ވަޒީރުންގެ މާލީ ބަޔާން ދައުރު ފަށާއިރު ހުށަހަޅަންޖެހޭ ގޮތަށް ގާނޫނޫއަސާސީއަށް ހުށަހެޅި އިސްލާހު ރައްޔިތުންގެ މަޖިލީހުން ބަލައިގަނެފިއެވެ.

މި އިސްލާހު ހުށަހެޅުއްވީ ގަލޮޅު އުތުރު ދާއިރާގެ އެމްޑީޕީ މެންބަރު މުހައްމަދު އިބްރާހީމް (ކުޑޫ) އެވެ. މެންބަރު ހުށަހެޅުއްވި ބިލުގައި ހުށަހަޅާ ސަބަބެއްގެ ގޮތުގައި ބުނެފައިވަނީ ގާނޫނުއަސާސީގެ 138 ވަނަ މާއްދާގައި، ވަޒީރުންގެ މަޖިލީހުގެ މެންބަރުން މުދަލާއި ފައިސާގެ ބަޔާން ހާމަކުރުން ލާޒިމުކޮށްފައިވީއިރު، އެ މާއްދާގެ ދަށުން، ވަޒީރުންގެ މަޖިލިހުގެ ކޮންމެ މެންބަރަކުގެ، ކޮންމެ އަހަރަކު އެއްފަހަރު އެ މެންބަރެއްގެ މިލްކިއްޔާތުގައިވާ މުދަލާއި ފައިސާގެ ހިސާބުތަކާއި، ވިޔަފާރީގެ މަސްލަހަތުތަކާއި އަރަންޏާއި ދަރަނި ހާމަކޮށް ތައްޔާރުކުރަންޖެހޭ ބަޔާނެއް އޮޑިޓަރ ޖެނެރަލް އަށް ހުށަހެޅުން ލާޒިމު ނަމަވެސް، ވަޒީރުންގެ މުދަލާއި ފައިސާގެ ބަޔާން ހުށަހަޅަންޖެހޭ ވަކި މުއްދަތަެއް ނުވަތަ ވަކި ތާރީހެއް ކަނޑައަޅާފައި ނުވާތީއާއި، އަދި، ވަޒީރުކަމުގެ ދައުރު ފަށާއިރު އެމީހުންގެ މިލްކިއްޔާތުގައި ހުރީ ކޮން އެއްޗެއްކަން އަދި އެމީހުންގެ މަސަލަހަތު އޮންނަ ވިޔަފާރިތަކަކީ ކޮބައިކަން ހާމަކުރުން ލާޒިމުކުރުމެވެ.

މީގެ އިތުރުން މެންބަރު ކުޑޫ ވަނީ މަޖިލީހުގެ މެންބަރުންނާއި، މިނިވަން މުއައްސަސާތަކުގެ މެންބަރުންނާއި މުސްތަގިއްލު މަގާމުތަކުގެ މީހުންނާއި، ސަރުކާރުގެ ކުންފުނިތަކުގެ ވެރިންގެ މާލީ ބަޔާންވެސް ކުރިން ހުށަހެޅޭ ގޮތަށް ގާނޫނުއަސާސީއަށް އިސްލާހު ގެންނަން ހުށަހަޅުއްވަން ނިންމަވާފައެވެ.

މި އިސްލާހު މަޖިލީހަށް ބަލައިގަތުމަށް ނެގި ވޯޓުގައި 59 މެންބަރުން ވަނީ އިސްލާހު މަޖިލީހަށް ބަލައިގަތުމަށް ވޯޓު ދެއްވާފައެވެ. ބިލާ ދެކޮޅަށް އެއްވެސް މެންބަރަކު ވޯޓެއް ނުދެއެވެ. މި ބިލަށް ބަހުސް ކުރުމަށް ހުޅުވާލި ފުރުސަތުގައި އެއްވެސް މެންބަރަކު ބަހުސްކޮށްފައި ނުވެއެވެ. މި ބިލު މިހާރު ވަނީ އިތުރަށް ދިރާސާ ކުރުމަށް މާލިއްޔަތު ކޮމިޓީއަށް ފޮނުވާފައެވެ.

މީގެ ކުރިން އެމްޑީޕީ ސަރުކާރުގައި ވަޒީރުންނާއި ސިޔާސީ އިސް މީހުންގެ މާލީ ބަޔާން ހާމަކޮށް ރައީސް އޮފީސް ވެބްސައިޓުގައި ޝާއިޢު ކުރަމުން ދިޔައެވެ. ނަމަވެސް ވެރިކަން ބަދަލުވި ފަހުން މިހާތަނަށް ރައީސް ޑރ. މުހައްމަދު މުއިއްޒުގެ ކެބިނެޓު ވަޒީރުންނާއި ރައީސް އޮފީހުގެ ސިޔާސީ އިސް މީހުންގެ މާލީ ބަޔާން ހާމަކޮށްފައިނުވެއެވެ.