އަވަށްޓެރި ސްރީ ލަންކާއާ ދެކޮޅަށް ކުޅުމަށް، ރާއްޖޭގެ ސީނިއާ ޤައުމީ ފުޓުބޯޅަ ޓީމު ލަަންކާ އަށް ގޮސްފި އެވެ.

ލަންކާއާ ދެކޮޅަށް ރާއްޖޭގެ ސީނިއާ ޤައުމީ ޓީމު ކުޅޭ ދެ މެޗަކީ، ސައުތު އޭޝިއަން ސުޕަ ކަޕްގެ ދެ މެޗެވެ. މިއީ ލަންކާގައި މިއަހަރު ބާއްވަން މަސައްކަތް ކުރި، ސާފް ޗެމްޕިއަންޝިޕް ފުޓުބޯޅަ މުބާރާތް ކުރިއަށް ގެންދެވޭ ގޮތް ނުވުމުން، އޭގެ ބަދަލުގައި ކުޅޭ މެޗުތަކެވެ.

ބުރާސްފަތި ދުވަހުގެ ހެނދުނު ސީނިއާ ޤައުމީ ޓީމު ލަންކާ އަށް ފުރާފައިވާއިރު، ކުޅިވަރު ވަޒީރު ޢަބްދުﷲ ރާފިޢު (ރާއްޕެ) ވަނީ ޤައުމީ ޓީމާ ބައްދަލު ކުރައްވައިފަ އެވެ. ޤައުމީ ޓީމު ފުރިއިރު، ކުޅިވަރު ވުޒާރާގެ އިތުރުން، ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ އިސްވެރިން ވަނީ ޓީމު ފުރުވަން ގޮސްފަ އެވެ.

އެ މެޗަށް ރާއްޖެ ނިކުންނަނީ ދާދި ފަހުން ޤައުމީ ޓީމުގެ ކޯޗަކަށް ހަމަޖެއްސި ތަޖުރިބާާކާރު ކޯޗު، މުޙައްމަދު ޝިޔާޒް (މޯހަން)ގެ އިރުޝާދުގެ ދަށުންނެވެ. މޯހަންގެ އިރުޝާދުގެ ދަށުން ޤައުމީ ޓީމުގެ ފަރިތަކުރުންތައް ފަށާފައި ވަނީ މިދިޔަ ހުކުރު ދުވަހު އެވެ. އެއީ ލަންކާއާ ދެކޮޅަށް ކުޅޭ މެޗަށް އެކުލަވާލި 26 ކުޅުންތެރިންގެ ސްކޮޑާ އެކު އެވެ.

އެ މެޗުތަކުގެ ކުރިން ވާހަކަ ދައްކަމުން މޯހަން ބުނެފައި ވަނީ، މިވަގުތު ހުރިހާ ފޯކަސްއެއް އޮތީ ލަންކާއާ ދެކޮޅަށް ކުޅޭ ދެ މެޗަށް ކަމަށެވެ. އެގޮތުން އެ ދެ މެޗުން ރަނގަޅު ނަތީޖާއެއް ނެރެން ބޭނުންވާ ކަމަށާއި، ރާއްޖޭގެ ފުޓުބޯޅައިގެ ޙާލަތު ރަނގަޅު ކުރެވެން އޮތް ގޮތަކީ އެއީ ކަމަށް ވެސް މޯހަން ބުންޏެވެ.

އެންމެ ފަހުން ރާއްޖޭގެ ޤައުމީ ޓީމުން ކުޅުނު މެޗަކީ އޭއެފްސީ އޭޝިއަން ކަޕް ކޮލިފިކޭޝަންގައި ޓިމޯ ލެސްޓޭއާ ދެކޮޅަށް ކުޅުނު މެޗެވެ. އެ މެޗުން ރާއްޖެ ބަލިވެފައިވާއިރު، އެންމެ ފަހުން ޤައުމީ ޓީމުން ކުޅުނު ފަސް މެޗުން ވެސް ވަނީ ބަލިވެފަ އެވެ.

އޭގެ ތެރޭގައި ބަންގްލަދޭޝަން، އިންޑިއާ އަދި ސިންގަޕޫރާ ދެކޮޅަށް ކުޅުނު ރަޙުމަތްތެރި ކަމުގެ މެޗުތައް ހިމެނެ އެވެ. އެންމެ ފަހުން ރާއްޖެ މޮޅުވެފައި ވަނީ ބަންގްލަދޭޝްއާ ދެކޮޅަށް ކުޅުނު ރަޙުމަތްތެރި ކަމުގެ ފުރަތަމަ މެޗުންނެވެ.