ މިމީހާއަށް ފުރަތަމަ ފަރުވާ ދީފައިވަނީ އެރަށުގެ ސިއްހީ މަރުކަޒުގައެވެ. ނަމަވެސް ބަނޑަށް ވަޅި ހެރިފައިވާތީ އިތުރު ފަރުވާއަށް މާލެ ގެނެސް، އިތުރަށް ބަލަންޖެހޭ ކަންކަން ވަނީ ބަލާފައެވެ. މީގެ އިތުރުން އެމީހާގެ އަތަށްވެސް އަނިޔާވެފައިވެ އެވެ.

އުކުޅަހުގައި ނަފްސާނީ ނުކުޅެދުންތެރިކަން ހުންނަ ފިރިހެނަކު އޭނާގެ ބައްޕައަށް ތޫނު އެއްޗަކުން ހަމަލާދީފައިވައިވާ މައްސަލަ ފުލުހުންނަށް ރިޕޯޓު ކޮށްފައިވަނީ 31 އޮގަސްޓް 2025 ވަނަ ދުވަހުގެ ރޭ 10:20 ހާއިރުއެވެ.

މެންޓަލް ހެލްތް ކެއަރ ޔުނިޓްގައި މިހާރު ފަރުވާ ފަށާފައިވާ ޒުވާނަކީ ގަވާއިދުން އިންޖެކްޝަނެއް ޖަހަން ޖެހޭ މީހެކެވެ. ނަމަވެސް މިފަހުން އޭނާ އިންޖެކްޝަން ޖެހުމަށް ދެކޮޅު ހަދަމުންދާތީ، އާދިއްތަ ދުވަހުގެރޭ ސިއްހީ މަރުކަޒުން އޭނާގެ ގަޔަށް އިންޖެކްޝަން ޖެހިއެވެ. އަދި އެކަމާއި ރުޅިގަދަވެ، މީހަކު ނެތް ވަގުތު އޭނާގެ ބައްޕައަށް ހަމަލާ ދިނީ ކަމަށް މައުލޫމާތު ލިބެއެވެ.

ރާއްޖޭގައި ނަފްސާނީ ބައްޔަށް ފަރުވާ ދޭންޖެހޭ މީހުންނަށް އެކަށީގެންވާ ފަރުވާ ނުލިބޭ މައްސަލަ ބޮޑެވެ.