އާއިލާގެ ނުރުހުމުގައި އޮޓޮޕްސީ ހެދުމަށްފަހު އަދީލުގެ ހަށިގަނޑު ވަޅުލައިފި، ''ނިއްކުރި އޮތީ ވަރަށް ބޮޑަށް ދުޅަވެފައި''
5 ސެޕްޓެމްބަރު 2025 | ހުކުރު 08:21އަދީލްގެ މަރާ ގުޅޭ މައުލޫމާތު މިހާތަނަށް ފުލުހުން ހިއްސާކޮށްފައިނުވޭ
އަދީލް އަހުމަދު
ރިސޯޓެއްގައި ކުއްލި ގޮތަކަށް މަރުވި ޒުވާނާގެ ހަށިގަނޑު އާއިލާގެ ނުރުހުމުގައި އޮޓޮޕްސީ ހެދުމަށްފަހު، ވަޅުލައިފިއެވެ.
ރިސޯޓެއްގައި މަސައްކަތް ކުރަމުންދިޔަ 21 އަހަރުގެ އަދީލް އަހުމަދު މަރުވި ކަމުގެ ރިޕޯޓު ލިބިފައިވަނީ 23 އޯގަސްޓް 2025 ގައެވެ. މިމަރުގައި ސުވާލު އުފެދޭ ކަންތައްތަކެއް ހުރުމާއި ގުޅިގެން އޮޓޮޕްސީ ހެދުމަށް ހަށިގަނޑު އިންޑިއާއަށް ފޮނުވުމަށް ފުލުހުން ނިންމިއެވެ. ނަމަވެސް އަދީލްގެ މަރަށް ހަފްތާއެއް ވެގެންދިޔައިރު ވެސް ހަށިގަނޑު އާއިލާއާ ހަވާލުކޮށްފައިނުވާތީ، އަދި މިމަރާ ގުޅިގެން އެއްވެސް މައުލޫމާތެއް ހިއްސާކޮށްފައިނުވާތީ އާއިލާއިން ކަންބޮޑުވުންފާޅުކޮށް، އަދީލްގެ ހަށިގަނޑު އާއިލާއާ ހަވާލުކޮށް ދިނުމަށް އެދިފައިވެއެވެ.
ރާއްޖެއެމްވީއަށް އަދީލްގެ މަންމަ ނާޖިދާ ހަސަން ބުނީ، އާއިލާގެ ނުރުހުމުގައި އަދީލްގެ ހަށިގަނޑު އިންޑިއާއަށް ގެންގޮސް އޮޓޮޕްސީ ހަދާފައިވާ ކަމަށާއި، އެ މަރާ ގުޅޭ މައުލޫމާތު މިހާތަނަށް ފުލުހުން ހިއްސާކޮށްފައިނުވާ ކަމަށެވެ. އަދި ހަށިގަނޑު އާއިލާއާ ހަވާލުކޮށްފައިވަނީ ބުރާސްފަތި ދުވަހުގެ ރޭގެ ވަގުތެއްގައި ކަމަށެވެ.
ނާޖިދާ ބުނީ އަދީލްގެ މަރަށް އިންސާފު ލިބޭނެ ކަމަށް އުންމީދުނުކުރާ ކަމަށެވެ. އަދި އެ ހާދިސާ ހިނގި ވަގުތަކީ ރިސޯޓުގެ މުވައްޒަފުންނާއި، މެނޭޖްމަންޓް ޓީމް ނިދާފައި ތިބި ވަގުތެއް ކަމަށާއި، ރިސޯޓުގައި ހުރި ހުރިހާ ސީސީޓީވީއެއް ހަލާކުވެފައިވާ ކަމަށް މައުލޫމާތުދީފައިވާ ކަމަށް ނާޖިދާ ބުންޏެވެ.
އޭނާގެ ދަރިފުޅު، އަދީލް އަމިއްލައަށް މަރުވި ކަމަށް ދެކެވޭ ވާހަކަތަކަށް އިޝާރާތްކޮށް ނާޖިދާ ބުނީ، އެންމެފަހުން އަދީލްއާ ފޯނުން ވާހަކަ ދެއްކިއިރު ދިރިއުޅުމުގެ އެކިއެކި ކަންކަމުގެ ވާހަކަ ހިއްސާކުރި ކަމަށާއި،އޭނާގެ އެކުވެރިންތަކަކާއެކު ޗުއްޓީއަށް ރާއްޖެއިން ބޭރަށް ދަތުރެއްދާން ރާވާ ކަމަށް ބުނެފައިވާ ކަމަށެވެ. އެރޭގެ ފޯނު ކޯލުން ވެސް އަދީލްއަށް ކަމެއްވެފައިހުރިކަން އިހުސާސް ވެސް ނުކުރެވޭ ކަމަށް ނާޖިދާ ބުންޏެވެ.
މީގެ އިތުރުން ނާޖިދާ ބުނީ، އަދީލް މާ ބޮޑަށް މާޔޫސްވެ، ދެރަ ކަމެއްވާނަމަ އެއްބަނޑު މީހަކާއި، ނުވަތަ ގާތް ރައްޓެއްސަކާ ވާހަކަ ހިއްސާ ކުރާނެ ކަމަށެވެ. ނަމަވެސް މިފަދަ ކަމެއް ހިނގާފައިނުވާކަމުގެ ޔަގީންކަން ނާޖިދާ ދީފައިވެއެވެ.
އަދީލްގެ ހަށިގަނޑު ހުކުރު ދުވަހުގެ ފަތިސް ނަމާދަށްފަހު ވަޅުލާފައިވާއިރު، ނިއްކުރި ވަރަށް ބޮޑަށް ދުޅަވެފައިވާކަން އޭނާ ފާހަގަކުރިއެވެ. އަދި އަދީލްއަށް ހެޔޮ ދުއާ ކޮށްދިނުމަށް އަދީލްގެ މަންމަ ނާޖިދާ ވަނީ އެދިފައެވެ.
