މީޑިއާ ކޮމިޝަން އިންތިޚާބަށް ކުރިމަތިލާ މީހުން ރެކޯޑު ސާފުކުރުން އަވަސްކުރުމަށް ޑީޖޭއޭއިން އެދެފި

މީޑިއާ ކޮމިޝަންގެ އިންތިޚާބަށް ކުރިމަތިލާ ފަރާތްތަކުގެ ރެކޯޑު ސާފުކުރުމަށް ވަގުތު އޮއްވައި ހުށަހެޅުމަށް ޑިޕާޓުމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން އެދިއްޖެ އެވެ.

އިލެކްޝަންސް ކޮމިޝަނުން މިދިޔަ ބުރާސްފަތި ދުވަހު ވަނީ މީޑިއާ ކޮމިޝަނަށް ޖުމުލަ ހަތަރު މަގާމަކަށް ކުރިމަތިލުމުގެ ފުރުސަތު ހުޅުވާލާފައެވެ. މީގެ ތެރޭގައި ހިމެނެނީ ބްރޯޑްކާސްޓަރުން ތަމްސީލުކުރާނެ ދެ ގޮނޑިއާއި، މީޑިއާތައް ތަމްސީލުކުރާނެ ދެ ގޮނޑިއެވެ. މި މަގާމުތަކަށް ކުރިމަތިލެވޭނީ އަންނަ މަހުގެ ހަތަރުވަނަ ދުވަހުގެ 14:00ގެ ނިޔަލަށެވެ.

ޑީޖޭއޭ އިން ނެރުނު އިއުލާނުގައި ބަޔާންކޮށްފައިވާ ގޮތުގައި، އިންތިޚާބަށް ކުރިމަތިލާ ފަރާތްތަކުގެ ރެކޯޑު ސާފުކުރުމުގެ މަސައްކަތް ވީއެންމެ އަވަހަކަށް ނިންމުމަށް ކޯޓުތަކާ ގުޅިގެން މަސައްކަތްކުރަމުންދާ ކަމަށެވެ. ނަމަވެސް، ރާއްޖޭގެ ހުރިހާ ކޯޓުތަކުގެ ކުށުގެ ރެކޯޑުތައް 'ރެކޯޑް ޕޯޓަލް' އަށް އަދާހަމަ ކުރެވިފައިނުވާތީ، ކޯޓުތަކުން ވަކިވަކިން ރެކޯޑު ސާފުކުރުމަކީ ގިނަ ވަގުތު ހޭދަވާނެ ކަމެއްކަން ފާހަގަކޮށްފައިވެއެވެ.

ޑީޖޭއޭ އިން ވަނީ އަންނަ ބުރާސްފަތި ދުވަހުގެ 13:00 ގެ ފަހުން ރެކޯޑު ސާފުކުރުމަށް ހުށަހަޅާ ފަރާތްތަކުގެ ރެކޯޑު، އިލެކްޝަންސް ކޮމިޝަނުން ކަނޑައަޅާފައިވާ ސުންގަޑިއަށް ނުނިމުމުގެ ފުރުސަތު އޮތްކަން ފާހަގަކޮށްފައެވެ.

އިންތިޚާބާ ގުޅޭގޮތުން އިލެކްޝަންސް ކޮމިޝަނުން މިދިޔަ ބުދަ ދުވަހު ވަނީ އާ ކޮމިޝަނަށް މެންބަރުން އިންތިޚާބުކުރުމުގެ ގަވާއިދު އާންމުކޮށްފައެވެ. މި ގަވާއިދުގެ ދަށުން، އިންތިޚާބުގައި ވޯޓުލެވޭނީ ރާއްޖޭގައި ރަޖިސްޓްރީކޮށްގެން ހިންގާ ކޮންމެ މީޑިއާއަކުން އެއް ފަރާތަކަށެވެ.

ގަވާއިދުގައިވާ ގޮތުން، ކުރިމަތިލާ ފަރާތްތަކަށް 10 ދުވަހުގެ މުއްދަތެއް ދޭންޖެހޭއިރު، އެ ފަރާތްތަކުގެ ޝަރުތު ހަމަވާކަން ނުވަތަ ނޫންކަން ކުރިމަތިލާތާ ދެ ދުވަހުގެ ތެރޭގައި އަންގަންޖެހެއެވެ. އަދި މި އެންގުންތައް ފޮނުވާނީ އެޕްލިކޭޝަން ފޯމުގައި ކެންޑިޑޭޓުން ބަޔާންކޮށްފައިވާ އީމެއިލް އެޑްރެހަށެވެ.